Na taulimaina ele Loia Sili ale Malo le afioga Lemalu Herman Retzlaff, le faila o suesuega a leoleo ile tagi ole faaoolima ma le faaoomanu’a faasaga ile afioga ile Peresetene o Faamasinoga o Fanua ma Suafa, Fepuleai Attila Ropati. Ole leoleopo ole Matagaluega o Faamasinoga ua ia faaulu le tagi ona ose gaioiga ua tuua’ia ai le Peresetene i lona umia ose atigifagu pia na ia tāina ai le ao poo le ulu ole leoleopo.
Na faailoa ele sooupu ole Matagaluega o Leoleo le susuga Aupaau Logoitino Filipo, ile tusitala ole Samoa Times ua lē faia e leoleo le faaiuga pe ua lava molimau e faia ai ni moliaga ae ua ave ile Loia Sili ona o lē oloo faasaga iai le tagi ose tagata ofisa sinia ole Malo. Mo le silafia ole Peresetene o Faamasinoga o Fanua ma Suafa ose faamasino nate suesueina mataupu e faato’ai ile Faamasinoga o Fanua ma Suafa aemaise lava i talosaga e toe apili ai ni faaiuga a lea faamasinoga.
Ole mae’a ai ona silasila ole Loia Sili ile faila, na ia fautuaina ai le matagaluega o leoleo ina ia faaulu ni moliaga se lua faasaga ile Peresetene ole Faamasinoga o Fanua ma Suafa. Ole moliaga ole faaoomanu’a ma le umia ose aupega matautia ole a molia ai le Peresetene. Na faamaonia mai lea ele Sooupu ole Matagaluega a leoleo, Auapaau Logoitino Filipo e faapea, e to’alima molimau a leoleo ole a lagolagoina moliaga ole faaoomanu’a ma le umia ose aupega matautia faasaga ia Fepuleai.
Ole fiafia faaiu poo se pati a alii ma tamaitai faamasino ole faamasinoga a’o lei mae’a galuega ole tausaga ua mavae 2017, na tupu ai le gaioiga ua tuua’ia ai le Peresetene. Na faailoa e se molimau faatuatuaina, ole fiafia lea na inu ai ma le leoleopo, ma ole mafuaaga lea na lē fiafia ai le Peresetene ma ia faia ai le gaioiga ua tuua’ia ai ele leoleopo.
E lei faia se tagi i leoleo ile taimi na tupu ai le gaioiga peitai na ta’ua e se tasi o molimau e lei faamaonia, na faatoa iloa ele alo tamaitai ole leoleopo le manu’a ile ao o lona tamā ma faapena ona auina atu ai ile falemai. Na siaki e fomai le manu’a ma vaaia ai ni atigifagu ninii ile manu’a, ma faapea ai lona ona logo leoleo.
Ole fesootai atu ile pulega ole matagaluega o faamasinoga mo se faamatalaga e lei manuia ae ose isi o lipoti oloo faaalia ai ele Pule Sili ole Matagaluega, le susuga Papalii John Taimalelagi, e leai sona silafia ile mataupu ona e tupu le gaioiga ua tuua’ia ai nei le Peresetene oloo toesea mo nisi o tiute tau ile galuega.
E lei faamautuina mai se aso ole a valaauina moliaga faasaga ile alii Peresetene ole Faamasinoga o Fanua ma Suafa.
