O se faalavelave na maliu ai se tina a o taumafai e tuueseese ma lana pepe fou ua talia nei se feutagaiga i se taui ona ua tagi le tamā o le aiga i le tusa ma le $6miliona tala.
O se faalavelave ua tuuaia ai le tautua faafomai ma o le falemai i Tuasivi na tulai mai ai lea faafitauli ua atoa ai aso e lua o faatiga se tina ma iu ai ina maliu lea tina ma lana pepe fou. O se tina e toatolu foi lana fanau muamua o loo ola nei ma le tamā o le aiga.
O le tulai mai o lenei faalavelave na lagalaga ai foi ma le lē lava o tagata faigaluega e faia le auaunaga faatausi soifua pe faafomai foi i Samoa.
Ua leva lea faafitauli ae ua vaaia le amata ona tali mai o alii ma tamaitai ua a‘oa‘oina i le tomai faatausi soifua. E to‘a 21 i latou na faauu mai ma tikeri o le faatausimai i polokalame faale a‘oa‘oga a le Iunivesite Aoao o Samoa.
O lea aoga faatausi soifua ua faatautaia e le NUS faatasi ma Iunivesite i Ausetalia. I le to‘a 21 na faauu ma ua amata nei a latou auaunaga i totonu o Falemai eseese ua faafaigaluega ai, e leai ma se tasi o faauu mai i le tomai faapitoa o le faatosaga.
“O le faafitauli, e mae‘a le tikeri ona faato‘ā mafai loa lea ona faaulufale le suafa o se tausi soifua e manao e faaauau ana aoaoga i le vaega lea e ta‘ua o le post grad study,” o se faamatalaga lea a le tina ia Faamanatu Nielsen, le Peresitene o le Asosi o Tausi Soifua i Samoa.
“E tasi le tausaga e mafai ai ona saili le tusi lea ona faato‘ā foi mai lea e faataitai mo le tausaga atoa faato‘ā faamautu ai loa lona tomai lea.
O lona uiga e tusa lava ma le lima tausaga o tau saili le tusipasi lea o le tausi soifua ua mafia ona fai le faatosaga.
O le mafuaaga lea o le faigata tele ona faaopoopo le numera o nisi e faia galuega faatosaga mo fale failele o le atunuu”.
Faaalia e Nielsen, e iai faatosaga ae e lē taitai lava e tali atu i le tele o pepe e fananau i lea aso ma lea aso.
“O loo tele lava ina faaaogā tausi soifua matutua ua litaea e on-call i taimi e tele ai le tina e moomia faatosaga.”
O le finauga ina ia toatele nisi e faia lea auaunaga i le tomai faa-faatosaga, na ta‘ua e Nielsen na amata mai lava a o tausi soifua foi ia, i le vaitau o le 1970.
“E lei iai se faamuamua na ave i lea tomai faapitoa ae a fia faatino e se tausi soifua e lē mafai ona soona alu se tasi e faatino.
O matou la na a‘oa‘oina ma pasi i le tausi soifua o le galue ai i fale failele ma mulimuli i galuega a faatosaga sa iai i ia vaitaimi na mafai ai ona maua lea tomai.
Na oo loa i le taimi na talosaga ai le toatele o i matou e aloaia loa ma faamaonia lo matou mafai ona faatino lea auaunaga ae fai mai le tala e lē mafai seiloga e agai e fai ni suega faapitoa, ae ua fia tausaga o matou faafanau tina maitaga e lē fesiligia lava. O le totogi lava na mafua ai le faigata ona ausia lea maualuga i le tomai faatausi soifua”.
O se tetee a tausi soifua i lea vaitaimi ua lē o ane e faigaluega, na faamalosia ai loa ma le faatinoga o a‘oa‘oga ma faamaoniga o le tomai faatausi soifua faatosaga.
O se tomai faapitoa auā ua leai se eseesega ma fomai – o le faatosaga i le vaitaimi lenei e mafai ona ia tusia mai fualaau poo togafitiga e manaomia e se tina ma‘itaga ae o le faafitauli lava lea o le umi ona taumafai tausi soifua e saili le tusipasi e mafai ai ona faatino lea auaunaga ma totogi ai i le maualuga lea o lona tomai.
“Ua iai le fuafuaga a le Asosi o Tausi Soifua e talanoaina i lana fono faaletausaga o le tausaga lenei, le unai o le aveese o le isi tausaga faaopoopo lea e tau saili ai le tomai faafaatosaga, ae ia alu sa‘o lava le tikeri lea e tolu tausaga o saili ai, ma aofia ai loa ma le a‘oa‘oina o lea tomai ina ia mae‘a le tolu tausaga, o ai foi lava e saili le tikeri o le faatausi soifua, ia tatau lava ona faia ma a‘oa‘oga nei o le faatosaga.
Seiloga e fai faapea ona mafai lea ona vaaia le toatele o tausi soifua e mafai ona faia le auaunaga a faatosaga,” o se saunoaga lea a le Peresitene o le Asosi.
“E lē taitai lava, e tele atu tausi soifua ua faia lava na o general nursing ae e lē o toe iai lava ma se manaoga e agai i le faatosaga se agavaa ona o le isi foi lua tausaga o le a faatalitali ai”.
E ono iai se faigata o lea faamoemoe o le Asosi ona o lea e tatau ona faamautu uma mai ni suiga o le maualuga o a‘oa‘oga mai i le Pulega o Faailoga tau a‘oa‘oga a le atunuu le Samoa Qualifications Authority. Se‘i vaganā la ua mafai mai i le SQA se tulaga faapea ona mafai lea ona iai se suiga i faiga faavae ua iai nei.
Ae na ta‘ua e lenei tamaitai, a leai se suiga, e leai foi ma se faaopoopoga o tausi soifua faatosaga. “Ma ono tulai mai ai lava foi ma mataupu e pei ona laga e le aiga lenei, auā e tuuaia lava le lē lava o tausi soifua e iai tomai faapitoa nei.”
