E maliu Kirita oloo faatali pea se iuga o lana mataupu ile faamasinoga

 

Se vaaiga ile fanau ma aiga loto mafatia ao faamavae atu i lona toe sauniga ile fanua tanu i Papakura
Se vaaiga ile fanau ma aiga loto mafatia ao faamavae atu i lona toe sauniga ile fanua tanu i Papakura

E 72 tausaga ole matua ole tina matua ia Maria Kolokita Pune poo Kirita e pei ona lausilafia ai, ae faamanavaina loa ele Atua ana galuega mai totonu o lana Ekalesia faapea ai foi ma lona aiga.

Ose tina na faigata ona talia e lana fanau ma lona aiga lona maliu ona e finau tele i mea a lona aiga aemaise ole manuia mo lana fanau.

O ona toe sauniga sa faia lea ile malumalu ole Ekalesia St Mary’s Catholic Church i Papakura ile taeao ole Aso Faraile, 2 o Setema 2016.

Ole taitai ole sauniga ole Misasa ole afioga ia Fr Peter Murthy ae sa vaavaalua ma Fr Maliumoeao Otutaha.

Sa faatumulia lea malumalu i aiga uo ma ē masani sa faatasi atu e molimauina toe sauniga ole tina, ma molimoli atu ai lona sa ile fanuatanu i Papakura ma lagomau ai.

E manatua lenei tina ona o ia ose tagata agamalu, loto alofa ma o ia ose tagata lotu, e talitonu ile Atua ma ia faatāuaina le fai ole mea sa‘o male amiotonu.

Ole talitonuga foi lenei a lona alo tamaitai ia Kalala Grey na ia saunia le molimau a lona tina i totonu ole malumalu, e pei ona latou faaaogāina ai upu ole Tusi Paia 1Timoteo 4:6-7: “Aua o a‘u ua faamaligiina nei lo‘u toto, ua lata ona po ou te alu ai. Ua ou tau le taua lelei, ua iu ia te au le tausinioga, ua ou taofi ile faatuatua”

Faamasinoga Faaumiumi

O Kirita Pune e manatua e Samoa lona maliu, ona o ia ose tina sa aveina se mataupu i luma ole faamasinoga maualuga (Supreme Court) ile tausaga 2003, ole afioga ile fa’amasino sili o Samoa, Afioga a Tiavaasue Sapolu, sa seei ile suesueina ole mataupu ale tina.

E oo ile aso na maliu ai Kirita, aso 27 Aokuso, e leai se faaiuga aloaia ua tuuina mai ele Faamasino Sili ia Tiavaasue Sapolu. E 13 tausaga o faatali lenei tina mose faaiuga o lona faamasinoga, ae maliu lava o faatalitali pea ise iuga o lana mataupu.

E lua aso talu ona maliu si nei tina, ae faatoa momono ane ile Aso Gafua aso 29 Aokuso, ile lima o lana loia, o Leulua‘iali‘i Olinda Woodroffe e le teine ole ofisa ole Supreme Court a Samoa le faaiuga ale Faamasino Sili.

Ole tagi ale tina lenei sa i luma ole faamasinoga ile 2003, e faasaga lea i lona tuagane, ua maliu foi.

O lona tuagane ose alii faipisinisi ma sa avea foi ma faipule ole Palemene.

Na afua le tagi ina ua malaga atu Kirita i Samoa, ua mae‘a ona faasaini e lona tuagane ma lana loia, ia lona tamā matua ua 91 tausaga le matua, e liliu uma ai fanua e lua o matua o Kirita oloo i Togafuafua ma Lotopa i lona tuagane. Ole tuaa o Kirita ua i lea taimi, ua matua, ua po lana vaai ua faaletonu foi lona mafaufau.

E oo mai ile 2014, oloo faatali pea se iuga ole mataupu mai le Faamasinoga, peitai, ua ave faamalosi ele Samoan Brewries le fanua o mātua o Kirita lea sa i Togafuafua, ole mafuaaga lea na sui ai loa le loia a Kirita ia Olinda Woodroffe.

Na amata mai lava ile 2014 ona finau Olinda ile Faamasino Sili, ile lē talafeagai ole faatali umi o si nei tina ise iuga o lana mataupu. Na faailoa foi e Olinda ile Faamasino Sili, ole tina ua lē o tutusa foi lona malosi. Ole mea amiotonu ole aumai ose iuga manino ale faamasinoga, a‘o maua pea e Kerita le malosi.

Maimau e, pe ana maua mai le iuga ole mataupu o soifua si tina, se‘i molimau ile taui o lona tautiga ma lana finauga faaumiumi sa faia i luma ole faamasinoga.

O lea ua aumai le tali ole mataupu e pei ona tauaaoina le faaiuga ale Faamasino Sili ile aso 29 o Aokuso 2016, a ua lua ai lea o aso talu ona maliu Kirita.

Ua ioeina ele Faamasino Sili mau na tuuina atu e Kolotita male toalua o lona tuagane sa o la tutū faatasi ile faamasinoga. Ae ua teena le gaioiga sa faia e lona tuagane ua maliu, e pei ona faasaini ai si o la tamā mātua i pepa o fanua e liliu ai i lona tuagane.

Ile taimi nei, ua maliu Kirita, ae ua faasee atu le mataupu i nai ona alo, latou te faaauauina pea ona faamae‘a le finauga sa faia e si o latou tina ua valaau iai le Atua.