‘O se faaiuga ua faanatinati ma sa faamalosi ona fai’
O se faamatalaga tuusa‘o mai lea i se sui o le aiga, ina ua fesootai i ai mo le fia maua o se talanoaga ma le toeaina ia Samani Pulepule.
Ua savalia le lua o vaiaso, talu ona feaveai ma salalau le faamatalaga e faapea, ua faamavae mai le toeaina o Pulepule Samani Pulepule, mai lona tofiga taitai i totonu o le galuega ma le Ekalesia Faapotoptoga a le Atua (Assembly of God).
O se faamatalaga sa faateia ai le toatele o tagata lotu o le ekalesia aoao i Niu Sila ma le lalolagi atoa, ma ua atili tafafao ai taliga o Tufugauli i le fia mautinoa ma le fia silafia, aemaise ai o le fia maua o se malamalamaaga i lea mataupu.
O le toeaina ia Samani Pulepule, o loo umia tofiga Taitai e lē gata i le galuega a Niu Sila lava ia, a o ia foi o le Taitai aoao o le galuega ma le ekalesia AOG, i le lalolagi atoa i le Itupa Samoa. E ese mai i ona tofiga Taitai e pei ona ta‘ua, ae o ia foi o le Faafeagaiga a le ekalesia ma le aulotu a Aukilani ua silia ma le 40 tausaga.
O le tala ua salalau ma sa maua e le toatele i luga o upega o fesootaiga a le Face Book, ma isi auala o fesootaiga, o loo ta‘ua ai le tuumuli ese po ua faamavae Samani mai ona tofiga Taitai. O se faamatalaga e lē faamaonia ma e lē sa‘o. Sa faateia foi le Samoa Times ina ua maua le tala e uiga i le faamavae o le toeaina, ma sa taumafai ai ina ia maua se feiloaiga ma Samani.
Ina ua fesootai atu i le maota o le toeaina, ae sa faamaonia mai e se tasi o le aiga e lē fia faailoaina lona suafa e faapea, o se faaiuga ua faanatinati ma sa faamalosi ona fai. O le tala foi ua alu, e lē sa‘o ma e lē moni. Sa umi se taimi o fefaasoaai pea ma fefulisai le mataupu ona o le fia maua tonu o le sa‘o ma le moni.
Sa lē faamalieina le manatu o le Tusitala, ma sa taumafai ai e fia faaoo pea lava le fesili i le toeaina, poo fea tonu o iai lona finagalo, ona ua foliga mai ua logo eseese matagi i le feteenaiga o faamatalaga ua tulai mai. E ui i se manaoga, peitai sa faamalie mai le aiga, ona e lē o mafai ona talanoa mai le toeaina i lea taimi, ona o le gasegase faigata o loo feagai ma ia.
Sa toe talosagaina pe maua se avanoa i le tina o le galuega le faletua ia Sapapalii Pulepule. E lei maua se tali i lea lava aso, ona e faapea o loo tālia sui o le komiti a le Ekalesia e lē o toe mamao ona taunuu atu lea. Peitai o le lua aso mulimuli ane, ina ua toe fesootai atu i ai, ae faamalie mai le sui o le aiga, e lē o finagalo le tina e faia se talanoaga e uiga i le mataupu.
O fea na amata ma mafua ai ona mapuna a‘e faamatalaga?
O se faamatalaga e faapea, na malaga mai le susuga ia Onesemo Pulepule, o le alo o Samani Pulepule o loo faifeau i le Ekalesia AOG i Melepone Ausetalia i sana asiasiga, ona o le gasegase ma le lagi faatafa o le toeaina sa faataotolia ai.
O le iai o Onesemo i Aukilani ona o le faamoemoe e pei ona malaga mai ai, mulimuli ane sa ia fofogaina ai loa ma le aulotu a le toeaina i Aukilani, ma faailoa i ai le mataupu i le faamavae ese mai o le toeaina i tofiga Taitai.
E lē o se taimi muamua lea na asiasi mai ai Onesemo; o taimi uma lava e faataotolia ai le toeaina i gasegase o le tino, o taimi foi ia e taunuu ai Onesemo i Niu Sila.
Ae tusa ai ma lipoti ma molimau a nisi o aiga ma sui o le aulotu e faapea, o le latou feiloaiga ma Onesemo, sa faamanino ai e le Faifeau tulaga uma ma le faatagaina o ia e faailoa ane le finagalo o le toeaina, o le a faamavae mai ona tofiga Taitai.
O se isi laasaga sa oo i ai lea feiloaiga a Onesemo ma le ekalesia i Aukilani, o le fofogaina lea ina ia sauni e toe filifili ma saili se latou faifeau, ona talu ai o le toeaina o le a faasee ese ona o le gasegase ma le matua o lona soifua ua iai. Na mae‘a lea feiloaiga, sa talia foi e le ekalesia, ma ua avea o se mataupu e pei ona molimau i ai nisi, e faapea sa iai pea lagona alofa ma le faigata i tagata lotu, ona o le alofa faatamā, aemaise ai o le mafutaga ma le toeaina sa fofoaina o latou soifua faaleagaga.
Ae i se isi foi itu, sa manatu le toatele atonu ua talafeagai foi lea tulaga, ona o le silasila alofa lava i le toeaina ma lona soifua, aemaise ai ua faigata nisi o fesootaiga masani, ona o loo tauivi pea ma faigata o le ma‘i, ma ua vaivai foi lona tino. Na toe taliu Onesemo i Ausetalia, ma ua faapea ai ona matala faitotoa o faamatalaga ma uaea mosooi, ma na oo ai lava i faamaumauga i luga o upega o fesootaiga, lea na atili faalauiloa ai le mataupu.
E mai lea lava taimi, sa nonofo malamalama foi le aulotu latou i le folasaga a Onesemo sa faailoaina, aemaise o le gasologa o le galuega. O le tulaga foi o le galuega ma le tausia, ua faamatuu ane i le tina ia Sapapalii, o Alopopo Iere Tuimaunei, o le fofoga lea o le ekalesia, ma le susuga ia Samoa Neueli, o le Teuoloa poo le Teutupe.
O Onesemo Pulepule, o ia o le sui taitai aoao o le lalolagi i le galuega a le Faapotopotoga a le Atua, AOG. E lē gata i lea, a o ia foi o le taitai aoao o le galuega a Ausetalia lava ia. E lē gata sa talanoa Onesemo i le ekalesia o se suli o le toeaina ia Pulepule i le tino, ae agavaa foi ona o se tasi o taitai i le va faataitai o le galuega, aemaise ai o ia o le Sui Taitai o le galuega aoao a le Atua i le lalolagi. Peitai e ui i lea, ae e iai le talitonuga sa tatau pea foi ona aloaia se faamatalaga mo le silafia e le komiti a le Matagaluega a Niu Sila.
O le mafuaaga lea sa toe taumafai ai le Samoa Times i le Sui Taitai le susuga ia Motu Matia, faapea sui o le komiti a Niu Sila.
E lē gata i lea ae sa toe tapā foi le tamaitai Loia a le Ekalesia, Leuluaialii Olinda Woodroffe, ona e manatu o se puna lelei lea ma se faasinomaga talafeagai e maua ai le tonu ma le sa‘o o le mataupu. Aemaise ai pe ua latou taulimaina ma faamauina aloaia i faamaumauga a le Ekalesia Aoao ma le Matagaluega a Niu Sila, le faamavaega a Samani Pulepule.
Leuluaialii Olinda Woodroffe
Ua faatagaina a‘u o le Loia a le Ekalesia, e le komiti ou te ta‘u atu, ma faailoa e tusa ai ma lau faafesili, E leai se tulaga faapena e uiga i le toeaina. E lei faamavae Samani mai ona tofiga Taitai. Ua mae‘a ona matou talanoa ma sui o le komiti, ma ua latou faamaonia mai e lei iai se talanoaga faapena na saunoa ane ai le toeaina i le latou feiloaiga sa faia.
Afai foi o se talanoaga sa faia a le aiga, na mafua ai ona alia‘e le mataupu e pei ona fesiligia, o lona uiga o le talanoaga lava faaleaiga latou, ae lei aloaia se mea e tasi e tusa ai ma faiga faavae, ma le mau a le komiti e pei ona faataga ai au ou te talanoa atu, ma tali atu i lau fesili mai.
O le tali manino lea a le tamaitaia Loia, ina ua tapa e le Tusitala, ma sa saunoa manino foi, o ia ua tuuina atu iai e le komiti le avanoa ma le faatagaina e faailoa ai faamatalaga uma e uiga i lea mataupu.
Finagalo sui o le Ekalesia Aukilani
Sa fesiligia foi nisi o aiga ma sui o le aulotu a le toeaina, i so latou foi finagalo ma le tulai mai o le mataupu. O fea tonu o iai lo latou silafia ina ua mae‘a le feiloaiga ma Onesemo, ma le suiga ua iai nei ma ua toe tulai mai. O le toatele lava, e lei fia talanoa tele i le mataupu, ma e foliga mai o nisi e matuā lē malamalama, ma leai se manino ina ua maua le tala mulimuli ane, ae ua mae‘a le feiloaiga sa faia muamua.
Sa manatu nisi o le isi laasaga o le a agai i ai, o le faataunuuina, ae pe faapefea foi ona faia le filifiliga o se latou Faifeau e tusa ai ma le feiloaiga sa faia, auā o tofiga Taitai o le mea patino lava lea i le va o Samani ma Taitai ma le komiti. E tasi le vaega o loo taulai i ai finagalo o le aulotu, o le filifilia lea o se Faifeau e tausia le galuega pe afai o le a faamavae le toeaina.
O nisi sa molimauina le faamaoniga o le mau sa saunoa i ai Onesemo, sa mafua ai ona faia le feiloaiga muamua, ma o loo tālia nei, poo afea o le a faia ai se fonotaga muamua a le aulotu, e talanoaina ai le mataupu ua taoto nei, ma o loo nofo tatalo ai. O nisi foi sa tali mai ma faapea mai, e sili lava ona ou valaau sa‘o ia Onesemo, auā o le va o ia ma Samani sa talanoaina ai le faaiuga sa ia fofogaina.
E oo ina faaiuina lenei lipoti e lei mafai lava ona toe maua se feiloaiga a le tusitala ma le susuga ia Onesemo e tusa ai o se faapupulaga atili o lenei mataupu.
Ae iai le faamoemoe e toe auina atu se isi lipoti pe a maua lea avanoa ma le susuga i le faafeagaiga.
