Ua toe vaaia masini sua auala i le afioaga o Lepea ina ua faalauiloa e se tasi o matai o le afioaga, ua mae‘a ona soalaupule le galuega a le Malo ma ua malilie alii ma faipule o Lepea e faaauau loa le faatinoga o le galuega na taofia e le nuu i vaiaso ua tuanai.
Faaalia e Vaitagutu Viliamu o le faaiuga lenei na faia ina ua mae‘a ona taofi le malo mai le faaauau ai ona sua le auala a le Malo seia maua se tali a le Malo i talosaga a Lepea ua mae‘a ona faatatitia atu.
O le taofiga na faia i ni nai vaiaso ua mae‘a ina ua oo ane le faalautelega o le galuega a le Malo i le pa maa pa‘epa‘e lea ua lauiloa ai vaaiga o Lepea – lea o loo siomia ai le afioaga tu taulaga lenei.
Na talosagaina ai lava e Lepea le Malo, a lē ola fua le afioaga i le suavai o loo faasoa ma o loo sau foi i eleele o Lepea, o le a leai se faalautelega o se auala e mafai ona toe faia i Lepea. Sa faapea foi ona iai ma se isi manaoga na tuu atu i le Malo mo se tinoitupe e tasi le miliona tala ona o le manatu o le afioaga o se tupe lea e tatau ona maua e le nuu auā eleele ia ua faaaogā e le Malo mo le alatele lea e sau mai i Faleata i Sisifo ma agai mai ai i le taulaga o Apia.
Faaalia e Vaitagutu e ui i nei manaoga sa toe feiloai lava le afioaga ma ua tasi ai loa ina ia faaauau le galuega a le Malo ma ia ave le lagolago i taumafaiga a le Malo o loo feagai ai i le taimi nei.
Peitai na ta‘ua e le alii Pulenuu o Lepea o A‘i Vavao, e le o fiafia i le faaiuga ua iai nei ona o le finauga lava a Lepea ia amanaia le lumanai o le nuu i ana tupulaga lalovaoa ia e tuputupu a‘e ae o lea ua toe aveese isi fanua o le afioaga ona o le faalautele ai o le alatele a le Malo, peitai e tatau ona mautinoa e iai se faamanuiaga e toe foi atu i le afioaga ona ua alu eleele.
O le faagasologa o le faalautelega o le alatele, ua tele afioaga ua faapea ona faaali faaseā ona o le manaoga lea ina ia feiloai ma le Malo ma ia iai se seleni e toe sau i totonu o le afioaga. Ae e pei ona amata mai ai lenei taumafaiga a le Matagaluega o Galuega na faatalatalanoa lava afioaga e aafia i le faalautele ai o le alatele a le Malo, ma na ofo atu e lenei atina‘e seleni fua i le tele o fanua o aiga taitasi e aafia i lenei faalautelega. O le tulaga la lea ua vaaia e fai o lea sa iai maliega ma aiga taitasi ae o le faagaulemalie ua tele ina fofogaina e afioaga i pulega a alii ma faipule.
O le tali na ave e le Malo ia Aii o le itu lea, sei faatali le maua o se Tupufia, se tasi e pale mai i le suafa o le Faumuina, ona faato‘ā mafai lea ona faamautu mai se tali a le Malo e ala i talosaga ua mae‘a ona faato‘ai atu e le afioaga.
O lea mataupu o loo faaauau i luma o le Faamasinoga o Fanua ma Suafa.
