Ua uma le Aso Gafua ua mavae, aso 6 o Tesema 2010 na fuafua e saili ai se ta‘ita‘i o le Tautua Samoa e finauina le faigapalota o le tausaga fou, ae ua toe maua nisi faamatalaga mai nisi lava o lea faafaletui e faapea, o le aso 20 o Tesema e faato‘ā faatino ai lea fuafuaga.
E ui sa teena e nisi o sui faavae o le vaega faaupufai o le Aso Gafua na tea nei e filifili ai se ta‘ita‘i, ae ua oo mai se faamatalaga mai se molimau faatuatuaina e faapea na faia le filifiliga ma fulisia ai sui sa auai i le afioga i le Aloalii le faipule o Vaisigano Numera Tasi, Vaai Solia Papu Vaai.
“E pei na fua i se fua vai lagona o le matou mafutaga i lea afiafi, ona na taunuu le matou fetufaaiga i le tasi uma o finagalo i le afioga i le Aloalii”.
Peitai na faaalia e le molimau e lei talia e le afioga Vaai le finagalo o le mafutaga ona e lē o tāua ia te ia le tulaga ta‘ita‘i e sailia i le taimi nei, ae tāua le maopoopoga o sui auai aemaise lava i sui tauva mo le faigapalota o le tausaga fou 2011.
“E le’i faigofie ona talia e le Aloalii le finagalo o le mafutaga ona e lē gata e manao ia faamaopoopo muamua, ae ia fausia se vaega faaupufai e fusia i le loto gatasi ma galulue faatasi”.
Ua na o faipule e toalua o le Tautua Samoa o loo iai le finagalo o le Komiti Faafoe e tatau ona filifili mai ai se ta‘ita‘i o le vaega faaupufai, ua na o le afioga Vaai ma Palusalue Faapo II.
O le malaga sue tupe a le Tautua Samoa i Niu Sila i le masina na tea nei na laumanuia mai ai ni faamatalaga mai ia i latou na auai i le faafeiloaiga o le aumalaga, i le feteena’i o le Lealailepule Rimoni ma Palusalue Faapo II i le tulaga ta‘ita‘i.
“Pei o le mafuaaga lena na foi mai loa ma le matou malaga valaau le fono ma lafo i ai lo matou manao ua tatau loa ona sue se ta‘ita‘i”.
O le finagalo lea o se sui o le komiti faafoe ina ua maua se avanoa e talatalanoa ai i le tulaga o loo faagasolo ai tapenaga a le Tautua Samoa.
O Palusalue Faapo II ma Vaai Solia Papu o ni tamalii sa avea ma sui lagolago o le HRPP i nisi o paeaiga a le Palemene i tausaga ua tuanai. Sa filifilia ai foi i laua i tofiga minisita o le Kapeneta.
Peitai o le mae‘a o le palota o le 2006 na tauva faatutoatasi ai Vaai Papu lea na lagolago i le faatuina o le Tautua Samoa ina ua teuteu le tulafono o faigapalota ma valaauina ai palota laiti a Safata, Faleata i Sisifo ma Safata.
O Palusalue Faapo II i lona faato‘ā ulufale i le Palemene o le HRPP sa lagolago i ai, ae ina ua faia le fuafuaga a le Malo e sui le itu o le auala e feoai ai taavale, na ia tuua le HRPP ae see ane i le avea ma faipule tutoatasi ma mulimuli ai lagolago i le Tautua Samoa.
