O le tagata tauivi ma finafinau e lē mālōlō lelei auā e tele pea avanoa ma faamanuiaga o loo mafai ona maua e o tatou tagata i soo se matata ma soo se matagaluega i totonu o Aotearoa nei, o loo tatou finauina ina ia faaeaina ai tulaga o iai i totonu o matagaluega eseese.
A uma ona finauina se faamoemoe ma faamanuiaina, ona toe timata foi lea o le upega ma toe tagai i le isi laasaga auā lava le faaleleia ma le faaatoatoaina atili o agavaa, le tomai ma le tamaoaiga e faatinoina ma faataunuuina ai feau ma galuega aemaise o tiute ma taleni e faamanuiaina ai i tatou e le Atua.
E faapena le soifua finafinau ma le ola sailiili o nai o tatou tagata, ma ua avea lava lea ma faaeaea, le sailimalo aemaise o le fai pea ma ‘ai o le soifua aoaoina ma le agavaa lelei auā feau ma galuega i Niu Sila nei.
O le vaiaso ua tuanai atu sa faapena foi ona faauuina ai le toatele o tagatānuu o Samoa i matagaluega ma matata eseese mai totonu o aoaoga a le Iunivesite i Aukilani nei.
O faailoga o tusipasi eseese e pei o tikeri, tipiloma, masters, ma isi lava faailoga na faamanuiaina ai tamaitai ma alii, o tamā ma tina, o mātua foi ma fanau, ma o se laasaga ua maoa‘e foi auā ua toatele lava tagata Samoa ma le Pasefika ua faamanuiaina i faailoga maualuluga.
O nisi o alo ma tamafanau Samoa sa faauuina ma ausia tusipasi faafaiaoga o le Bachelor of Education in ECE e aofia ai Tofuola Aialeo, Efo Leniu Filia, Mona Schuster ma le tamaitai mai Iraq o Sohair Abdul mai le aoga amata a St Peter Chanel Preschool i Otara.
O tamaitai faiaoga nei sa faauuina i le tausaga ua tuanai atu i tusipasi o le Diploma in Teaching ECE.
Na lei faavaivai le finau ma le tauivi pea mo le isi laasaga o le taumafai, lea le ua a‘e malo ai faiva, ua tini pa‘ō foi le uto auā o lele ua tautai a‘e ma le manuia faiva o tautai, ina ua faapaleina nei ma ausia agavaa talafeagai lelei ma le faatinoina o le galuega faafaiaoga i totonu o aoga amata.
Ia malo lava le tauivi, malo le onosai, malo le saili malo, faafetai foi mo le finau malosi. O nei lava mea uma ua faia ma faataunuuina, ia tatou faapea ifo ai, o le viiga lava ma le faafetai ia faafoi i le Atua, auā o ia e ona mea uma e pei foi ona ua faapaleina ai outou uma sa tauivi i soo se matata i lenei foi tausaga.
