O le tautinoga lea a le alii Initia o Shiv, na tautino ai ma talatala ai lona agaga faafetai tele i le mamalu o tagata Samoa, aemaise o tagata Tonga.
O le faafetai a lea alii fai pisinisi Initia, na ia ta‘ua ai ma faalautele lona manatu ma lona talitonuga, e iai ona aiga i le Pasefika. Ua silia nei ma le 20 tausaga o loo tautua pea ma auauna lenei alii faipisinisi i totonu o le itumalo o Otara.
Na taliga fia logo le faamatalga a lea alii i se feiloaiga ma le Samoa Times. Sa amata lana tala ma toe faatepa i tua i le tausaga na talepe ai e tagata gaoi lona faleoloa, ae faato‘ā tau amata lava i Otara i luga o le auala o East Tamaki.
O se vaaiga uigaese sa faateia ai lona tagata atoa ai ma lona aiga ina ua tupu lea faaletonu. Na talepe ma taei faitotoa ma faamalama o lona faleoloa, ae ave uma tupe ma le tele o oloa, e pei o sikaleti ma isi.
O lana mau e faapea e oo atu i le $50,000 le faatupeina o oloa na ave faamalosia ma gaoia, ae i le va o le $10,000 i le $20,000 le tino i tupe sa ave faatasi ai i lea gaoiga. O se tulaga sa matuā pagatia ma mafatia ai lona aiga, ona e leai se inisiua sa faia ae o le pisinisi foi faato‘ā tau amata e lei iloga ona iai se tupe faasili. O lana seleni sa amata ai le pisinisi ma lona faaoloaina lea na gaoia e le augaoi ma le autalepe fale.
Sa popole tele ma atuatuvale i le tulaga na tulai mai, ona o le taimi lea e lei iai ni ana uo ma nisi e masani ai, o ia foi e fou i totonu o lea aai. Sa atili ona mafatia ona e lē gata i le toesea o meatotino ma tupe, a o le leiloa pe faapefea ona toe fai le pisinisi ma saili se fesoasoani mo le toe faaleleia o le fale.
Sa ia ta‘ua, a o iai i faanoanoaga ma le tiga o le loto i le mea na tupu, ae faafuasei ona taunuu atu ni tagata ma fesili ia te ia poo manaomia se fesoasoani. Sa ia tali i ai ioe o loo matuā manaomia tele.
O le taunuu atu o Samaria Agalelei, e lei toe faatafa ae amata loa ona galulue ma valaau i nisi o a latou uo e agai ane ma toe fau le faleoloa. O faitotoa sa taei ua toe faaleleia, o faamalama foi o le fale sa faaleagaina, ua toe fausia ma ua pei lava e lei tupu se faaletonu.
E lua ni aso sa faataunuu ai le galuega ma toe tulai mai ai foliga o le fale sa iai. O nisi sa ofo mai foi ma tupe, e oo lava i le pusa e tuu ai tupe o le faleoloa, sa aumai e le isi tagata ia te ia, ma faapea ane e faaaogā i lona faleoloa. Sa tele ina faamautu ane tagata nei i lona faleoloa ma ua pei ai lava o sona aiga i latou uma. Ua oo lava i le po, seiloga lava e tapuni le faleoloa faatoa o foi i o latou aiga.
Ua solosolo manuia lana pisinisi, ma sa ia mafaufau foi pe faapefea ona toe fesoasoani i tagata nei sa agalelei ane ia te ia i le taimi o lona mafatia. Sa oo lava ina ia tatala i ai avanoa e fai ai a latou faatau ma ave oloa e fesoasoani ai i o latou aiga. Ua oo i maliu ma faalavelave tetele sa ia ofoina i ai le avanoa e ave ai oloa faaaitalafu e lē faatapulaaina. O nisi o tagata Samoa ma Tonga, sa fai maliu i o latou aiga, ma e oo atu i le tai $20,000 oloa faaaitalafu sa ia tuuina i ai.
A o le mea matautia e tasi lava le vaiaso pe lua foi ae mae‘a ona toe totogi ane tupe o faatauga tetele. O le isi lea auala ua matuā mafana ai lava le mafutaga, ma atili mautu ai lona talitonuga, o ona aiga moni lava nei i totonu o Niu Sila. Sa ia ta‘ua foi o le mea tonu lava lea e ta‘u o uo mamae, ona o le fesoasoani o le isi i le tasi. O le tele o taimi e lē tau faitauina tupe e toe totogi atu, auā sa iai lona faatuatuaga ma lona faamoemoega i tagata ia.
O le taimi nei, ua siisii i luga le pisinisi, ma ua oo ina faatu le fale ava poo le liquor store a le alii o Shiv. O le faailoga lea o le faamanuia ma le agai pea i luma o le taumafai o lenei tagata. Ua tatala foi le avanoa mo nonogatupe laiti mo tagata Samoa ma Tonga, mai lava i le nofoaga o loo iai i Otara. O nonoga tupe e oo lava i le tai $1000, ae le sailia pe tapa foi le tulaga o le totogi aitalafu (no credit check).
O se faiga sa ta‘ua e lea alii, e toe faafoi ai pe tali ai foi i le alolofa ma le agalelei o tagata Samoa ma Tonga ia te ia ma lona aiga. E lē gata i lea a ua faapea foi ona iai ni oloa ua faaaogā (secondhand goods) o loo ofoina mo tagata lautele i ni tau pa‘ū ma le maualalo, aemaise lava nisi o aiga faato‘ā tau amata ma aiga e vaivai le tamaoaiga ma tupe maua.
O le faamoemoe o Shiv i ana pisinisi uma o loo fai, o loo faatatau lava i manaoga o tagata Pasefika, auā o i latou lava foi ia o loo faaaogāina ana tautua ma lona faleoloa.
