Na felanulanua’i le taeao ole Aso Toonai na tea nei ile toatele ole mamalu ole atunuu na aga’i atu e lagolago le polokalame e tetee atu ai ile gasegase ole suka i totonu ole atunuu.
Ole polokalame lenei na faamoemoe e faia ai ile Aso Toonai 10 o Fepuari, peitai ole pagatia ai ole atunuu ile afā o Gita na mafua ai ona toe tolopo mai ma faataunuu ai ile Aso Toonai na tea nei, 3 o Mati ile fale Samoa o tagata tafafao maimoa mai i Samoa, ile taulaga i Apia. O lenei polokalame na taulamua ai se tasi o faalapotopotoga ua faaigoaina ole 1Touch Ministries lea oloo taulamua ai le susuga ile faafeagaiga ia Pastor Lenny ma Tai Solomona.
Ole vaega lenei ole 1Touch Ministries, oloo latou faatautaia ni polokalame tau faamalositino e pei o Bootcamps i afiafi taitasi ma faamalositino ua faaigoaina ole Tabata e faia ai ile fale koleni ole JP i Vaimea.
Ole misiona a lenei faalapotopotoga ina ia maua e Samoa ma ona tagata le soifua maloloina e ala ile faamalositino ma le taumafa i meaai paleni. Ma ua toatele molimau ola o lenei polokalame e ala ia i latou na afaina ile suka ma le toto maualuga, ae ua suia atoa ma tafiesea ia gasegase ina ua mulimulita’i ai i polokalame ale 1Touch Ministries.
Na amata le polokalame i lea taeao ise sauniga lotu na taitaia ai e le susuga ile faafeagaia ole Ekalesia Metotisi i Matafele le susuga ia Rev Taumafai Komiti, ma ose feau tāua na momoli ile lauga ale faafeagaiga, ua uma le taimi ole talanoa soo i puipuiga ole soifua maloloina ma le faaitiitia ole gasegase ole suka, ae ole taimi lenei ua tatau loa ona tutū i luga ma faatino. Ua toatele fanau talavou a Samoa ua maliliu ona ole gasegase lenei ole suka, ae tasi lava le pogai, ole lē fuafua lelei ole taumafa. Saunoa le susuga ile faafeagaiga, e toatele lava tagata ua soona aai ma maua ai ile tino lapoa, ma ua na’o le taavalevale solo ma tauvalaau tamaiti i feau ale aiga, e fautua atu iai le tina ole aiga, ua tatau ona alu e faamalositino ae sau le tali masani, tatou te feoti uma lava. Fai mai le faafeagaiga, o iina tonu lea mafua ai le faapogai lenei, e moni tatou te feoti uma lava, ae e lē manao le Atua ete oti faavalevalea, ete oti ile soona taumafa. Ole faamalosiau ale faafeagiga ua tatau nei loa ona fai se galuega mo se Samoa soifua maloloina.
Ole afioga ile Minisita lagolagoa ole Matagaluega ole Soifua Maloloina o Salausa Dr. John Ah Ching na fai ma sui ole Malo e saunoa ai ile autu o lenei faamoemoe. Ta’ua e Salausa, ole tasi lenei o gasegase ua tele tupe ale malo ua faaalu ai mo togafitiga, ae leai lava se isi mafuaaga ma le faapogai, ole taumafa lava, ma oloo maualuga foi le fuainumera ole atunuu ua aafia ai soifua ile gasegase lenei ole suka.
Ole lu’itau ale alii fomai ia Salausa, e lē tatau ona toe talanoa ini auala e puipuia ai ae ua tatau loa ona faatino ona ua tele tausaga o pisapisao mai ai le soifua maloloina e faatatau i puipuiga ole ma’i suka. Ole polokalame lenei na lagolago malosi ele ofisa ole Amepasa ole malo o Amerika i totonu ole atunuu, ma na auai ai foi ma le Amepasa o Amerika i lea savali tele le susuga ia Tony Greubel. Ile mae’a ai ole sauniga amata, ona alu lea ole solo tele lava mai luma maota ole malo agai i Matautu ma toe liliu mai ai ile fale Samoa o Turisi e pei ona faatino ai le faamalositino ole Tabata mo tagata matutua, ma taaloga faamalositino mo le fanau laiti.
Na auai ai foi ma sui e to’a 20 ole Fika Fou ale TV1 i lenei savaliga tele, aemaise ole toatele o mātua ma fanau na savavali ai. O nisi iloga ole atunuu na taulamua ile savali lenei, ole afioga ile Minisita o Fesootaiga, Afamasaga Rico Tupai, Muliagatele Brian Lima, sui ole ofisa Amepasa o Amerika, sui ole WHO, faauluuluga o Matagaluega ale malo ma le mamalu lautele ole atunuu. Ole uluai taimi lenei ua faataunuuina ai se faamoemoe faapenei e tetee atu ai ile gasegase ole suka.
