E lei popole lava le faifeau EFKSA Ekalesia Faapotopotoga Kerisiano Samoa Ausetalia, pe manumalo pe faia‘ina lana mataupu tau faamasinoga ile Faamasinoga o Apili ile aso 27 o Mati 2017.
O lagona faaali na ole Susuga Kerita Reupena ma le faletua ia Binary. Ia avea le oo atu ole la mataupu i luma ole faamasinoga ole a mafai ai e Samoa ma le lalolagi ona lagona o la leo.
O leo ia o Rev Kerita Reupena ma le faletua, sa lē mafai ele Komiti Faatonu a Toeaiina ale EFKS ona tuu atu iai se avanoa e faamatala e aumai ai so la leo ile mataupu na mafua ai ona aveesea lo la tofi faifeau ele Komiti Faatonu ale Autoeaina.
Ile faamatalaga a Rev Reupena, “Na tuli a‘u i fafo ae se‘i fai le latou faaiuga ia te au. Ole aso na sosoo ai na ou alu atu ile fono ae musumusu mai le isi toeaina pe ua ou iloa le mataupu lea ua aumai ai lo‘u igoa ma le faaiuga ua faia ia te au.”
“Na sii lo‘u lima oute fia iloa le uiga o lo‘u faasalaga. Ae uma lava le fono e lei aumaia se avanoa ia te au.”
“Ole mea lea e sili ona matautia ile Komiti Faatonu, ole leai ose valaauina ole faifeau e fai sana tala.
Na ole alu atu lava ole lipoti fai le faaiuga pito tasi, omai foi le Komiti tele ale ekalesia, e gūgū foi latou.”
E talitonu Rev Reupena, “Ua tatau ona malamalama toeaiina, e tatau ona fai le natural justice, e tatau ona maua se avanoa e fai ai sana faamatalaga”.
“Ole tāua ole faamasinoga na fai nei, ia silafia ai e Toeaiina ole Ekalesia le tāua ole faataunuu ole natural justice, ma le aiātatau ale tagata. Ua tatau ona sui le tulaga o faafoe ai nei faaiuga ale Fono ale Komiti Faatonu a Toeaiina ole Ekalesia.”
Na ta‘ua foi e Kerita e le mafai ona suia faiga nei ale EFKS, pe afai e tuu pea e aunoa ma se lu‘i e tuuina atu iai. O lea ua aumai le iuga ale faamasinoga apili, atonu ole a silafia ai le sese o faiga oloo faia ile taimi nei.
Ua mausali lava le talitonuga o Kerita Reupena, e le o toe iai sona avanoa ile tofiga Toeaina. Ua leai se avanoa ua sui le Komiti Faatonu, ua sui le pulega na ou iai.
O matou ua i tua ma le EFKS, ua tutoatasi le matou aulotu. Ua aveese foi ele EFKS le Faifeau Samoa na pipii ile tofiga Toeaina.”
“O ē na lagolagoina le finagalo ole Autoeaiina ua o lava latou e fai le latou loto. E toatele matou na nonofo, o tagata ua oese ua leva ona mananao e oese.”
“Ole EFKSA. Ekalesia Faapotopotoga Kerisiano Samoa Ausetalia.
Ole igoa lena oloo lesitala ma fai ai le faavae ole matou aulotu,” na saunoa Reupena e leai se piitaga ole latou aulotu ma le EFKS.
Peitai ile talanoa ale tamaitai loia Leulua‘ialii Olinda Woodroffe, na tulai mo Reupena na ia saunoa ai, “Ole taimi muamua lenei ua tagofia ai ele faamasinoga a Samoa se ituaiga mataupu tau faamasinoga faapea, ma ole mataupu foi lenei ua suia ai ma le tulafono.”
Ole suiga ile tulafono lea na finauina e Leulua‘ialii, ole mataupu lea tau lotu ole konekarate, ile va ole tagata ma le ekalesia poo le aulotu.
E ui ina faapea mai le faamasino sili, e le ose konekarate.
Na ta‘ua ele tamaitai Loia, na iai le mataupu faapea na tulai mai i Egelani, talu ai nei foi na valaau ai foi se mataupu faapea i Niu Sila, o lea foi ua tulai mai i Samoa, ma ose tulaga lelei mo le silafia o tagata.
“O Samoa ose atunuu e tautua lotu, e mamae foi ile talalelei, e maoae foi le faaaloalo e ave e Samoa i faifeau. Ae ia manatua lelei e tatou, o faifeau o tagata e pei foi o tatou e le oni Atua. E iai foi o latou vaivaiga, ma e iai foi le taimi e sese ai lana faaiuga e fai.”
Na talanoa le loia, o ia foi e lotu, ma sa naunau lava ia faia se suiga i Samoa, ma o lona fiafiaga lea ona ua mafai ona ia faia lea suiga.
Ose tasi o vaega na ta‘ua ele tamaitai loia, e le tasi se ekalesia i totonu o Samoa, peitai, ole faaiuga lea na fai ele Faamasino Sili, e foliga mai e manao le Faamasino Sili, ia mulimuli uma ekalesia i tulafono oloo faafoe ai faiga faavae ale EFKS.
