A’o tauva le toatele o alo o Samoa ile Rugby League World Cup ma le Lakapi i ‘au eseese ale lalolagi, ae e toalua na taalo i taaloga ale Soka mo le Ipu ole Lalolagi i Rusia ile 2018, e iai Bill Poni Tuiloma na taalo mo le All Whites i taaloga faapitoa ma Peru e sailia ai se avanoa o Niu Sila mo le Ipu ole Lalolagi i Rusia, peitai, ua lē sao Niu Sila (NZ) ina ua faia’ina ia Peru i ile Aso Lulu ole vaiaso na tea nei.
E lua taaloga o taamilosaga faapenei, o NZ na siamupini ile li’o ale Oceania, ona tauva ai lea ma sui mai le Continental Americas oloo tau saili foi ni o latou avanoa ile Ipu e pei Mexico ma Peru.
Ole taaloga muamua a NZ ma Peru na fai i Ueligitone ile aso 28 o Oketopa, ose taaloga mataina ae uma ane e tutusa le sikoa e ta’i 0 – 0. O lona uiga mo le taaloga e sosoo ai e faia i Lima, e pei ona faataunuuina ile Aso Lulu, e ao ona manumalo NZ ia Peru i ‘ai e lua.
E le ose tulaga faigofie, auā o Peru e maualuga lona tulaga i totonu o Amerika i Saute, ae ole atunuu foi e pele i loto le taaloga, e matuā mitamita tagata uma ile Los Incas (The Incas) e pei oni atua tama taaalo ole ausoka ale atunuu i mafaufau o tagata. O faigata na sa feagai ma le All Whites i Peru ile vaiaso na tea nei, ole lotonuu o tagata ua faaali ai uiga tetee ile ‘au a NZ ona ole lagolagoina ole latou lava ‘au.
Na faailoa le lagolago a tagata ole atunuu ile latou ‘au, ile fai o pati leotetele i fafo ole faletalimalo na api ai le All Whites, fai mai na aoina pati a tagata na fai ma pisapisao ai i fafo ole faletalimalo, na faalavelave tele ise malologa lelei ale ‘au a Niu Sila. Na faalavelave foi tagata ile ‘au a’o malaga atu ile malae mo toleniga, e lei sao le pasi i totonu ole malae ona e lapoa tele. O na mea uma e le fai fua. Ile taimi o taaloga na faasusulu ai ele autapuai a Peru moli lasers, i foliga ole ‘au ale All Whites ile taimi ole taaloga. O moli ia e mafai ona tauaso ai le tagata, ae a faasusulu i taimi o taaloga e le mafai ona iloa le polo. O nei amioga na faia e tagata, ina ia sikoa ma manumalo ai le latou ‘au. Na aafia ai ma Tuiloma i ia faiga, maua sa’o lava le ata o faasusulu le laser ia Tuiloma, a’o tamoe ma taalo. Faapea ai ma le goalkeeper a NZ na taumafai e puipui lana neti ae na pogisa lana vaai ina ua faasusulu iai moli malolosi.
Ae na manumalo lava Peru ile taaloga i Lima 2-0. Na fiu lava NZ e taumafai ae malosi tele le ‘au a Peru. Sa tatau ona manumalo i Ueligitone ile taaloga muamua ae na tutusa.
Ole lima ai lenei o tausaga o taalo Tuiloma mo le All Whites. O ia ose tagata taalo faamoemoeina a NZ ile laina i tua ile tulaga ole defender-midfielder. Na taalo amata foi o ia i taaloga uma e lua ma Peru.
Ua mae’a ai nei ma taumafaiga a NZ mo sona avanoa ile Ipu ale Lalolagi i Russia ile 2018. Ua toe foi atu nei Tuiloma i lana kalapu fou i America ole Portland Timbers (Portland, Oregon) ile mae’a ai ole fa tausaga o taalo i Farani. O Poni ole alo ole Susuga Musolini ma le faletua ia Lina Tuiloma.
E iai le talitonuga a nisi ole taaloga i NZ e iai le aso e avea ai Poni Tuiloma ma kapeteni ale All Whites. Faatoa 22 tausaga o Poni ae ua leva ona taalo ile All Whites.
