O le afioga i le faipule poo le faletua ia Faimalotoa Kika Stowers ua 66 tausaga le matua o lona soifua, na ia faaauauina le tofi faipule o le itumalo o Gagaifomauga Numera 1 ina ua tuumalo se tasi o lona aiga o lē na tauaveina mai le tofi o le itumalo, le afioga Tuilo‘a Anetelea. E tasi le tausaga ma masina na faaauauina ai lea nofoaiga seia oo ina mae‘a le lima tausaga o le paeaiga.
O le soifua aoaoina o lea tina, na amata mai i le aoga tulagalua a St Marys seia faaiu lava lana aoga i le kolisi o St Marys. Na amata galue i le ofisa o faasalalauga i Samoa i vaega eseese o le matagaluega i le tele o tausaga, seia oo lava ina faaeaina lana tautua ma oo ai i le tumutumuga, o le avea ai ma Faatonu Sili o le Ofisa o Faasalalauga i totonu o le atunuu i le valu ma le ‘afa tausaga.
O lana konekarate mulimuli i totonu o lenei galuega na ia faamavae ai loa, ona ua ausage lona aiga, auā ua tele ina malaga le fanau i atunuu i fafo mo galuega, auā o lona foi lea naunautaiga ia aua ne‘i vaoia lana fanau ae tuu atu e faataunuu galuega sa aooga ai.
E 38 tausaga o tautua pea lenei tina i totonu o le Ofisa o Faasalalauga a Samoa le 2AP. O Faimalotoa Kika Stowes e fiafia tele e tautua ma auai i mea e fai i totonu o lana ekalesia Katoliko i Safotu, lea sa taitaifono ai i nisi o mafutaga i totonu o le matagaluega, auai i faalapotopotoga a tina ma tamaitai, o nisi foi o taimi na taitaifono ai i komiti o aoga a le Ekalesia.
O le amataga o lona soifuaga, na soifua ma ola ane i totonu o Safotu i le nuu o lona tina, ae o lona tama o le afakasi i le au Stowers. Ma o le mafuaaga foi lea o le galue ma nanau lona loto i lona nuu ma lona itumalo auā e lē mafai ona galo lona tupuaga ma lona faasinomaga e tautua ai.
O le tofi ma le valaauina e mai le Atua, auā o le tele o tausaga a o galue lenei tina i le tofi Faatonu Sili o faasalalauga, sa tele ai ina auai i totonu o le Maota Fono a le Palemene i tausaga taitasi e tusitusia faamaumauga o le fono mo le Minisita o faasalalauga.
A o ia galue ai i lea galuega, sa lilo i ona manatu e iai le aso ma le taimi e nofo ai i totonu o le nofoa o faipule a le Palemene. Sa mamao lona lagona i lea vaega, ae peitai ina ua tofia o ia, sa pupula ai ona mata ma lona mafaufau i le tele ma le anoanoai o galuega e tatau ona fesoasoani ai i lona itumalo ma lona nuu i Safotu.
O Gagaifomauga Numera 1, ua leva ona iai se moemitiga mo se malae lakapi, ma sa lē nofoai ai i lona tu‘itu‘i atu i le Palemene ma le Minisita faapea ma faatonusili, ma tu‘itu‘i solo i le mea e maua ai le fesoasoani auā e tele tupulaga o le itumalo e fiafia i lea taaloga, aua o le tasi lea taleni o loo tele ina maua ai seleni mo aiga pe a lelei lona atinaeina.
Ua foai e le Ekalesia Katoliko le 6 eka o le fanua i Safotu e sua ai le malae lakapi mo alo ma tamafanau uma o le itumalo, lea e lē o toe mamao ona mae‘a lea o lona teuina. Ua mae‘a faatinoina foi le auala galue mai totonu o Safotu e faafesagai ma le falemai e oo atu i Paia, ma o se galuega tele foi lea sa faatinoina, ma ua iai le fuafuaga o le a toso ai le eletise ma le vai auā e toatele tagata o le a nofoia ma galueaina le eleele o loo iai.
O le tolotolo i le va o Manase ma Safotu, o se auala e vaapiapi e faigata ona fepasia‘i ai taavale, ma ua tele ina lavevea ai foi tagata auā e sosoo lava ma le sami, ae o se tasi lea galuega ua mae‘a ona faalautele ma faataligalu.
O nisi o galuega fesoasoani e lē o toe mamao ona faatinoina lea, o le faia o taligalu i Manase, e puipui ai le tafia o le oneone manaia ma le palapala ua leaga ai fale, ma Beach fale faapea le afioaga o Manase aemaise o tagata tafafao mai fafo.
Auā o Manase o le nuu e fiafia i ai turisi mai fafo e tele ina faananau i ai i le matagofie o lona oneone paepae ma le mamā manaia faapea le mālū o lona ea. Ua mae‘a ona faasalalau ma tala tofi o tauofoga a kamupani latou te faatinoina lea galuega tele i le Beach Fale i Manase.
O nisi o vaega na silasila mamao i ai le afioga i le faipule i lenei taimi puupuu o lana nofoaiga, o le faia lea o se Broadband i totonu o lona itumalo, e lē o toe mamao se taimi ona faataunuuina lea, ma e faaalia ai lona agaga faafetai tele i le kamupani a le BlueSky i le tuu atu o lo latou tau‘au e galulue faatasi ai i le faatinoina o lea faamoemoe i lalo o le matagaluega o fesootaiga.
O le anavatau a le afioga i le faipule mo lea polokalame, a mae‘a lona faatinoina, o le a manuia ai le lautele o lona itumalo ma fesoasoani i alo ma fanau e ala ia latou meaaoga, lea e mafai ona fesootai i luga o le broadband ma internet i fesootaiga televavave e faatino ai a latou meaaoga.
Ae lē gata i lea, o fesootaiga televavave mo falemai, auā o Safotu o loo iai le falemai o loo taulai uma mai i ai itumalo e tolu, o Gagaifomauga Numera 1, Gagaifomauga Numera 2 ma Gagaifomauga Numera 3.
Auā e iai taimi e iai faalavelave faafuasei aemaise o ni fesoasoani vavave mo gasegase, ona faaaogā ai lea o auala televavae lea ua faaaogāina e atunuu i fafo o le skype. O le a mafai foi e lea auaunaga ona faatosina atu le tele o tagata faipisinisi e faatino a latou pisinisi i totonu o le itumalo, ina ia mafai ona atiae ma feololo ai le siitia o mea o loo moomia ona o le fesoasoani o pisinisi nei mo tagata o le itumalo i Savaii.
Ua mafai foi ona faamāmā avega pisinisi a nisi o le fanau e ala i le Pacific Ezy Money Transfer i tagata o lea itu i tupe e lafo atu i latou aiga i fafo, lea ua mafai ona faatuina i Fagamalo, ma o se fiafiaga tele foi i tagata e tala a latou tupe ua latalata ma faigofie feoaiga. Ma ua iai le famoemoe o le faipule e tatau ona oo atu i le masina fou ia Mati ua faataunuuina le Broadband i lona itumalo ma ua faigofie ai loa mea uma.
Ae o nisi manulauti o loo silasila i ai le afioga i le sui faiupule pe a toe tulai mai i le nofoa o lona tumalo, o le toe taumafai lea i se pa e sio ai le malae lakapi faatasi ai ma ni fale e maimoa ai tagata i le la ma timuga, aemaise ai o ni falelēta‘ua (tulou) e faaaogā e tagata.
Ua iai foi se vaaiga e faaleleia taligalu o Safotu mai le tuaoi o Manase seia paia le Vaisafee, auā ua maitauina ua latalata atu i uta le sami toeitiiti lava a oo atu i tua o maota ma laoa o aiga, auāa e tatau ona puipuia lelei le soifua saogalemu o tagata o le itumalo.
O le faalupega o tina, o le pae ma le auli, e faamafolafola mea uma, auā e ese lava le vaai a tamā e ese foi le silasila a le tina. O le itumalo e tolu komiti o loo iai, o loo ia taumafai ai e saili ni mea e fesoasoani ai i tina, e pei o le auina atu o nisi o loo iai le tomai e suisui ma iloa kuka e faatinoina ni polokalame, mo galuega faapenei ina ia mafai ai e tina o le itumalo ona fai le suisui ma kuka e maua ai tupe e fesoasoani mo aiga.
I le saunoaga a le faipule, a lelei ona faaaogā eleele, lelei ona aoaoina vaega eseese aemaise foi o le autalavou ma atoatoa lona atinaeina, ona leai lea o se mativa poo se fia‘ai. Auā a matavalea ai le faipule i nai vaega ia, o le a leai foi se mea a le itumalo e faatinoina.
O le tele o fesootaiga i Savaii aemaise o le itumalo, e ala i leitio ma tv ina ia manino i le silasila ma le faafofogaaga a tagata, ua uma ona ia fofogaina i totonu o le Palemene ae pau lea o le vaega a mae‘a ona fai i le itumalo, o le Broaband ona iai lea o lona talitonuga ua faigofie mea uma tau fesootaiga.
Ma o se fiafiaga foi ia Faimalo Kika Stowers i nei tausaga e tele sa galue ai i totonu o le ofisa o faasalalauga, ua malamalama ai i vaega uma e tatau ona faaleleia, ma ua faigofie ai foi i lona ofi atu i totonu o le Palemene ma finauina ia mataupu mo le lelei o tagata i le itumalo, aemaise o lona galue ai i le tulaga o le Minisita lagolago o Faasalalauga, i le tasi le tausaga ma masina o lana nofoaiga.
Ua tele galuega ua mae‘a ona faatino i lenei taimi puupuu, ma isi o galuega ua lata ina faamae‘a, ma ua taunuu ai le upu, ‘e lē o upu a o galuega ia tino mai.’ Ua toe sauni atu foi le faipule e toe finauina le tofi o lona itumalo o Gagaemauga Numera 1 ina ia mafai ona faataunuuina mea uma o loo ia naunau i ai mo le manuia o tagata lautele.
