Ina ua ioeina e le SANZAR se avanoa mo se isi au e tasi e faasefululima i ai au mo le taamilosaga o le Super 15 o loo fuafua e amata i le 2011, ma e patino foi iuni lakapi o loo tuu atu i ai la latou faaavanoa mo le talosagaina o lena avanoa mo se au e tasi e faaopoopo mai.
O lenei taamilosaga e pei ona faagasolo i le taimi nei, ua na o au mai kalapu iuni lakapi a Aferika i Saute, Niu Sila ma Ausetalia o loo aofia ai, ma o le ioeina o se isi au se tasi e toe faaofi mai totonu, ua toe tuu atu ai foi le avanoa mo nei lava atunuu e tolu e talosaga mai, ae ua faaopoopo atu loa i ai ma le avanoa na faailoa ia Samoa e ono talosaga mai ai mo sana au.
Peitai ua faaalia i nisi o tusitusiga se finagalo o le faauluuluga o le iuni lakapi a Samoa, le susuga Su‘a Peter Schuster, e lē o iai se fuafuaga a Samoa e faia mai sa latou talosaga i lea avanoa mo le Super 15.
Sa iai foi nisi o finagalo na faaalia pe mata e ono tuufaatasia se au mai motu autu e tolu o le Pasefika lea e muamua i le lakapi a le Pasefika, e pei o Tonga, Fiti ma Samoa.
I se faatalanoaga na faia i luga o le leitio a le NewstalkZB na faailoa ai e Schuster, e le taitai mafai ona faamaopoopo se au lelei ma le malosi mai le Pasefika i tulaga o loo faatalitalia i lenei taamilosaga, i totonu o lea taimi puupuu ua tuuina atu.
Ae na ia taua, atonu e iai se faanaunauga o le iuni a Samoa pe afai e toe iai se isi faatelega o lea lava taamilosaga i se taimi o i luma.
O le filifiliga o se ‘au lona 15 mo le Super Rugby o le a faamautinoa i le aso 15 o le masina o Novema.
