E lē o solomuli le alii Palemia susuga Tuilaepa Lupesoliai Sailele Malielegaoi i le tali atu pea i mataupu o loo lalaga mai e le Itu Agai ma le au faitofa o le atunuu.
O le mataupu lata mai o loo avea nei ma tumutumuga o finagalo faaalia, o le siitaga o loo fuafua le malosiaga faaeletise faatino i le totogiina o le uila poo le eletise.
O le finagalo o le au faipisinisi le Chamber of Commerce pe a faatino lea fuafuaga, o le a feagai ai a latou taumafaiga ma tulaga faaletonu tau tupe maua ma o le itu sili ona faigata o le palasi atu o le mamafa o le siitaga i tagata o loo faaaogāina le tautua a pisinisi i le atunuu.
O le itu mautinoa lava lea i soo se siitaga e faatino e le Malo o consumers poo tagata e faaaogāina auaunaga e mafatia. Peitai o le feiloaiga a tusitala ma le alii Palemia i le Aso Tofi ua mavae na toe afea ai i se finagalo o le taitai o le Malo le siitaga o loo fua o le eletise ma le faaseā ai o le aufaipisinisi ae sili ona faitioina ai e le Itu Agai.
Faaalia e Tuilaepa sa tuuina atu se fautuaga e le Minisita sa iai muamua o le malosiaga tau eletise na faailoa atu ai ile kapeneta ni tulaga faaletonu e ono aafia ai le auaunaga tau eletise pe a lē faatinoina nisi galuega mo le faaleleia o afi o loo gaosia ai le uila.
Na faatino ai loa e le Malo se galuega ma tapa ai ni fesoasoani mai fafo lea na aumai ai ni afi eletise suauu tetele, lea ua iai nei i le nofoaga fou o le eletise i Fiaga.
O lea atinae na tatala ma amata faaaogā i nai tausaga e lei mamao tele atu, o le a saga faaleleia ai lea tautua. O le fautuaga foi lea a le minisita i le Malo na folasia atu ai ma ni tulaga faaletonu tau tupe o loo feagai ma lea faalapotopotoga a le Malo ma e tatau ona faia i ai se galuega e foia ai.
O le finagalo o le Palemia afai o le siitaga o loo fuafuaina e tatau ona faatino e fofo ai ia faaletonu e tatau ona faatino, peitai e lei oo atu i le Kapeneta se lipoti o lea mataupu.
Afai o le a oo atu ae silasila le malo e talafeagai o le a faatino. O le faavae lea o lona finagalo e lē tatau i taitai o se faigamalo ona fefefe e fai le faaiuga tatau.
Na ia toe faamanatu mai ai le solo tetee a tagata faigaluega a le Malo i le tausaga e 1981 e mafua ona o le fiu e talosaga i le Malo e sii totogi ae lē faia ona o le fefefe o taitai o le Malo i lea vaitau e fai. Na fefefe foi e sii lafoga ma le totogi o tiute ona o le fefefe fai mai e alolofa i le atunuu.
O inā mafua ai le faaletonu o le leai o ni tupe a le Malo e totogi ai oloa sa aumai mai fafo ma gaogao ai faleoloa ua tau leai ni oloa, ma vaa suauu na faaalia e le Palemia na taunuu i le uafu i Apia ae tapa muamua le Mao i lea taimi e totogi muamua atu seleni o uta suauu e mafua ona e lei totogia isi uta na aumai muamua.
O le faaletonu na tupu ua leai se tupe a le Malo e pei ona saunoa Tuilaepa. O le mafuaaga foi lea e pei ona saunoa le Palemia e lē fefe ai le Malo o iai nei e faia siitaga o auaunaga ma le tau o le soifuaga ona e mumusu e toe tutupu mai faaletonu o tausaga ua mavae.
O atugaluga o le aufaipisinisi ona o aitalafu o loo fia totogi a le EPC e lē tatau ona aafia ai fua le tau o le eletise ona o le mea lava lea e palasi i le faalapotopotoga e pei ona faaalia e le aufaipisinisi.
O popolega o le Itu Agai e aafia le tau o le soifuaga pe a faatino le siitaga o le tau o le eletise.
