E lē fesiligia le Manumalo o Joseph Parker

A’o faatalitali le lauina ole faaiuga ole fusuaga a Laauli Joseph Parker ma Hughie Fury, e toatele na popole ile faaiuga ina ne’i te’i ua lau mai le igoa o Hughie Fury. Ae ile tulimanu na matou iai ma isi tagata tusitala, na ioe i latou uma o Joseph Parker le igoa ole a lauina mai, ma na sa’o lava.

Pau le mea na tau faaluafesasi ai, ina ua lauina le sikoa muamua e tutusa, 114-114. Ole sikoa lea ale faamasino mai USA o Rocky Young. Ae na lauina mai loa isi sikoa e lua, 118-110 na manino ai loa iina le tagata ua manumalo, e lei taumateina lava o Parker le igoa o le a sau ile faaiuga ole folasaga. Na pau le faaupuga na faatalitali iai, poo le Siamupini fou poo le Siamupini ai pea, ae na manino lava, ole faaupuga na sau ole “Siamupini ai pea” (And still).  Na sisii lima ole vaega uma a Parker faapea foi matou mai Niu Sila ma Samoa, ma alalaga e pei oni tagata ua faasaoina mai ise faasalaga oti. Ua sisiva ma tiliususu solo i totonu ole Manchester Arena. Ole faaiuga tatau lava lea ole fusuaga, e leai lava se isi faaiuga e tatau ona iai.

Ae e lei taliaina ele vaega a Fury le faaiuga. Amata mai le faauluuluga ole pulega, Mick Hennessy, na ia ta’ua ai ua “gaoia le fusi mai ia Fury” auā i lona talitonuga, e mamao le manumalo ale latou tama. Fai mai Mick, e matuā manaia tele le fusuaga a Fury.

“E pei ua toe soifua mai le alii fusu o Mohamed Ali,” sa tatau ona manumalo Fury. Ae ole faaiuga 118-110, e le ose mea sa’o lea ona ole mamao o lea sikoa. Na ia ta’ua foi ole a latou apiliina le faaiuga a faamasino.

Na faapea foi faaupuga a Tyson Fury, le tausoga a Hughie, ina ua lau mai le igoa o Parker, na ia lafo ai upu faaletonu uma agai atu i laufali ma le itu a Parker. Ae ole taimi lea ua sisiva le vaega a Parker i totonu ole maea, na vaaia foi uiga lē migao ole pulega a Parker ina ua se’i e se tasi ole latou vaega le fusi mai lima o Parker ma avatu ia Fury.

Ile mae’a ai ole fusuaga na ma talanoa ai ma le laufali o Marcus McDonnell ile faletalimalo, na ia ta’ua ai le sa’o ole tagata na manumalo i lea po. I lana ia vaai, e matuā leai ma se tulaga e manumalo ai Fury, auā na sola ile fusuaga atoa. A’o loma le fusuaga na fesiligia ai ele Samoa Times tama fusu uma e lua i o la lagona ile fusuaga. Fai mai Fury, e manumalo ia ile fusuaga. Ae ole auala o lana manumalo ole tu’ioti ile taamilosaga lona fā. A’o Parker na ia ta’ua e manumalo o ia ile tu’ioti. E lei ta’ua e Parker le taamilosaga e tupu ai ae o lana tala e malo ile tu’ioti ile va ole taamilosaga muamua ma le sefulu lua.”

Mai le amataga ole taamilosaga muamua na iloa ai iina foliga ole po. E sao lava lau faasoa na ou faapea ai o lea sola Fury ile po atoa. E le mafai ona sao iai se tu’i oti se tasi pea e sola ile po atoa. Na maea loa le taamilosaga lona fa e leai se isi o laua na lavea ise tu’i oti ona ou iloa lea e umi le fusuaga.

Na amata mai le malosi Parker ile taamilosaga muamua na osofai ma savali i luma, ae sola i tua Hughie Fury. E tele tu’i na liai e Parker ae ole tele foi na tu’i na see ile tino o Fury. Na tu’i a Parker na lavea ai Fury, ae na sao mai foi tu’i a Fury ia Parker.

O osofaiga a Parker mai le mamao, na tulei ai Fury ile maea, ae ole vaai mamao atu o Fury ile sau ole osofaiga a Parker na mafai ai ona alo ma liai mai ana tu’i ia Parker. Ole faitau a le au Tusitala na malo Fury ile taamilosaga muamua. Ole tulaga foi lea ile taamilosaga lona lua ma le tolu.  Na faatoa amata ona manumalo Parker i taamilosaga ina ua oo ile fa. Na fosi e Parker le fusuaga ae ua amata ona fai ifo foi le malosi o Fury. Na manumalo Parker i taamilosaga uma e sosoo ai seia oo ile taamilosaga lona 9. E toe tasi le taamilosaga na manumalo ai Fury ole sefulu lea, ae maua e Parker le taamilosaga 11 ma le 12.