Na faamae‘aina toe sauniga ma peau faamavae o le tina matua ia Aimalefoa Teva Leapai Seleni Muliaga mai Savaia Lefaga i le Aso Lulu, aso 9 o Aperila. E tuumalo le afioga ia Fuatino ua 93 tausaga o lona soifua i le Aso Lulu aso 2 o Aperila, ma e to‘a 14 le nofoaalo ae to‘a 225 i latou na tupuga mai ia te ia ma le tamā ia Muliaga Tusani lea ua fai-i-lagi uma a la folauga.
Sa faataunuuina i le Ekalesia Aso Fitu Samoa Tutoatasi i Bell Bird Park. O le upu faalaeiau o le sauniga faaleaiga sa saunia lava e le susuga i le Toeaina ia Lelea Faauuga Muliaga, o le alo lava o le tina matua mai Niu Sila, faatasi ma nisi o faafeagaiga sa lagolagosua i luga o le fata.
O toe sauniga faaiu na fai sao ai faafeagaiga faapea le susuga i le taitai Matagaluega ia Pr Lagolago Levae, sa saunoa i se upu faamalosi e faalototele ai aiga faanoanoa. E toatele aiga na malaga mamao mai Samoa, e pei o le afioga i le Sa‘o o le aiga i Savaia Lefaga, Leapai Lau Ilaoa Asofou Leapai Tautalasoo, o ia o le Pule (Vice Chancellor) o le Iunivesete Aoao a Samoa, le Papaigalagala.
Na malaga mai foi nisi o tauaiga, alo ma fanau mai Niu Sila ma Samoa faapea nisi vaega o Ausetalia. Na maualuga le aso faapitoa o le tina ia Aimalefoa ona sa auai foi le toeaina faatonu o le Matagaluega EFKS Kuiniselani le susuga ia Rev Elder Kerita ma le faletua ia Binary Reupena faapea nisi o faafeagaiga sa auai.
O le fetalaiga ia Leautuliilagi Malaeoalii Vaa Leapai sa fai ma fofoga o le aso faaiu, ae o le afioga i le Sa‘o o le aiga mai Samoa le tofa ia Leapai Samuelu sa fai ma sui o aiga na lua e faaleoina faaaloaloga Sa tofusia foi le gogo ma si ana i‘a e ala i seleni paia.
O le tofa ia Poulava Sam ma Lorna Matautia o le Uncle Sam’s Take Away sa tapenaina le fofoga taumafa.
