O le po o le Aso Toonai na tea nei sa feiloai ai tamafanau a le afioaga o Moataa i Sini aua le soalaupuleina o se talosaga mai a lana aulakapi Taitoafitu i Samoa.
O lenei talosaga o se auala e fesoasoani atu ai le mafutaga aua le Malaga mai o le Taitoafitu a le Togoaasa i se valaaulia mo Melepone ia Setema.
O lenei tauvaga o loo faamaopoopo e le Kalapu Lakapi a Melepone Samoa lea e taulamua ai se isi alo iloga o le afioaga, ia Matamua Filipo Saena.
O le Maota o le Tofa ia Savae Sika Tofaeono i Kellyville na potopoto ma toe faamanatu ai vaitau o taaalo sui na iai e pei o le Afioga Aliimuamua Roma Penita, Manu Seiuli Kalifa, Opele Lui, Pii Faapoi, Vaiomanu Sefo, Jerry Uesele, Leuluaialii Tagiilima, Tino Faapoi, Iona Atiifale ma le Tofa Manu Tuvanu.
Na laualuga le faamanatuina o tausaga na tulaga maoae ai le kalapu i Siamupini o le Taitoafitu faalevaomalo a le Malisi i vaitaimi o Michael Jones.
E le gata i le fitu faapea foi le taamilosaga sefululima.
O sui o le kalapu a Moataa na iai i le uluai Siamupini a Samoa i le Tauvaga iloga i Hong Kong i le 1993 e aofia ai Filipo Saena, Aneterea Aiolupo, Lolagi Koko, Danny Kaleopa, Junior Parramore, Alefaio Vaisuai, Taufusi Salesa ma Marina Schaafhausen.
O le Taitoafitu a le Malisi na amata i le 1988 lea na suipi ai Moataa.
Na masii atu ai au malolosi mai fafao aemaise tama iloga o le Olopeleki ia John Kirwan, Zinzan Brooke, Terry Wright, Vaaiga Tuigamala.
Na sosoo ai ma le toe suipi i le 1989 lea na auai atu ai Glen ma Gary Ella, Roger Gould, Willie O o le Wallabies. O le vaitau lea na oo atu ai foi Waisale Serevi ma le toatele e pei o Eric Rush.
O le susuga ia Lolo Lui na ia kiki le polo lea na suipi ai le Manu Samoa i le tauvaga aoao i le 2010 mo le taimi muamua.
O nisi sui mai Moataa na iai mai le 2007 e aofia ai Lolo, Apelu Faaiuga, Morgan Salesa ma Lia Palala.
Na saunoa le Afioga Aliimuamua Roma o se avanoa lelei tele lenei e toe faafoi ai se sao i le aulakapi a le Afioaga na fesoasoani i le atinaeina o olaga o le tupulaga e pei ona maua ai konekarate. O le sao foi o le kalapu i le Manu Samoa e le toe faamatalaina mai tausaga ua tea seia oo mai i le taimi nei.
Ua nofo sauni foi Melepone aua le taunuu mai o Naenae lea o loo taalo ai lava le susuga ia Lolo Lui, Falemiga Selesele ma le latou uigi talavou ia Logo Punefu. O le isi Fono o le a tofia ai tulaga eseese aua le tapenaina o sailiga seleni mo lenei faamoemoe mo se fesoasoani i le masii mai o le au malosi.
O numera e faafesootai ai Moataa i Sini o le: 04 3258 5056 poo le 04 2171 5668.
