Ole mae‘a ai ole fono tele ale Ekalesia First Samoan Revival Church ile faaiuga ole vaiaso ua tuanai na autasi ai lagona male faiga filifiliga ale Ekalesia aoao i Ausetalia ma Niu Sila e filifilia le susuga ile faafeagaiga ia Rev Gasu Misikupa mai le Ekalesia i Otahuhu e tauaveina le tofi taitaifono ale Ekalesia aoao i lenei paeaiga ma isi tausaga o lumanai, ae tumau pea le tofi failautusi e pei ona tulai mai ai le susuga ile faafeagaiga ia Ausage Mumu Valeli, male tofi teutupe ile faafeagaiga mai Sini ia Viiga Faamatuainu.
Ole tofi taitaifono na seei muamua mai ai le susuga ile faafeagaiga ia Fetineiai Leafa Faasisila mai Sini ile fā tausaga ua mavae, ae peitai ua suia lenei tofi ina ua usuia le fono tele ale ekalesia i lenei tausaga.
Ole Aso Tofi na tatala aloaia ai le usugafono lenei ile hall i Otahuhu ile nofoaga oloo fai ai sauniga ale ekalesia ale susuga ile faafeagaiga ia Rev Gasu Misikupa male faletua ia Pisila Misikupa, ma sa auai uma mai ai susuga i faafeagaiga ma o latou faletua faapea le au usufono filifilia mai ekalesia e ono, a lenei matagaluega i aulotu e tolu mai Ausetalia e aofia ai Melepone ma Sini, faatasi ai ma aulotu e tolu i Aukilani nei e lavea ai Otara, Avondale ma Otahuhu.
Na muamua le fono a toeaiina ale ekalesia, ona sosoo lea male fono ale aufaigaluega ma o latou faletua, ae mulimuli ai le fono lautele faatasi ai ma sui usufono filifilia mai ekalesia eseese e saili ai le tofa mamao auā nisi auala ma metotia e faatupulaia ai le manuia ma saga faalautele ai le faleie ole galuega ale Atua.
O nisi o mafutaga lelei i lea koneferenisi ua maua ai le avanoa e mafuta ai tina ile latou foi itupa e faasoa ai ini anavatau lelei e ono fautua ai taitai poo susuga i faafeagaiga oloo tulai mai ile taitaiina ole lafu mamoe, aemaise ai o i latou ole pae male auli latou te faamafolafolaina ni faaletonu e ono tulai mai ile galuega.
Ole Aso Toonai, ole aso faapitoa lea mo autalavou taitasi ma aoga Aso Sa, na faasoa ai foi lo latou sao ile tāua ole galuega faaleautalavou i totonu ole ekalesia e ala ia latou aitema. Ma ose auala tāua foi lea oloo faaaogāina ai fanau ile tāua ole taleni male meaalofa ua tuuina ai ele Atua ia i latou.
Na taualuga polokalame o lea aso e ala i faaaloaloga poo le valevale alofa ale ekalesia i Otahuhu male pulega i Aukilani mole ekalesia aoao, e lē gata ile tulai mai ole taitaifono fou ia Rev Gasu Misikupa ile taitaiina ole Ekalesia aoao, ae ua faamavae ai foi Rev Fetineiai Leafa Faasisila mai le tofi.
Ole Aso Sa, 2 o Oketopa, ole aso mulimuli lea ole fonotaga sa usuia ile Ekalesia i Otahuhu na faauuina ai loa tofi fou ole Ekalesia aoao. Ole susuga ile faafeagaiga ia Fetineiai Leafa Faasisila na ia taitaiina le sauniga ae ole taulaga ole faamanatuga na taitaiina ele faafeagaiga mai Melepone le toeaina ia Faiumu Faletuai.
Ole upu faauuina ale Atua na saunoa iai le taitaifono fou ale Ekalesia ia Rev Gasu Misikupa, lea sa ia faamamafaina ai i lana saunoaga le manaomia o tau‘au ole Ekalesia e tausoa faatasi le galuega.
Ole galuega faaletaitai e lē māmā e fai si mamafa, ae faalagolago ile galulue o tagata uma e māmā ai le avega. Na mae‘a le sauniga ona faaauau lea ole mafutaga e ala ile toonai faatasi na saunia ele pulega i Aukilani, ma tapunia aloaia ai loa le koneferenisi ale Ekalesia. Saunoa Rev Gasu Misikupa o tausaga taitasi ole a usuia ai fono ale ekalesia, ae ole nofoaga i Otahuhu ole a tapuvae tasi uma iai fonotaga ale First Samoan Revival Church. Ua suia foi le masina o fono e pei ona masani ai ia Setema, ae o lea ua tuu mai i luma ia Iuni, ona ua fai si latalata tele ile faaiuga ole tausaga.
Ua iai la le faamoemoe ole tausaga fou ile alofa male agalelei ole Atua, ole a toe maua ai se isi mafutaga faapenei ale aufaigaluega ma o latou faletua ma ekalesia taitasi ile masina o Iuni mole isi Koneferenisi.
