O le faaupuga lea a Kevin Barry i le talanoaga ma le Samoa Times i le vaiaso na tea nei. Fai mai Barry na iloa e tele mea sese a Joseph na fai i le la fusuaga ma Carlos Takam, ma e lei lelei le fusu a Parker (substandard).
O faaletonu e iai le pa‘ū i lalo o ona lima, o le sela, sa faigofie ona lavea i tu‘i a Takam. Na ta‘ua e Barry, e ui na manumalo Parker ae e lei faatinoina e ia mea na la tapena i ai. E iai le tuu i luga o ona lima e poloka ai tu‘i a Takam.
“E 105 taamilosaga na faipele ai Joseph i taimi o toleniga a o faasauni mo le fusuaga ma Takam. I lena taimi atoa e lei pa‘ūū i lalo lima o Parker, ae o le po o le fusuaga, na i lalo uma lima o Parker i le taimi atoa o le fusuaga.”
“E lē gata i lea, a sao tu‘i a Parker ona solomuli sa‘o lea i tua ma maua gofie ai i tu‘i a Takam. Ae e lei solomuli ma ‘alo i autafa e pei ona ma galulue i ai. O mea faigofie uma ia, na galo ia Joseph Parker i totonu o le maea. O le tele foi o taimi na tu matilatila lava Joseph sa faigofie ai ona lavea i tu‘i a Takam.”
Ina fesiligia Barry i le mānava a Parker, na ia ta‘ua ai, e iai lona masalosalo na tau popole laitiiti Joseph Parker i le fusuaga.
O ia tulaga e aveesea ai le to‘a ma lē seki ai le mānava. E talitonu Barry o le mafuaaga lea o le vave sela o Joseph Parker. Na tautino foi e Barry e sese le umi o tapenga a Joseph mo le fusuaga i vaiaso e sefulu ma le lua. “Ua umi tele,” o le tala a Barry.
Na ta‘ua foi e Barry o Laauli na tauave e ia manu‘aga i totonu o le maea. Na manu‘a lona tulilima, ma e lei atoatoa lelei le mamafa o ana tu‘i i le fusuaga ma Takam. Ae lē gata i lea, na tautino foi Parker i le vaivai o lona tino a o sauni mo le fusuaga.
E ui i ia mea uma, ae na maua e Joseph Parker le manumalo atoatoa. O le tāua lea o le fusuaga ma Takam. E ui ina lē atoatoa tapenaga a Parker ae na autasi ia te ia le faaiuga a alii faamasino e toatolu ma tuuina atu ia te ia le manumalo.
O le sauni atu o Joseph i le fusuaga ma Solomona Haumono i le masina o Iulai, o se vaega o tapenaga mo le fusuaga i le Fusi o le Lalolagi ma Anthony Joshua. E lē o se mea faigofie le sauni atu mo ia fusuaga, auā e tatau lava ona malo Parker, auā a faia‘ina i fusuaga nei, e afaina ai foi ma le avanoa na te lu‘ia ai le fusi o le Lalolagi a le IBF.
Faaalia foi le fiafia o Laauli i le toe maua vave o sana fusuaga. “O le sosoo o fusuaga o le lelei lea mo a‘u. Ou te fiafia tele e fusu i taimi uma e maua ai lo‘u malosi,” o le saunoaga lea a Joseph Parker.
E lē o popole foi Laauli i le lelei ma le malosi o le tu‘i a Haumono. O Haumono e 40 ona tausaga o loo moemiti foi ia e avea ma siamupini o le lalolagi i le paga mamafa. “E tutusa ma miti ma Joseph, ou te manao foi a‘u e avea a‘u ma siamupini o le lalolagi,” o le saunoaga lea a Haumono.
O le fusuaga a Parker ma Haumono o le a faia i Kalaiesetete, le nuu o le susuga i le faiaoga o Kevin Barry i le 21 o Iulai. A mae‘a lea fusuaga ona tapena atu lea i se isi fusuaga i Europa i tapenapenaga lava mo le fusuaga i le Fusi.
Fai mai Barry e puupuu le la tapenaga mo le fusuaga ma Haumono, pe na o le lima vaiaso. Ua lava ai lea.
O le avanoa lea e faasa‘osa‘o ai mea na faaletonu. O ia tapenaga o le a faia lava lea i Las Vega, pe a mae‘a malologa a Parker ma lona aiga i vaiaso lua, ona amata loa lea o tapenaga mo le fusuaga ma Haumono.
