E mafua ona ola le faatuatua ona o galuega. O le tele foi o au e lulu o le tele foi lena o lau selesele. E ui i le tele o tuatuagia ma le pisi o le olaga, peitai a suamalie galuega o le ‘alofa’, e faigofie foi ona saputu mai ma tele le au foai.
E faigata ona tali mai se tagata pe a augani se isi i se fesoasoani, sei vagana ua talitonuina poo le a moni le ituaiga tagata e iai oe ma au, ae afai ua faauuina e ala i le alofa e le tau fesiligia na o le alu atu a ma sau.
O le felafoaina o tusi faaonaponei, o telefoni ma isi fesootaiga vavave, o auala ia sa mafai ona faaaoga e le Phat Club sa faatino ai le latou galuega fesoasoani.
Ua savalia nei le 5 tausaga talu ona amata i Brisbane ma e maoae foi galuega a i latou nei o loo fesoasoani ai i isi faamoemoe ma le manaomia.
O le tamaitai o Diane Nansen, Cathy Timoteo, Liliian Tupu Timoteo ma TraceyTaufa o i latou nei o loo iai i totonu o lenei kalapu.
O le tele o kamupani tetele faatau masini eleteise faaonapo nei e iai masini tamea, pusa aisa, televise, nofoa, ma isi vaega faapena, sa mafai ona talia mai tusi talosaga a lea foi kalapu o le Phat Club.
O nisi nei o kamupani, e aofia ai Good Guys, Harvey Norman, Enchiro Laei, Jet Screen Printing, David Hanna o le BLF Union, Lui from Brian Byrt Vaults Wagon, Woodies Music Store, Duty free International Airport, Tuff Tumas, Mystique Night Club, Super Fest, Bros Hangi, Soul Cutz ma Fobstar DJ. O i latou ia na tele ina foaia le tele o meaalofa sa foaia i ai latou sa mafuta atu ma lagolago le faamoemoe i le po ole Aso Toonai 7 o Aperila.
A tuufaatasi le aofaiga o faailoga sa foai fuaina i lea po e ova atu i le sefululima afe tala ($15,000.00).
O le autu moni o le po fiafia i lea afiafi ona o se seleni e faamaopoopoina ma tuuina atu lea i le BLF Charity Foundation sa tele lo latou sao i le fausiaina o le fale na maimau ai soifua o tagata e toa 11 i le aai o Slacks Creek.
Sa iu manuia le faamoemoe ma talia fiafia e David Hanna ma le faletua le foai a nei foi Samaria agalelei.
O le faaili malie a le Simply Savaii sa faafiafiaina le po faatasi ma nisi o alii ma tamaitai pepese.
Sa mafai foi ona foaina mai se isi seleni e faimeaalofa ai i le leitiofoni a le leitio Penina o Asuisui. Faafetai tele le agalelei ma ia faamanuia le Atua i la outou kalapu ma le auaunaga.
