“Aua, aua lava nei ia te i tatou le viiga, ae ia faafoi lava ile Atua lona lava viiga”, ole saunoaga amata lea ale susuga ile faafeagaiga ia Tavale Matai‘a ma lona faletua ia Alison Matai‘a ina ua faateia i laua ile taunuu atu ile hall ale Voice of Christ i Magele ile po ole Aso Faraile, 25 o Novema, oloo tumutumu ai le mamalu ole atunuu ae faapea i latou ua ta‘ua o sui ole Aluminai, o i latou na faafailele ma fofoa mai o latou soifua faaleagaga ile YFC Samoa poo le Youth for Christ i Samoa a‘o avea ai lenei taitai ma faatonu ole autalavou mo Keriso i Samoa.
Ose lagona maualalo i luma ole Atua na vaaia i lenei auauna ma lona faletua ina ua tauaaoina atu iai ele afioga ile faipule ia Aupito Su‘a William Sio se meaalofa faapitoa na saunia ele Aluminai YFC Niu Sila e faailoa atu ai le agaga fiafia ma le loto faafetai o sui ole Aluminai i lana tautua matavela ma lana tautua lē faalogologo tiga a‘o ia faavaeina mai ai lenei galuega ile tele o tausaga.
E lē gata i lea ua avea ai foi lenei laolao lelei e momoli ai ma alofaaga ma faamanuiaga a lenei faalapotopotoga ile susuga ile faafeagaiga ile atoaga o lona 70 tausaga. Ile saunoa ai ole susuga ile faafeagaiga na ia faapea ai, e faateia i laua i lea po ile tumutumu o tagata, e leai so laua lagona ise mea e tupu faapea, ae momoli ai lona agaga faafetai i susuga i faafeagaiga ma o latou faletua faapea sui uma ole Aluminai YFC Niu Sila, e tusa ai ma le loto tetele ma le faamaopoopo i lenei itutino ole galuega ale Atua, auā e iai lona talitonuga e ese foi le Misiona na tuuina mai ele Atua e taiala ai le fausiaina o agaga o tupulaga talavou ma tagata uma mo le malo ole Atua.
Na saunoa le afioga ile faipule ia Aupito Su‘a William Sio, e momoli lana faafetai ile faafeagaiga ia Tavale Matai‘a e tusa ai ma le Misiona ua faatino ma faagaioi ai lenei galuega, auā e fou lana faalogologo i lenei faalapotopotoga, ae iai foi lona lagona ole a fesoasoani malosi le Aluminai YFC Niu Sila ile malo auā le tapueina ma le faamalosia o agaga o tupulaga talavou i lenei atunuu.
Ole susuga ia Rolani Mika ose tasi o tamalii ua leva tausaga o galue ai i totonu o lenei mafutaga i Samoa ae sa avea foi ma pule ole leitio ale Laufou na fai ma sui ole Aluminai nate faamanino ma fofola le tele o galuega lelei sa faatinoina ele YFC Samoa seia oo mai lava ile taimi nei.
E lē gata i lea o lona toe faapupula atili ole amataina ole galuega lenei ale Autalavou mo Keriso mai lava ile amataga lea ua toatele ona sui ua avea ma faifeau aemaise ai le toatele lea ua galulue fesoasoani i totonu o ekalesia, faatasi ai ma lana leitio kerisiano ole Laufou ole Talalelei.
Ole mafuaaga foi lea e lē mafai ona galo pe aveesea ai mafaufau ole toatele o tamā ma tina aemaise o tupulaga talavou i lenei mafutaga ona ua fai ai ele Atua ni mea lelei io latou soifua.
Ole susuga ile a‘oa‘o ia Tavai Meni sa fai ma fofoga ole po, ma o ia foi sa faafeiloaia le mamalu ole atunuu aemaise o susuga i faafeagaiga ma o latou faletua sa auai. E tele ni faafiafiaga eseese na saunia e tupulaga talavou ale Aluminai sa faamalieina ai le silasila ale auvalaaulia ae taualuga ai ile sasaaga ale susuga ile faafeagaiga ia Tavale Matai‘a ma lona faletua faapea le faipule ole itumalo o Magele.
Ile aotelega o lenei faamoemoe, ole latou dinner lea, e saili tupe ai auā le faaleleia atili ole auaunaga ale leitio ole Laufou i Samoa, ma le toe pueina lea ole CD 2 ale Aluminai, ae faapea foi sana malaga faamisiona i nisi o atunuu, ae ua avea foi lenei faamoemoe ma avanoa maualuga ile toatele, e toe mafuta ma tuufaatasia ai le tino o Keriso o i latou sa amata asaina le gasū ole taeao i lenei mafutaga.
Ua toe faamanatu tala mai tausaga sa latou maua ai le uluai alofa o Iesu ae lē gata i lea o mafutaga poo Bible Study sa fai ma vaisu ia i latou e mafuta ai a‘o talavou le olaga.
