“E lei muta le aoaiga ina ua avea ma Siamupini”…Sala Parker

Se vaaiga masani ia Laauli ma lona tina pe a alu ese mai ma le maea fusu - Photo : Sala Parker Facebook
Se vaaiga masani ia Laauli ma lona tina pe a alu ese mai ma le maea fusu – Photo : Sala Parker Facebook

“Ole viiga ma le faafetai ile Atua e lē faaitiitia lea, ona ua faataunuuina ma le manuia le taaloga sa alo atu iai le afioga ia Laauli Joseph Parker ose atalii ia i ma’ua ae ose atalii foi ile mamalu ole atunuu o Samoa ma Niu Sila nei,” ole saunoaga manino lea ale afioga ile faletua ia Sala le tuaa o Laauli ina ua taunuu manuia i laufanua o Aoteroa le faigamalaga e pei ona toesea ai i taaloga ale alo ole atunuu.

Saunoa Sala, “Ile lua vaiaso ma aso sa auai atu ai i Peretania i tapenaga ole taaloga a Laauli, sa lagona lava le fiafia ma le mafanafana ole loto auā o lea sa iloa oloo tapuaia ma nofo tatalo atu atunuu e lua ile faagatama ale atalii, ua lē gata i Samoa ma Niu Sila ae faapea foi i nisi o atunuu ole lalolagi sa iloa lo latou tapuaiga ile taaloga. Sa iai foi le faamoemoe, o lea lava le tulaga e oo iai le taaloga, e talia ma le agaga fiafia ole loto, auā o lea sa taufai nofo tatalo uma tagata.”

Ile saunoaga ale faletua, a’o iai  tapenapena ole taaloga a Laauli i Peretania, sa lē misi le auai atu i taimi o ana toleniga, se’i matamata ma vaavaai i ana sauniuniga, ae sa lē mafai foi ona laua faalavelave ini mea i lona mafaufau, pau le mea sa laua faia na’o le faamalo lava ile atalii ile lototele ma le onosai, ma faufautua iai, ia vaai faalelei ma ia mafaufau lelei ina ia aua ne’i lavea.

Auā ole malo ia ma le faia’ina ole mea lena mai luga, auā ua silafia e le Atua le tagata sa tapenapena lelei ile taaloga. Lagona foi e le faletua le iuga ole taaloga atonu e lē ole taimi lenei, auā ua maua foi fautuaga mai nisi ole mamalu ole atunuu, ile iuga ole faamoemoe ole atalii e toe oso foi le la.

Ole tagata e iloa ona taalo ile taaloga e iloa malo e iloa foi faia’ina. Pau le agaga fiafia ia i laua mātua, na mae’a le taaloga e lei afaina le atalii, se’i vagana lona fofoga (mata) lea sa aafia ile tulilima o Anthony Joshua. Na laua iloa lelei foi na mae’a le taaloga ae na avatu foi le faamalo ale atunuu ile iuga ole taaloga.

Ole avea ai o Laauli Lupesoliai ma siamupini ole lalolagi, e faafetai ai lava ile Atua ona ua ia laasia lea tulaga maualuga, ae o lona galue ai i totonu ole aiga, i ana galuega masani, e leai ai lava se suiga.

Oloo fai ana galuega e masani ona galue ai, oloo toaga foi e faigaluega auā le totogiina o pili, faatasi ai ma lona sogasogā i lona lava ia lumanai, ae faasilisili ai lona alofa i ona mātua.Oloo laua galulue foi auā le atina’eina ole aiga i lea aso ma lea aso. E leai lava se suiga ina ua avea ma siamupini e fai lava ana feau masani ile aiga. Lea foi ua maua lona fale e nofo ai se’i tau a’oa’o pe faapefea ona avea ma tamā nofotoatasi ma tausi le aiga.

Ole laua mafutaga ma si ana tama o Laauli, e lē tuua lava le faatonu i feau ma le a’oa’oina. Ole mea lava sa a’oa’o mai ai a’o laitiiti lea lava ua oo ina matua e lē tuua lava lo laua tiute faamatua ole faatonu ma aoai. E lē faapea ua avea ma siamupini ole lalolagi ile taaloga ona tuu ai lea ole galuega faamatua, oloo malamalama foi le atalii i ana galuga e masani ona fai i totonu ole aiga.

Pau le taimi e sui ai Laauli Lupesoliai, o totonu ole maea ua sauni i ana taaloga, ae o tua mai ole maea o aga masani lava ale atalii, e pei foi ona molimauina e le aiga ole faiaoga ia Kevin Barry uiga o Laauli pe a alu atu ile latou aiga. Fai mai latou e ese lava lea tagata e alofa ma loto fesoasoani i tagata, e fai lava ana galuega ile latou aiga e pei lava ole latou aiga moni oloo iai. Ose tagata e loto maulalo ma faatupu filemu i totonu ole aiga ma soo se mea e alu iai.

Ile tulaga ole taaloga ale atalii e faafiafiaina ai lava laua mātua, ae a oo loa ina lavea mai Laauli i totonu ole maea, o iina e fai atu ai loa ile atalii ua tatau loa ona aua ne’i toe faaauauina le taaloga, e oo foi ile tamā ole aiga e pei ua salamō i lona faailoaina o lenei taaloga ile atalii.

Peitai ole taaloga a Laauli, e pei o lana galuega lea oloo tausi ai ia ma lona aiga, lea foi ua faatau lona fale ma e manaomia foi le totogi o pili. Oloo tilotilo la ile taimi nei o lana taaloga lea ua fesoasoani malosi i lona aiga fou lea ua iai, ma lona faamoemoe atonu ole 30 o ona tausaga ona famavae lea ma le taaloga.

Oloo iai foi lona naunautaiga e vave fai se isi feiloaiga ale pulega ma le faiaoga e toe tilotilo ai ise isi ana taaloga vave mai, lē iloa poo Aokuso le isi taaloga lata mai, auā oloo iai nisi alii fusu e toafa lea ua tilotilo mai ia te ia ile taimi nei.

Joseph ma ona matua
Joseph ma ona matua

Ole filifiliga lava ale tamaitiiti, aua e lē mafai ona filifili e mātua le mea e manao iai le tamaitiiti, e lē mafai foi ona laua momotuina le taleni ale atalii oloo fiafia iai ma fesoasoani i lona aiga. E lagona foi e ia le taimi ua tatau ai ona faamuta lana taleni, auā atonu e iai se isi galuega e fetaui iai pe mae’a lana taaloga.

I lagona ma finagalo ole atunuu ua tatau ona sui le pulega ma le faiaoga a Parker, e tāua tele ia laua mātua, masalo poo se taimi oi luma auā oloo tilotilo pea i lea tulaga, ona e faatāua tele e laua fautuaga mai le atunuu.

Talu ai lagona o Laauli e alofa faavalea e faigata tele ia te ia ona momotu se mafutaga ua mafana, ua avea lava Kevin Barry ma lona aiga ua pei o lona aiga moni ma sona tamā moni, ae oloo iloa lelei e le atalii lea tulaga.

Ile taimi nei oloo ia fautuaina lava lona atalii, a faapea ua ia iloa ua lē mafai ona faaauauina le taaloga, ona ole alualu i luma ole olaga, ne’i te’i ua aafia ai lona mafaufau ma lona tino ona fai lea ose isi fuafuaga. Ae tali mai lava Laauli ia laua mātua, se’i atoa lona 30 tausaga ona faamae’a lea o lana taumafaiga i lea faagatama.

Ile suiga ua iai ile taimi nei ina ua mae’a mai le taaloga, ua faamatua le mafaufau, ua ia te ia le lu’i foi lea ole toleni lava i aso uma. Ua avea lona faia’ina mai ile taaloga lea, ma aoaiga i lona mafaufau, ma le faamoemoe ia tele se isi suiga i lona malosi e toe tapena ai se isi la feiloaiga ma Anthony Joshua pe afai ae maua se avanoa. Oloo tumau pea le fautuaina ole atalii, afai oloo manao e faaauau pea le taleni ona taumafa foi lea e siitia le laasaga ole tulaga o toleniga ma tilotilo i ana meaai.

Na tuuina mai foi le fautuaga ale faletua ia Sala mo tina ina ia aua ne’i tuua le lagolago malosi a mātua ile taleni ua maua e le fanau, auā o lona talitonuga ole taaloga ma le taleni ole meaalofa mai le Atua. Afai e ita ile tigaina ile alu e ave le fanau i taaloga, e lē mo nei ae mo a taeao ma le lumani ole aiga ma le fanau.

Pei foi o ia le tina sa lē fiafia ile taaloga sa iai Joseph Parker auā e iloa e lavea ai, ae ina ua tuu ese lona lē fiafia ile taaloga a Parker ae tuu iai lona loto e galulue faatasi ai ma le tamā ile atina’eina ole taleni ale fanau, semanū e lē mafai ona ausia le tulaga maualuga e pei ona ua iai nei le faagatama a Laauli.