O le faalapotopotoga muamua lenei i Samoa e fai a latou viiga, ma ta’uta’u le lelei o le Atua, o lona alofa ma galuega alofa, ae le’o se lotu pei ona molimauina, ile faatinoga o sauniga lotu masani e faia e le tele o faalapotopotoga lotu poo ekalesia i Samoa.
Peita’i o totino o galuega faamisionare, o tagata Kerisiano lea ua faavae lo latou maota tele e faia iai sauniga mo le lelei o tagata uma o mana’omia.
O le Aso Sa na te’a nei na faapa’ia ai le malumalu tele ua latou fausia, e igoa o le Open Handed mo sauniga e fesoasoani ai i tagata i totonu o Nuu fou.
O le faamoemoe e faia ai sauniga eseese mo le lelei o tagata lautele, e aofia ai ma sauniga lotu. I totonu o Nuu, e leai sana pulega faamatai ona o le tele o aiga o loo nonofo ai, o fanua umia sa’oloto, e pule lava le aiga ia ile leo ole latou leitio ma le musika, e pule foi le aiga, pe auai atu ini lotu pe leai. “aua e leai sana pulega faamatai.”
Na faailoa mai ole mafuaaga tonu lava lea ole manatu o le faafeagaiga ia Sabath Ponafala ma lona faletua ia Pastor Ruby, e faatu ai lea maota i totonu o Nuu, ile lotolotoi o amioaga eseese ma talitonuga su’ifefiloi.
E uma ane le maota ua silia ma le selau afe lona tau, na faatupe lava i mealofa mai le agaga o le fia faia ose mea lelei mo tagata nuu o Samoa o mana’omia le fesoasoani.
Ae o loo taitaia e Pastor Sabath Ponafala ma Pastor Ruby Misa Sabbath, lea e nonofo mau ai ma o la alo ile fanua. E faataalaelae lava e leai se pa puipui, ona o le agaga ina ia sa’oloto le o atu o tagata e fia maua fesoasoani.
O ananafi lea na faato’a faia ai le sauniga lotu muamua i lea maota, ma faatumulia ai i totino o le faalapotopotoga ua ta’ua ao le Aao Mafola, poo le OPEN HANDED Community Center.
E agavaa iai aiga lalata atu iai i taimi o aafiaga faalenatura i suiga o le tau, poo taimi o afa.
I le molimau a le failauga ia Ruby, “O loo galulue faatasi male komiti a tina ua faaigoa o le Pupula. O le Komiti a le Pupula lea na amata e le tina ia Mara Filiki ua 57 tausaga o lona soifua, ae na maliu i le tusa o le masina talu ai. O Mara o le tasi o poutu o le faavaeina o lenei maota. Sa ia taulamua ile faatuina o le Pupula ma sa fesoasoani malosi ile fausiaina o le maota e ala ia latou tatalo ma fesoasoani tupe.
Na saunoa faafetai le failauga, Susuga Sabath ma le faletua le failauga ia Ruby, I le atunuu na auai atu iai, ae o le aufaipisinsi, ma faifeau mai ekalesia esese I le atunuu na o latou lagolago I le galeuga.
“O le faalapotopotoga lenei a le Lima Mafola, e na’o le tasi lava lo latou ituaiga i Samoa, e fai viiga o le Atua ma mulimuli i aoaoga a le Tusi Paia.”
Ua tatala foi lenei maota tele, mo soo se sauniga e faatino ai e aunoa ma se totogi, pei o faaipoipoga, ma fonotaga.
Na talanoa foi le failauga le faletua ia Ruby, oi la’ua ma lona to’alua e tofu ma le galuega, e tau atinae ai le galuega lenei ma fesoasoani ai i tupulaga o maua i faafitauli ma aiga o fia maua fesoasoani.
Usitaia e le OPEN handed le totogi o lafoga ile malo
Ile talanoa a Pastor Ruby, o ia ma lona to’alua o loo taumafai e atina’e le galuega. O tupe o maua mai a la galuega o aso uma, o la totogi mai falefaigaluega, o loo fesoasoani ai i tagata ma le galuega.
Ae o le latou faalapotopotoga, e pule lava le tagata.
O aoaoga a le Tusi Paia, i lana faamatalaga e lua ituaiga o tupe maua. O le sefulua’i ma le ofo alofa atu. O tupe na e leai ma se faamalosia o se tagata e faatino.
Peita’i o le malamalama lelei o le tagata ile mafuaaga o le sefulua’i ma alofa, e tuu ai lava i lona ia loto fuatia ifo.
Peita’i o le mataupu tau ile tulafono a le malo faatatau ile totogi e faifeau o lafoga poo tax, e latou te usitaia le tulafono a le malo, pe afai e maua atu ni tupe mo lena faamoemoe.
Aua o le taimi nei, o le faitalia lava ole tagata e faia ai lana sefulua’i, o le faitalia foi o le tagata e faia ai lana mealofa, ae o la’ua ma lona to’alua o loo faatupeina le galuega a le Atua.
I le sauniga o le faapaiaina o le malu, na saunoa ai le tamaitai pule o le SABB, Tofilau Fiti Leung Wai e folafola lesi a latou mealofa, o nofoa e 100. O le agaga lava o le faafetai na faafo’i i faifeau ma o latou faletua, ae o le aufaipisini i fesoasoani e tele mose manuia lautele.
Ua tatala atu ai foi le avanoa i faalapotopotoga, pei o le Koluse Mumu, Toomaga mo e Puapuagatia, Faataua le Ola, ma isi vaega o galulue mo le soifua lelei o tagata, e latou te faaaogaina le maota o le Aao mafola, e aunoa ma se totogi. “Peita’I, e matua’i faasaina lava ona faia ai ni Bingo.”
