Ua toe lua nei masina ona pa lea o le fana i le faigapalota a le tatou atunuu e pei ona vevesi ai suitauva o itumalo taitasi e saili se tasi e ono agavaa i le nofoa o Tavita auā se sao o le nuu ma le itumalo i totonu o upufai a Samoa. Ma ua silasila foi nuu ma tagata palota i le sui o loo malosi lana galue ma faia galuega e tali ai le manaoga o tagata.
O le itumalo o Aiga i le Tai e tolu sui tutu‘a o loo taufetuli mai ai, o le susuga ia Leiataua Mulipola Oliva sa auai i le paeaiga i nisi o tausaga, o le susuga ia Ifopo Matia Filisi o loo nofoia le nofoa i le taimi nei, faapea Mulipola Leiataua Tagoiaega Laki o lona taimi muamua lenei ua faaofi ai i le sailiga o le tofi.
E lē o faigofie le faiga filifiliga a le Itumalo ae na saunoa Mulipola Leaiatua Tagoiaega Laki e iai lona talitonuga e telē se avanoa na te ausia le manumalo o le nofoa auā ua leva ona faataoto le tele o ana galuega mo le itumalo aemaise ai o loo tautala lava galuega e pei ona ia faatinoina mo le manaoga o tagata. O le tausaga 2006 na ia suaina ai le paipa e alu i Salua i Manono Uta pe tusa ma le 1700m le mamao, ae o le 2013 na ia faia ai se polokeki mo tanevai e 20 auā nisi o aiga o le afioaga. Na ia tautuaina foi le tele o tagata e ala i lana auaunaga o le Advance Custom Agency Samoa i faamomoli mai vaa ma le tiute lea ua 15 nei tausaga talu ona tautua ai.
Ae lē gata i lea o loo faia fua le faatinoina o pepa malaga mo visa o tagata femalagaa‘i faapea ma tusifolau o loo ia fesoasoani ai, ma le liliuina o tamaiti, ma o nei galuega uma o loo faia lava mo totonu o le nuu ae ua faasafua lea manuia mo le itumalo atoa. 2015 ua mae‘a ona ia faaleleia moli sa faaletonu i Manono Tai lea sa ia talosagina ai le EPC e sui uma moli sa faaletonu faatasi ai ma isi moli faaopoopo auā lava le faamalamalamaina o le aai.
E 10 uafu o loo i Manono Tai na ia asia faatasi ma le pulenuu e leai ni moli ma o le tasi lea vaega o loo tutupu ai faalavelave i le feoaiga a vaa i lea afioaga, ma ua talia foi e le malo lana talosaga sa tauala atu i le EPC e fia faia moli mo nei uafu uma faatasi ai ma uafu autu e lua o loo i Manono.
Ma o lona talitonuga e tupu lea manuia a o lei faia le palota ia Mati o le tausaga fou. Ua taoto foi le talosaga mo le 200 eka i le Esetete auā lava aiga o Manono Tai ma Manono Uta e faamautu i ai aemaise le faaaogāina mo le totōina ai o meaai auā le fofoga taumafa.
O le tasi o galuega o loo ia vaavaai i ai o auala galue ua tele le faaletonu ae manaomia le toe faaleleia, auā o Manono lava ia ua tatau ona soo faatasi uma auala i pitonuu e tolu ina ia faigofie feoaiga.
O loo faaletonu foi le suavai i totonu o Aiga i le Tai ma e manaomia nisi faatanoa i totonu o Mulifanua, Apolima ma Manono ina ia lelei le suavai e maua e tagata uma.
Saunoa le suitauva na ia tapena mai ia Fepuari i le faia lea o ID palota a tagata, ma o le manaoga foi o lona nuu ua alagatatau ona ia tauva mo le tofi. Ua ia maitauina foi le toatele o tagata e lē mafai ona palota pe a fai palota i tausaga taitasi ona e leai ni taavale e pikia latou i le aso o le palota, ma o le tasi lea vaega ua ia vaavaai mamao i ai ia lava taavale auā le felaua‘iina o tagata palota.
O nei tapena uma o loo galulue faatasi ai ma lona aiga faapea lona nuu ma le itumalo, ma o le auga foi lea o lona faamoemoe i lana sailiga tupe lea sa faatinoina i le hall a le Nga Tapuvae i le aoauli o le Aso Toonai, o le sailia o le seleni auā lava ana sauniuniga mo le palota.
Na matagofie le tali atu o aiga ma uo ma ē masani e lagolago le faamoemoe. O le susuga i le Misionare a le Ekalesia Metotisi ia Rev Fogaega Mapesone na ia taitaia le polokalame i le sauniga lotu, ae o le uso matua o le suitauva le susuga ia Mulipola Aitofea na fai ma fofoga o le aso.
O ipu a aiga, uo ma ē masani na faatinoina i lea aso, na taulima ai e le suitauva o Aiga i le Tai le seleni e $24,550.70. O le agaga faafetai o le susuga ia Mulipola Leiataua Laki na ia saunoa ai ma le agaga o le loto maualalo e faafetaia le mamalu o le Itumalo, o aiga ma uo sa lagolagoina lona faamoemoe.
Ma sa ia saunia foi ni meaalofa mo le mamalu o Samoa na auai e ala i le malo sa tatalaina e talimasineia ai le maau ma le milomilosia.
