“E lei fanau le tagata e faia‘ina ai Lealailepule Rimoni”

Ua feiloai atu le tofa Ale Vena i le faipule o Faleata i Sisifo le tofa Lealailepule Rimoni Aiafi ina ua lē mafai ona faaauau le tagi a le tofa i le Igoa matua
Ua feiloai atu le tofa Ale Vena i le faipule o Faleata i Sisifo le tofa Lealailepule Rimoni Aiafi ina ua lē mafai ona faaauau le tagi a le tofa i le Igoa matua

Na soisoi le faipule o Faleata i Sisifo ina ua toe faamanatu i ai se tasi o ana saunoga na folasia i le Palemene i se tasi o paeaiga ua mavae, sa ia saunoa ai, e lei fanau mai lava le tagata e faia‘ina ai i le tofi o lo latou itumalo.

“E te silafia foi o le faafā lenei ona ou tulai i le tofi o lo‘u itumalo o lona uiga e ta‘u mai ai lava iina le tali o lau fesili.” Ua naunau le faipule o Faleata i Sisifo le tofa Lealailepule Rimoni Aiafi, e tatau ona toe fefulisai faalaau mamafa e le Palemene teuteuga o le tulafono o faigapalota na pasia i le tausaga ua mavae a o lumanai le palota tele ia Mati o lenei tausaga 2016. E manatu le faipule i lea tulaga ona ua nunumi ma feteenai le faauigaina o le aiaiga o le tulafono e faasino i tagata o lona itumalo e agavaa ona lesitala ma faia a latou palota i le itumalo.

“O la‘u vaai i ai i teuteuga o loo matuā manino lelei ma e leai foi se feteenai aemaise e lē o faapea mai le tulafono e na o tagata e iai piitaga tau toto e agavaa ma i latou o nonofo i luga o eleele faaleaganuu.”

O le mau na tuuina atu e le tofa Ale Vena i lana tagi faasaga i le Faipule, e lē agavaa le fāselau o tagata palota na lesitala ona e leai ni piitaga tau toto. Peitai o le vaega tonu lea o le mau a le Itu tagi ma lana loia na faailoa ai e le afioga i le faamasino Vui Clarence Nelson, o loo fai mai le tulafono o le tagata e iai lona piitaga i le tupuaga (kinship) ma e nofo i se fanua faaleaganuu poo se isi ituaiga o fanua i totonu o le itumalo faafaipule e mafai ona agavaa e lesitala o se tagata palota.

O le vaega tonu lea na feteenai ai le mau a le tofa Ale Vena ma lana loia ma le aiaiga o le tulafono o faigapalota na faailoa e le faamasino ma faapea ona mafua ai ona faia le faaiuga a le Itu tagi e taofia loa le faaauauina o le valaau o le to‘a fāselau o tagata palota sa faavae ai tuuaiga faasaga i le Faipule o Faleata i Sisifo.

Na pau lava lea o le tagi tau palota mai tagi e ono na faaulu na folasia i tulaga masani tau faamasinoga le valaauina o molimau, peitai na faaselemutu taualumaga ina ua tulai mai tulaga e pei ona faailoa atu.

“Ou te lei manao e tuu la‘u tagi ae ua fautuaina a‘u e la‘u loia ona o tulaga ua feteenai ai mau sa tapena e ma‘ua ma la‘u loia,” o le finagalo lea o Ale ina ua maua se avanoa e fesiligia ai e tusa o le ave i tua o lana tagi.

O feiloaiga a nisi o le itumalo i matai aemaise o le tapuaiga a le afioaga o Vaitele-tai o loo matai ai le tofa Lealailepule, sa fetalai se tasi o matai o le afioaga o Toamua ma ia faailoa poo le ā lava le tulaga ua oo i ai le mataupu, ia maua pea le fealofani ma le nofo filemu o le itumalo.

O se finagalo foi lea o se tasi o matai o le foaiala o Vaitele sa ia ave ai le faamalo ma le faafetai i le tofa Ale Vena, ona o sona finagalo e taofia le faaauauina o le faamasinoga.

O le tasi o tagi sa faatulaga e suesueina molimau i le vaiaso ua tuanai atu nei, o le mataupu mai le itumalo Safata i Sisifo. Sa faaulu e le afioga Palusalue Faapo II le tagi o tuuaiga o faiga faaalatua faasaga i le faipule na filifilia i le palota tele le afioaga Lea‘ana Ronnie Posini.

Peitai ina ua tauaofia le faamasinoga sa tulai le loia mo le Itu tagi ma faailoa ua mae‘a ona soalaupule ma teuteu le mataupu i tua ma ua toe faasolomuli ai tuuaiga ma moliaga a le Itu tagi.

Faaalia e Palusalue ua faigata ia te ia lona itumalo, o le tasi lea o mafuaaga o le suia o sona lagona, aemaise ua toe silasila ifo ua leva tausaga o ia umia le tofi Faipule.