O le manatu lea o le alii o loo pulea se tasi o fale fuamoa na amata i le tausaga lenei a le kamupani a Ah Liki i lana vaega o oloa siiatoa.
O Alex Brunt lea ua vaaia le lafumoa a lea kamupani, ma e 20 afe moa ua amata ai lea faatoaga tele i Samoa, ma ua faatau atu le fuamoa lea ua faaigoaina o le Tanumapua Sun Choice Eggs.
O le agai o lea kamupani e fai lava le latou lafu moa i Samoa ona o tulafono ia ua faamalosia ai e le Matagaluega o Pisinisi, Fefaatauaiga ma Leipa na pasia ai le faatulafonoina o le taimi e tatau ona faatau ai le fuamoa lea e sau mai i fafo.
O Amerika ma Niu Sila sa faatau mai ai le fuamoa mai i fafo ae o le tulafono fou ua faamalosia ai e na o le 30 aso lava le umi e tatau ona taatia ai taseni fuamoa i luga o fata o faleoloa poo pusa aisa foi ona faatamaia loa lea.
O se tulafono na ta‘ua e Brunt, e tuu mai ai na o le lua vaiaso e mafai ai ona faatau le fuamoa ae o uta e la‘u mai i fafo o le matuā taugata ma tele.
“O lona uiga e taunuu mai uta nei mai i Amerika ua totoe ai na o le lua vaiaso e tatau ai ona faatau le fuamoa lea e tuu aisa ma faaleaogaina loa,” o se faamatalaga lea a le alii pule.
Na faamuta uta o fuamoa mai i Amerika peitai o le faafitauli lava lea na molimauina foi i fuamoa mai i Niu Sila.
O le mafuaaga la lea o le manatu loa o lea kamupani e sili ai lava le faatino o lea foi atina‘e i Samoa ma ia tuu ai le isi faafitauli o le lē lava o le fuamoa e faatau i le atunuu pe a oo nei i taimi o fono tetele o loo faaaogā ai le fuamoa poo faalavelave a aiga.
Na agai foi i Fiti le kamupani lava lenei e aumai ai le fuamoa a o lei faatuina le latou lava fagaga mo le faatau atu ai o le fuamoa i Samoa nei.
F aaalia foi e Brunt o le isi lava tulaga lelei o lea suiga ona ua taugofie ai loa ma le fuamoa o loo faatau i totonu o le atunuu.
Faaalia e lea alii o le isi laasaga lea ua agai i ai le kamupani lenei o le gaosi sa‘o lava i Samoa o taumafa faapitoa mo moa nei ua sau ai le fuamoa.
O loo iai se isi kamupani ua faaigoaina o le Farmtech i Samoa ina ia fafaga ai lafumoa, lafu puaa ma manu papalagi ae o loo manao lava le kamupani a Ah Liki e gaosi e i latou a latou lava taumafa mo ia lafu manu.
“E atoatoa loa taumafa mo meafafaga nei e pei ona iai nei faataitaiga o le saga ma isi laau, ona fesoasoani foi lea i le pa‘ū ai o le tau o le fuamoa e faatau atu i le atunuu”.
O le taimi lenei ua oo atu i le $6 i le $7 tala le tau o le taseni fuamoa ma o le manaoga o lea kamupani, ina ia pa‘ū atu le tau e faatau ai le fuamoa i Samoa lava ia. E tusa ma le tolu isi atina‘e faapea o lafumoa ma fuamoa i Samoa, ese mai i lafumoa o le Aoga o Faatoaga a le Iunivesite o le Pasefika lea e i Alafua.
