E le tuumāmāina e le EFKS Manurewa le faamalositino

O le tele o mafutaga ma faalapotopotoga, atoa ai foi ma ekalesia, ua amata ona agai e faia ni polokalame e faagaoioi ai le tino atoa ai foi ma le mafaufau.
O le taumafai foi o le soifua maloloina e faia ni faatosina mo tagata Pasefika ma le lautele o isi tagatanuu, e faitiitia ai le faatupulaia o faamai e mafua mai le le lava o le faamalositino, o le isi lea mafuaaga ua toatele ai i latou ua fiafia e faataunuu lea foi vaega sa le masani ai.
O fautuaga mai alii ma tamaitai fomai faaleaiga mo tagata lautele, ia taumafai lava e maua sina taimi o le aso e avalivali ai, pe tamoe foi, ua taua tele lea e faagaoioi ai le tino ina ia fesoasoani mo le tineia o mai e ono tulai mai pe a le gaoioi.
O le isi auala ua matua osofaia e ekalesia ma tagata taitoatasi foi e faatino ai lea foi vaega e pei ona fautuaina, o le ta lea o le pese ae gaoioi agai i ai e faatatau i le vave poo le lemu foi o le musika.
O se faiga sa le amanaia tele e le toatele ona e foliga mai o se faiga e talafeagai ma le autalavou, ma fanau, ae faaleogatasi ma le au matutua, peitai e lei tele lava foi i se pito faiga a le faamalositino sa feagai ai ma le ekalesia EFKS i Manurewa i le afiafi o le Aso Tofi na tea nei.
O le polokalme faamalositino sa faataunuuina e le ekalesia a le susuga i le faafeagaiga ia Talia ma le faletua ia Feiloaiga Tapaleao, ua iai le faamoemoe o le a faaauau pea aua o se auala e ono faamanuiaina ai uma tagata o le ekalesia i le itu tau soifua maloloina lelei.
E le gata ina o le a penefiti ai tamaiti, o tagata talavou, e oo lava foi i tagata matutua.
Ua faavaeina lenei faiga i lalo o le vaaiga a se komiti faapitoa lava a le ekalesia ua faaigoaina o le Health Committee EFKS Manurewa.
O se fesoasoani tau tupe sa mafai ona tuuina ane e le pulega faaitumalo a le soifua maloloina i Manukau, (Manukau District Health Board) ua fesoasoani tele mo le faataunuuina o le faamoemoe o le ekalesia.
O le susuga ia Manu Sione mai le DHB, sa auai ane ai foi i lea afiafi.
O le susuga ia Faamanu Gloria, Patrick, Kenese, Jane ma Iemaima, o nisi lava foi o tamafanau a le ekalesia, sa fai ma faasinoala, pe sa fai ma faiaoga mo gaioiga o le polokalame faamalositino.
O le maea ai o le faamalositino, ona sosoo ai lea ma le tufatufaina o faailoga mo le tagata ua sili ona pau maulalo ona kilo mai lona mamafa sa iai.
O se faiga ua atagai ai le tausinio uma o tagata ina ia maua foi lea avanoa e maua ai sina taui mo le faamaoni i fuafuaga ma polokalame o loo faatulagaina e le komiti.
O le susuga ia Manu Sione mai le Manukau DHB, sa tauaaoina faailoga o i latou sa faamanuiaina i lea foi afiafi.
O le komiti o loo Peresitene ai le susuga ia Tagaloa Gafa, ma le laulau, o le failautusi ia Sieni Tapaleao ma le teutupe ia Sina Ene, o loo feagai ma lea foi poloketi a le ekalesia.