Samoa A – 17 Chiefs – 71
E lei faigofie taumafaiga a le ‘au a le atunuu le Samoa-A, i lana uluai taaloga i Niu Sila, na fetaui ai ma le ‘au lona lua a le Chiefs i le faaiuga o le vaiaso. Na faamaonia lea tulaga ina ua iu ma mae‘a le taimi faatulagaina, a o sili le Chiefs Development 71, i le na o le 17 a le Samoa-A.
Ae o se talanoaga ma le alii faiaoga o le ‘au Fepuleai Selefuti Patu i le taeao ananafi, Aso Gafua 12, na faailoa ai sona finagalo faanoanoa ona o le toatele o tama taalo o le ‘au o loo faamanualia, aemaise ai ua lagona e tama le vaivai ona o le tele o taaloga, ae utiuti malologa.
Saunoa Fepuleai, sa maitauina ma mautinoa lea faafitauli ina ua faatino le taaloga i le faaiuga o le vaiaso. O le naunautaiga o le alii faiaoga ma le pulega o le ‘au faapea tama taaalo, ina ia faatumauina pea le malosi e puipui ai lona tulaga o loo iai i le taimi nei, e ui ina ua matuā vaivai lava.
Peitai o taaloga e lua o totoe, e manatu le faiaoga, o le a tuu i ai le loto ma le fatu o tama taaalo, ina ia tumau ai pea i le pito i luga mai ‘au o le taamilosaga, Fiti ma Tonga. O le taimi nei, e tasi le ‘ai ua sili ai Fiti mai ia Samoa i le tulaga lua, ae toe tailua taaloga o totoe.
O Samoa ua toe sauni atu e taaalo ma le Highlander Otago i le Aso Tofi o le vaiaso nei, ona faaiu lea i le ‘au a le Hurricane i Ueligitone, i le Aso Gafua o le vaiaso fou aso 19 o Mati ona toe taliu ai lea i Samoa.
O Fiti, o le a taaalo ma Aukilani, ae faaiu i le ‘au a le Chiefs, lea na faiaina ai Samoa i le faaiuga o le vaiaso, ona toe foi ai lea i Fiti. O taaloga uma sa faatulaga mai e le IRB, ma o loo mulimulitai pea i ai i lea faasologa e pei ona saunoa i ai Fepuleai.
Sa ta‘ua e alii Faiaoga e faapea, e ui i le tulaga vaivai ua vaaia ma ua fetaiai ma tama o le ‘au, peitai o se tulaga lelei tele mo i latou, ona e tatau lava ona faamasani i ai i le faigata. O le agai i le lumanai, e matuā tāua ai lea tulaga, auā o nisi lava taamilosaga e oo lava i le tailua taaloga i le vaiaso e tasi.
O le taliu mai o le Samoa-A, ina ua mae‘a ana taaloga sa faatulagaina ma nisi o ‘au a Ausetalia, sa afea ai Niu Sila ma o loo iai pea mo le lua vaiaso. I totonu o lea lua vaiaso o le a faia ai nisi o ana taaloga faitaulia auā lava le taamilosaga o le PRC e pei ona faagasolo nei.
O le Aso Gafua aso 6 o Mati na taunuu ai le ‘au i Niu Sila ina ua mae‘a taaloga e tele sa faia i Ausetalia, ma tapena ai loa ana taaloga e tolu i Niu Sila, e pei ona mae‘a le tasi, ae ua foufou atu mo le isi lua o totoe.
O le taamilosga lenei a le PRC e faamae‘a ia Oketopa o le tausaga nei lava, ma o le a maua ai le siamupini aoao, pe a mae‘a taaloga faatafatolu i le va o Samoa Fiti ma Tonga. O le tāua lea o taaloga ma ‘ai e maua i taaloga e pei ona faagasolo nei, auā o le a faaopoopo uma i le tuufaatasiga i taaloga o le tafatolu ia Oketopa 2012.
Ryan Schuster (Taitai Malaga)
Ae i se feiloaiga ma le susuga i le taitai malaga o le ‘au (team manager) Ryan Schuster, i sona foi finagalo faaalia, sa ia matuā lagolagoina pea le finagalo o le susuga i le alii Faiaoga e pei ona ta‘ua muamua.
Saunoa Ryan e iai lava le tāua tele o soo se taaloga e faia a le ‘au. O ia taaloga e faitauina uma lava i le faitauga mo le atina‘eina o tama taaalo. E tusa lava poo se ‘au faaitumalo, kalapu poo se ‘au faavaomalo, e leai sona eseesega tele i le tulaga o le atina‘eina o le lakapi a tama taitoatasi.
E tāua uma lava taaloga, auā o ni luitau ma laasaga tāua aemaise ai o suega mo tama, faapea le ‘au tuufaatasi ina ia faaauau pea le tulaga o aoaoga ma lesona mo tama, ma le ‘au a le atunuu.
E lē gata i lea, ae o le lumanai lea o le taaloga lakapi mo alo ma fanau fai a‘e, ina ia lē motusia le fafagaina o le ‘au tele, le Manu Samoa faavaomalo.
