Ole fale lenei ose tasi o aiga ole afioaga o Satapuala na faatama’ia uma ele malaia poo le afi ile aoauli ole Aso Toonai na tea nei, na vave ai ona salalau faamatalaga e faapea ua susunu ele afioaga o Satapuala lea fale. Peitai ose tala na matuā teena ele pulenuu ole afioaga, o ia foi ole Tuua o Satapuala, le tofa ia Vaili Mimita.
Ile feiloaiga ale Talanoa Mai Samoa ma le tofa a Vaili ile afiafi ole Aso Toonai pe tusa ole tea ole 6, na saunoa ai Vaili, ole aiga lenei na fono faatopetope ai le afioaga ile taeao ole Aso Toonai ma tuuina atu iai se faasalaga e $20 000.00, ae ia ta ane le 4pm ua tatau ona faataunuu le faasalaga, afai ae ta le 4pm e lei faia le sala ona mu loa lea ole foaga pe ole a susunu uma meatotino ale aiga.
Ta’ua e Vaili na toe logo atu le afioaga e faapea e leai se sala e faatinoina ae ia faataunuu pea le finagalo ole afioaga. A’o fono le afioaga na fautuaina ai ele Sa’oalii ia To’alepai le finagalo ole nuu ina ia toe liuliu le faaiuga. Ose manatu foi na ta’ua e Vaili na ia matuā talisapaia ma lagolagoina ele afioaga ona ole manatu ile lumanai ma le tulafono oloo taatia mai.
E talitonu foi Vaili ole finagalo na muamua laga ele afioaga e mu ai le foaga ile taeao, ose manatu na faatupu mai i luga ole ita ona ole faafitauli na tulai mai ile maua ai o laau faasāina ole maruana faatasi ai ma le masalomia o lea aiga ile maliu ai ose tasi o alii talavou ole afioaga. Peitai ole fesoasoani ole Agaga Paia ole Atua na toe musuia ai taitai ole afioaga lea na mafai ai ona toe suia le faaiuga e aua ne’i mu le foaga ae ia tu ai le tootoo ole afioaga ma soloa ai ma le au fuefue.
Na tasi le finagalo ole afioga ma agai loa i uta e faataunuu le finagalo peitai e taunuu atu le afioaga ua uma le malaia, pe ua mu uma le fale ole aiga, na faataunuu lava le finagalo o Satapuala ile tu ai ole tootoo, ma ose finagalo na talia ele aiga ina ua saunoa ai se tasi o matai o Tapuala Siaosi, ua manatu lo latou aiga ina ia faasee i tua ae faatino ma faaaloalogia foi le finagalo ole afioaga atonu e toe oso malama ona toe tapena mai lea ile lumanai o lo latou aiga e tautua ai ile nuu.
Na ioeina foi e Tapuala Siaosi, e lei susunuina ele afioaga lo latou fale. Saunoa Siaosi, na fai le talanoaga a lo latou aiga ile isi fale e tau mamao ese mai ae vaai mai ua sasao ane i luga le afi ma faatama’ia uma ai le latou fale, na o latou vili loa leoleo ma le tineimu mo se fesoasoani.
E oo mai ile taimi nei e lē o mautinoa lava poo ai tonu na faatupuina lea malaia, ae ile faamatalaga a Tapuala Siaosi, ose tasi o tamaititi ole latou aiga na ia molimauina se taulealea na ia faapenisini ma susunu uma le fale osi ona tina.
Na lototele lava Siaosi ma ia faapea mai ua tuu atu ile Atua e nate faamasinoina poo ai tonu na faia lea gaioiga.
E pei ona silafia ole mataupu lenei na amata ona alia’e i luga ina ua tau sailia ai se tasi o alii talavou mai i lona aiga i Satapuala ile amataga ole vaiaso na tea nei. Na faatoa maua le tino maliu o lea talavou ia Uili Uili ile taeao ole Aso Faraile 12 o Ianuari.
Ole sailiga a leoleo i Satapuala na maua ai ma ni laau maruana ile aiga lea na masalomia lea foi na mafua ai ona tu ai le tootoo ole afioaga. Ile taimi nei ua taofia ai nei e leoleo nisi mai ile afioaga oloo masalomia ile maliu ai ole susuga ia Uili Uili faatasi ai ma i latou ua taofia ona ole maua ai o laau maruana ma ni aupega faasāina ole fana.
Ta’ua e Vaili Mimita, ua mae’a ona faatino le galuega ale afioaga auā le nofo filemu ole nuu ae ua taatia atu ile tulafono e faagasolo ai a latou suesuega i lea mataupu. I ata ole fale na faatama’ia ele afi na molimauina ai le malala uma o meatotino sa iai i totonu e leai se meatotino na faasaoina. Ole aso 27 ole masina lenei o Ianuari ua faamoemoe e faataunuuina ai le isi fonotaga ale afioaga o Satapuala.
