O Fesolai Faamolemole Sivatia, o se tasi o a‘oa‘o o le Ekalesia Faapotopotoga Iesu i Niutone i le matagaluega i Aukilani.
O le Aso Faraile na tea nei se tasi o aso tāua i le soifua auauna o le susuga Fesolai ina ua faaiuina ma le manuia le taumafai sa feagai ai i le itu tau a‘oa‘oga.
O Fesolai o se tasi o le aufaauu e to‘a 20 mai le Pacific Academy of Exellence na tauaaoina i ai o latou tusipasi (Certificate of Theology) i le mae‘a ai o a‘oa‘oga sa faatino mo le lua tausaga.
O le tulaga uigaese sa matauina i le faamoemoe lenei, o le soifua galulue ma le suesue o nai tamalii Samoa, o auauna foi a le Atua ma o latou faletua na mafai ona auai ai i lenei polokalame.
O i latou o le au faauu e eseese uma ekalesia e tapuai ai i totonu o Niu Sila nei ma se tasi foi mai Amerika Samoa e aofia ai ma taitai o nisi o ekalesia.
O le alii polofesa o loo faauluulu i ai lenei taumafaiga o Dr Father Stan Theron o le Dean foi lea o le aoga.
O le Pacific Academy o se tasi o vaega i totonu o le Polyethnic Institute of Studies ma e aotauina ai i mataupu tau le Tusi Paia e lē gata i le gagana peretania ae faapea foi i le gagana Samoa e pei ona iai le vasega faauu lea mo tagata o le Pasefika. O se faamoemoe na faatāua ai foi le soifua galulue o le aufaigaluega a le Atua i totonu o galuega o loo faafalelēmalu ai auā le folafolaina o le upu a le Atua i fata faitaulaga eseese.
E faatāua foi e le aoga le tutu faatasi o le auauna a le Atua ma le faletua, o se tasi o itu tāua mo i latou o loo galulue i totonu o Ekalesia.
O lenei a‘oa‘oga e pei ona saunoa ai le susuga Ata Simi o loo fesoasoani malosi i lona faataunuuina, ua mafai ona maua ai se fesoasoani mo i latou o loo auai i polokalame ma aoga faasemina i vaiaso taitasi. O le au faauu e pei ona faamanuiaina i tusipasi e pei ona faamaonia mai e i latou o loo tuufaatasia lenei faamoemoe e aofia ai faiaoga fesoasoani o Clarke Liu, Malu Soaemalelagi Faaea ma Fualilia Hakai Togiailua. O faafeagaiga o le susuga Jerry Robert, susuga Sope Sope, susuga Peter Baice, susuga Ioane Tuaimalo Vaega, susuga Falanai Apaui.
O isi e aofia ai Ata Simi, Alapati Niulevaea Simi, Seutatia Simi, Fesolai Faamolemole Sivatia, Solinuu Ross, Aliioleitu Lavea, Neru Faaalia, Amio Matue, Ropeti Salima Mamea, Vailili Salima Mamea, Sivasa Uiki Fesolai, Uiki Fesolai Toalua.
O loo tatala le avanoa mo nisi e fia resitala mo lenei tausaga i lea a‘oa‘oga ae o le molimau a nisi o le au valaaulia i lea aso tāua, e lagona le faagaeetia ona o le soifua galulue ma le leai o se tapulaa i le vasega faauu e ui ua mātauina le toatele ua silia ma le ta‘i 50 tausaga o le soifua ae o loo finau pea i a‘oa‘oga ma ua faaeaina ma tauia foi le tautiga sa feagai ai mai tausaga na aotauina ai.
Ae mo le susuga Fesolai Faamolemole, o le a lē gata ai ii le taumafai ae o le a faamoemoe foi i le pule faasoa a le Matai o i le lagi mo le malosi faaopoopo e tuli ai se ‘ai mo lenei foi tausaga ma le soifua finau i le galuega a le Atua. Malo le tauivi, malo le faamalosi i le vasega faauu…Viia le Atua.
