E mafana le mafutaga a Autalavou i Taaloga

Ia taimua talavou o le Ekalesia Metotisi ma faataitaiga lelei mo tupulaga talavou o Samoa mo a taeao. O saunoaga ia na faamalosiau ai taitai poo sea o faasinoti e lua o le Ekalesia Metotisi i Aukilani i autalavou uma sa auai i taaloga sa faataunuuina i le faaiuga o le tausaga ua mavae faatasi ai ma le amataga o lenei tausaga.

Ua savali nei i le lua tausaga talu ona faaauauina taaloga i faasinoti e lua ina ua vaeluaina ona ua fai si toatele o aulotu. Ma o se auala faafaigofie foi lea i susuga i faafeagaiga ma o latou faletua i galuega faatino aua le agai i luma o le galuega a le Atua.

Taamilosaga Faasinoti Aukilani Matu

O le aso 28 ma le 29 o Tesema i le tausaga ua mavae na tumutumu ai le malae i Walker Park i Ekalesia e 11 o loo totonu o le faasinoti a Aukilani i Matu i le faagasoloina o taaloga e pei ona masani ai le Ekalesia Metotisi i tausaga taitasi.

O le aso muamua na tatala i le savali a autalavou ona saunoa lea o le afioga i le Sea o le faasinoti ia Oianatai Matale i upu timai ma upu faalaeiau mo autalavou uma a o lei amataina taaloga. Na saunoa le taitai e faapea, ia avea taaloga ma auala e mafana ai le mafutaga a autalavou uma, ma ia fealofani ma fetausiai.

E lua Pool na vaevaeina ai le faasinoti, o le Pool A, na auai le Ekalesia Metotisi mai Te Atatu, Aukilani, Otahuhu, Maugalaki, ma Blockhouse Bay, Pool B – Henderson, Kelston, Onehunga, Panmure, Mesiana ma Avondale.

O le aso muamua na faagasolo ai taaloga kirikiti i ‘au a alii ma tamaitai faapea ma taaloga voli i Pools taitasi, ae o le aso lona lua na faasolo ai loa suega siamupini.

O ni aso lagi lelei ma susulu manaia le la, ma o se vaaiga matagofie tele i ia aso le galulue faatasi o susuga i faafeagaiga ma o latou faletua faatasi ai ma fanau faaleagaga i le galuega a le Atua. Ma e taulamua foi faafeagaiga i le vaaiga lelei o taaloga faatasi ai ma le faagasoloina.

O le aso mulimuli na maitauina ai le tiotio o tagata uma o autalavou faatasi ai ma susuga i faafeagaiga o ‘au ua mafai ona sao mai i luga i le suega siamupini, lea sa ofi mai ai le ‘au malosi mai Te Atatu i le au kirikiti a alii ma tamaitai i le Pool A, ae o le ‘au a Henderson mai le Pool B i alii ma tamaitai o le kirikiti. O taaloga voli na manumalo ai Blockhouse Bay i ‘au a alii ae o Te Atatu i tamaitai, a o Panmure na suipi i ‘au a alii ma Kelston i tamaitai i le Pool B.

Na mataina le maimoa o ekalesia uma i le sailia o siamupini i auvoli i le va o Kelston ma Te Atatu ma iu ai le taaloga ua sola tamaitai Te Atatu ma le manumalo o lenei tausaga, a o le taaloga i le va o Panmure ma Blockhouse Bay i tama, o se taaloga faigata tele, ua vaaia ai faiaoga ma le autapuai ua feoai solo i autafa o le malae auā e uma seki e lua o loo taitasi malo, ma toe tasi le seki e iloa ai le ‘au malosi.

O se taaloga mataina ma le taufao ae sa iai lava le filemu ma le faautauta mai le Atua i susuga i faafeagaiga sa faafoeina le taaloga faatasi ai ma le mataalia i tulafono na mae‘a ai le taaloga ua uu e Panmure le siamupini o taaloga voli a alii.

O le sailia o le siamupini o kirikiti o le sini autu lea o taaloga, lea sa tau fai fao ai Henderson ma Te Atatu e saili poo ai e malosi, o le iuga o taaloga a tamaitai na manumalo ai Te Atatu, a o alii na taufao le taaloga auā e tutusa uma tagata taaalo, e oo foi i le autapuai ua le mau le toovae, ua galo ai ma le vevela o le la i le tau fai valaau i totonu e faamalosi i le au tata, a o le au talitua foi, na muamua pate Te Atatu ma maua ai latou ai e 66, 95 polo ae 15 le pe.

Na tuli ‘ai Henderson, ma sa tutusa ‘ai, uma polo, ae 17 le pe, o le iuga o le taaloga e tutusa. Ae sa tuu i le faaiuga a le komiti sa faafoeina taaloga ma auautasi ai e tuuina atu le manumalo ia Te Atatu auā e 15 latou pe sa maua, o se faaiuga sa fiafia uma i ai ‘au e lua, auā e taaalo lava tama o uso.

O le faaiuga o lenei faamoemoe na to laulauina ai loa togi mo ‘au ua manumalo i lenei taamilosaga, ma sa pepese aleluia ai le Ekalesia mai Te Atatu i siamupini e tolu, e ala lea i le auvoli ma le kirikiti a tamaitai faatasi ai ma le ‘au a alii, ae lē gata i lea, na agiagia ai foi le upu o le aotelega ia Te Atatu.

O Panmure na sola ma le siamupini o taaloga voli a alii. O le susuga le faafeagaiga ia Tapu Malo sa nafa ma le fofogaina o taaloga. Na taualuga le faamoemoe i le saunoaga a le afioga le Sea o le faasinoti ia Oianatai Matale, lea sa tutulu ai ma momoli lona agaga faafetai i susuga i faafeagaiga uma ma o latou faletua faapea le komiti sa faafoeina taaloga.

Sa momoli foi le faafetai i autalavou taitasi e tusa ai ma le taaalo faatausala ma le loto fiafia ina ua iu aso e lua o le faamoemoe ae leai se vevesi poo se faalavelave na tulai mai. Na ia toe faamanatu i ekalesia le sini autu o taaloga i autalavou, ia maua le fealofani, ia fealolofaai ma fetausiai, o se oso lelei foi lea mo le tausaga fou 2016, ma faaiu ai loa i le tatalo ma tapunia aloaia ai loa taaloga a le Faasinoti i Aukilani i Matu.

O faailoga o lenei taamilosaga na saunia e le ekalesia i Henderson le talita o le aukirikiti a alii, o le pule o autalavou le susuga le faafeagaiga ia Ioane Leilua na tapenaina le ipu o le aukirikiti a tamaitai, o Kelston na saunia le ipu o le voli a teine ma Panmure na tapenaina le ipu o le auvoli a alii, ma le ipu o le aotelega na saunia e le ekalesia Otahuhu.

Taamilosaga Faasinoti Aukilani Saute

O le aso 4 ma le aso 5 o le masina lenei na felanulanuai ai togiga eseese o autalavou e 12 o le sinoti a Aukilani i Saute i le malae i Otara i le faataunuuina lea o taaloga e pei ona masani ai le sinoti i tausaga taitasi.  E matagofie tele lenei faatasiga auā ua maua ai le avanoa e feiloai ma faamanuia ai le tausaga fou i le aufaigaluega totofi a le Atua faatasi ai ma tagata lolotu, ae ua militino faatasi ai tagata uma mai lava i tagata matutua seia oo lava i fanauiti.

O lenei faamoemoe na tatala i le solo a autalavou taitasi faatasi ai ma le sauniga lotu lea sa taitai e le afioga i le Sea o le sinoti ia Masunu Utumapu, ma tatala aloaia ai loa le faagasoloina o taaloga.

E lua Pool na vaevaeina i ai aulotu, o le Pool A, na aofia ai aulotu tetele e pei o Otara, Manukau, Papatoe, Middlemore, Manurewa ma Magele, ae o le Pool B sa iai Flat Bush, Botany, Hamilton, Tekuwiti, Papakura ma Weymouth.

O le Pool A e 20 tagata kirikiti i le ‘au, a o le Pool B, e 15 le autaaalo. O se vaaiga ma se faataitaiga lelei tele na maitauina i ia aso e lua i le taulamua ma le mataalia o susuga i faafeagaiga ma o latou faletua i le taitaiina ma le faafoeina o taaloga, ae lē gata i lea ua tuu lava o latou mamalu faalegaluega ae ua migoi faatasi ma tupulaga talavou ina ia lagona ai pea e fanau le fatu o loo i loto o le aufaigaluega o le fealofani, fealolofaai ma le fetausiai, auā o le sini autu lea ma le faamoemoe maualuga o lenei faamoemoe.

O le aso muamua na faagasolo ai le taamilosaga kirikiti i Pools taitasi lea sa sao mai ai le ‘au malosi mai Otara i le Pool A e leai se faiaina, faatasi ai ma le aukirikiti a tamaitai mai Magele e leai foi se faiaina, ae o le Pool B na tutusa ai Flat Bush ma Weymouth e taitasi faiaina ae ofi mai ai le aukirikiti a tamaitai a Botany e leai se faiaina.

O le aso lona lua o lenei faamoemoe na faagasolo ai loa taaloga voli i alii faapea foi ma ‘au a tamaitai, o se aso faigata tele auā ua tele ‘au o loo saili agai i ai le siumupini o taaloga. Sa leai se malae voli na avanoa auā sa taufai migoi uma ‘au a alii ma tamaitai i le taimi e tasi.

O taamilosaga voli i le Pool A a alii na sue siamupini ai Manukau ma Manurewa ma manumalo ai Manukau, a o tamaitai na siamupini ai Otara e 5 malo e leai se faiaina.

O taaloga kirikiti na suipi ai foi le ‘au malosi mai Otara e leai se faiaina i le taamilosaga.

O le Pool B na manumalo ai Botany i alii e leai se faiaina ma Hamilton na pepese i lalo ma le siamupini a tamaitai e leai se faiaina.

O aukirikiti a alii na sue siamupini ai Weymouth ma Flat Bush, o se taaloga finau ma le faigata ma sa faaalia ai foi le laufofoga fiafia o tagata uma e lē gata i tagata taaalo ae o le autapuai, ma o le iuga o lenei taaloga mataina na manumalo ai Flat Bush ia Weymouth, ma ua nofo nei ia Flat Bush le ipu o le taamilosaga kirikiti o le Pool B i lenei tausaga.

O le susuga ia Sam Taituave mai Otara ua ia mauaina le ipu o le kapeteni mataalia, faatasi ai ma le mulumu silia ua mauaina lea e Lemoa Sevesi mai Otara, ma le ‘olo silia ua maua e Telea o Weymouth.

O le susuga ia Talifaaifo Mataafa Luapule Taupau o le peresetene lea o le autalavou mai Otara sa fesoasoani i le tapenaina o lana autalavou i lenei faamoemoe.

Na faaiu lenei taamilosaga i le toe pepese fiafia o ekalesia uma sa auai e sii le viiga ma le faafetai i le Atua ina ua iu ma le manuia taaloga sa nafa ma le sinoti i Aukilani i Saute, faatasi ai ma le saunoaga faafetai a le afioga i le Sea ia Masunu Utumapu i aulotu taitasi faapea susuga i faafeagaiga ma o latou faletua e tusa ai ma le taaalo tausaafia ma le loto fiafia ua iu ai ma le manuia taaloga ae o le viiga sili lea i le Atua.