E leai se luluga e aunoa ma se seleselega – MIT

O se lagona faagaeetia ma le fiafia pe afai o e matua tigaina i se galuega, ae faafuasei loa ona e lagona sina leo malu o faapea atu ia te oe, ‘malolo maia ua lava lena galuega, ae sauni loa o le a e selesele i le fua mai o au galuega lelei sa e mafatia ai’. Poo se tagata taalo foi ua alu le aso o mafatia i taaloga i le vevela o le la, ae faapea atu foi se isi, ‘malolo maia sei vai sina vaiinu malulu ua vevela le aso’.
E tai faapena tonu foi lagona e oo i le tagata aoaoina, poo le tagata o loo taumafai i aoaoga o le poto salalau, pe faaleagaga foi.
E faigata le soifua aoaoina, o le mafuaaga foi lea o le lē faaeaina o nisi, ona ua faamuta faafuasei pe ave ave tuu e pei o upu a le atunuu. A fesiligia pe aisea, o le tali lava ‘e faigata’, e le faigofie aua sei vagana ua tuu atoa i ai le loto ma le mafaufau, ona le faalogologo tiga lea pe musua, ae malosi pea le loto e tauivi ma le filiga, seia tatafa mai ata o taulelei, pe tau foi lau o le faamoemoe.
O le afiafi o le Aso Tofi na tea nei sa faataunuuina ai se fiafia tele e ala i se aiga e faamanatu ai ma faafiafia ai le mamalu o nisi sa aoaoina i lea polokalame a le MIT.
O le fale talimalo o le Centra i Magele sa faataunuuina ai lea faamoemoe. O se afiafi o le fiafia ma le pese malie i finagalo o nisi o tamalii ma faletua, alii ma tamaitai, sa fitaituga i le toe aoaoina ai i lea vasega.
O le aoaoina ina ia siitia le silafia mo le faasoasoaina o tupe ma lona faaaogaina, atoa ai ma le malamalama i inisiua, teuga tupe, o lafoga, nonoina o tupe, teuga tupe faavaitaimi atoa ai ma le puipuia lelei o lou tagata mai aafiaga o le faaletonu i le totogiina o aitalafu, o nisi ia o vaega taua ua mafai nei ona aoaoina i le nofoaga o aoaoga i Manukau, le MIT.
O le iai o se vasega e toe aoaoina ai nisi mo agavaa faapitoa i matata eseese e pei ona taua i luga, o se avanoa taua tele aua o se isi lea o faitotoa ua matala mai mo soo se matua o le soifua ua oo i ai, e maua lava le avanoa i lea polokalame.
A oo ina taunuu i le tini ma faaeaina le taumafai, ona galo lea ma le toe manatua le tigaina ma le mafatia, le maosiosia ma le oloia, le vaivai ma le le lava, ae ua suia i le lagona fiafia ma le olioli atoa ai ma le faamalosi.
O le alaga fiafia ma le loto faafetai sa oo ifo i le taele o finagalo o nisi o tamalii ma faletua, tamaitai ma alii sa aoaoina i se vaega faapitoa a le matata eseese i Manukau poo le MIT, ina ua faaiuina foi le taumafai sa feagai ai i lenei foi tausaga. E pei ona saunoa i ai le tamaitai faiaoga o lea vasega faapitoa, le faletua ia Seugagogo Fololi Iosua Lologa.
O le maea o lenei tausaga o le a sauni atu ai nisi mo le sailia o ni galuega, ia poo le toe faauauau pea o le soifua aoaoina i le toe faalautele o le silafia, mo le laasia o nisi laasaga maualuluga pe a manaomia.