E lē tatau ona aafia le SUNGO i polokiki

O le finau maumauai mai o le Peresitene ma nisi o sui o le Komiti Faafoe o le SUNGO le faamalu o faalapotopotoga tumaoti i Samoa e faapea, o manatu na faalele e le Pule Sili i le polokalame o le Campbell Live o ona lava manatu ae lē o le SUNGO, e lē o talia gofie e nisi o sui auai o le faamalu.

O le fonotaga a sui auai ma le Komiti Faafoe na faaleo ai ni lagona faanoanoa o nisi o sui, lea sa faaalia ai e lē tatau i le faalapotopotoga ona aafia i polokiki auā o le tulaga e oo i ai, o le aafia o faiga faavae a le faalapotopotoga ma le faatinoina ai o lana manulauti.

Faaalia e le faletua o Papalii Dr Viopapa Anandale, o lona lea atugaluga pe afai e lē tausisia e le Komiti Faafoe ma sui auai uma o le SUNGO aiaiga o taiala ma faiga faavae.

E manatu nisi na auai i le faatasiga, ua sopoloa le faatinoga o tiute o le tamaitai Pule Sili.

Peitai o le faamamafa e tasi a le Peresitene, le tofa Vaasiliifiti Moelagi Jackson, o manatu na agiga o le faletua o Roina Vavatau, o ona lava ia lagona faatagata soifua, ae lē o ta aofai ai le faalapotopotoga.

E lē o mafai ona talia e nisi lea faamaninoga a le Peresitene ona o lo latou talitonuga, soo se mea e susū i ai le Pule Sili pe faaali foi sona manatu, o loo ia tauaveina le tulaga o le faalapotopotoga o loo ia umia.

O le masina fou i le faaiuga o Ianuari 2011 e tatau ona o ese ai le SUNGO ma fanua ma fale o le Malo i Motootua.

O le leitiofoni saili tupe na faia i le vaiaso ua mavae na maua ai le $20,000 e fesoasoani i seleni a le SUNGO mo le faatauina o so latou fanua ma fausia se ofisa fou e tapuvae tasi i ai a latou galuega.

Faaalia e se sui o le faamalu o le a saili se nofoaga lē tumau e tau ina mapu i ai, a o tālia se taimi e maua ai se fanua ma se ofisa fou.

E talitonu le komiti faafoe o se suiga fou e sili ona tāua auā o le a mafai ona saoloto ai le faaalia o lagona o le SUNGO i soo se mataupu, ma lē toe tautaulia ai i le nonofo faafeagai ma le Malo.

O le alii Palemia o le atunuu na saunoa e tatala le leitiofoni suetupe a le faalapotopotoga. O le mau a le Peresitene, e leai se manu‘a o afaina ai le va o le SUNGO ma le Malo.