E lele le toloa ae maau lava ile vai

 O sui ole mafutaga a Samusu Aleipata
O sui ole mafutaga a Samusu Aleipata

“E māmā se avega pe a pulupululima ma galulue faatasi. Poo ā mauga maualuluga ma vanu tetele ae a tasi le loto, e mafai lava ona ā‘ea ma soloia mea faigata.”

Ole talitonuga maumaututu lea o nisi o toa ole alalafaga o Samusu ma Amaile ma nisi oloo faavaeina le mafutaga i Brisbane. Fai mai nisi, ole manaia o lenei mafutaga ona ole toe feiloai ai lea ma i latou na soifua faatasi a‘e i nuu ma aiga i Samoa auā, a leai mafutaga faapea e lē taitai ona feiloai se‘i vagana ai taulaga faatau ma lotu.

Ua pei ose aiga e tasi, ua tele ina tulimatai le toatele e talatalanoa ma eva ai e faagalo ai le mafatia i galuega ole vaiaso.

Ole auga ma le faamoemoe na tālo ai se feiloaiga ile uluai taimi mai le aso 7 o Fepuari 2016, na a‘e ai se tofa i nisi o alo ma tamafanau faapea paolo ma gafa, ona ole fia fesoasoani lea ile malumalu Katoliko i Samusu oloo ua galueaina nei.

Ole masina o Setema na malaga mai le afioga ia Patele Fereti Tautunu mai Samoa, ma faatoa faaoo mai ai le tusi na tauaaoina ma tuuina aloaia atu ile mafutaga ae ua leva na amata le mafutaga ma faaaopoopo a latou seleni. E faia fono tai masina ma fai lafoga, ae ole uluai taimi lenei faatoa fai ai se tausala a matāfale e iva ole mafutaga. E lei valaauina ni uo na ole mafutaga lava se‘i vaganā ai ē na alolofa ane na maua ai le seleni e $12,300.

Ile mae‘a ai ole tausala ile Aso Toonai ua tuanai na tuufaatasia ai se seleni ale Mafutaga a Samusu ua oo atu ile luasefululima afe ma ona tupu tala Ausetalia. Ua faamoemoe ose vaitaimi ole tausaga fou 2017 e faaulufale ai le malumalu ma tuuina atu loa se seleni i Samoa ae oloo faagasolo pea sailiga seleni seia oo atu ile tausaga fou.

Ole seleni na maua ile tausala e aofia ai le ma‘au ole Mafutaga faapea le fesoasoani ale Divine Mercy a St Paul faapea ē sa agalelei ma ulufia agaga ile alofa. Na tatalaina le tausala ele afioga ile taitaifono, le tofa ia Tavai Tavai, ae taualuga ele afioga ia Mua (Tina Amoa Taefu Patea Taefu).

Ole fofoga ole aso ole tofa ia Seiuli Pesa Ilimaleota, ae ole tofa ia Seiuli Fiu Vaigafā o ia sa fai ma sui ole Mafutaga e molimoli le agaga faafetai ile paia o Samoa sa auai.

Sa fetalai Sauafu ole sui taitai ole Divine Mercy a Woodridge e faafetaia le mafutaga ona o faaaloaloga masani. Ole faaosofia ole agaga fia saasaa ma le foai ona ole mālie ole musika lea sa faafoeina ele tofa ia Timu Fenunuti. Na faaiu le faamoemoe ile tausamaaga tele na tapenaina lava ele paia i matafale e 9 ole mafutaga a Samusu i Brisbane.

Taitaifono – Tavai Tavai; Sui Taitaifono – Seiuli Pesa Ilimaleota; Teutupe – Elisapeta Tupuola Green; Failautusi – Tiresa Malamala.

Ole faaaliga mai le Mafutaga a Samusu, afai o oe ose Isaraelu moni ae e fia mafuta mai, oloo matala pea le faitotoa e afifio ma tala mai aao tatou nuti mea faatasi ise sao auā le galuega ale Atua, ae sili ai na fia maua se tatou mafutaga faatasi.

Ole aso 26 o Novema ole a usuia ai le isi fonotaga ale mafutaga ae mo fesootaiga uma oloo faafesootai le failautusi ia Tiresa Malamala ile telefoni 0434 570 123.