E lē faakonekarate tiute fai ole faifeau Toeaina

Le susuga ile faifeau ole EFKS i Ipswich i Perisipeni Ausetalia, susuga Kerita Reupena ma lona faletua, o lana loia ma nisi o lana ekalesia a‘o usuia le fono tele i Malua ia Me ole tausaga ua mavae 2015. O le ata na pueina ina ua mae‘a se tasi o vaega ole faamasinoga ma aumai le poloaiga ale faamasinoga e taofi le filifilia ose Toeaina faatonu e suia Kerita se‘i mae‘a le faamasinoga
Le susuga ile faifeau ole EFKS i Ipswich i Perisipeni Ausetalia, susuga Kerita Reupena ma lona faletua, o lana loia ma nisi o lana ekalesia a‘o usuia le fono tele i Malua ia Me ole tausaga ua mavae 2015. O le ata na pueina ina ua mae‘a se tasi o vaega ole faamasinoga ma aumai le poloaiga ale faamasinoga e taofi le filifilia ose Toeaina faatonu e suia Kerita se‘i mae‘a le faamasinoga

Ua faamalulu le afioga ile Faamasino Sili, Patu Tiavaasue Falefatu Sapolu i itu uma ole faamasinoga ile va ole susuga ile faifeau ole Ekalesia Faapotopotoga Kerisiano Samoa, Kerita Reupena, ma faifeau Toeaiina ole ekalesia EFKS, o sui ole Komiti Faatonu, ona ole tuai mae‘a o lana faaiuga tusitusia e faamalamalama atili ai mafuaaga o lana faaiuga na fofogaina i le masina o Me o le tausaga nei 2016. O lea faai’uga ua faaleaoga uma ai vaega na faavae ai le tagi a le susuga Kerita na faamalolo e le Komiti Faatonu a le Au Toeaiina lona tofi Toeaina ma le tofi Toea’ina Faatonu. Ua faaalia e le afioga i le Faamasino sili, ua tele ona tiute fai ma galuega o le mafua’aga o le tuai maua o le i’uga tusitusia. O le aso 3 o le masina nei o Aukuso 2016 na fato’a ma’ea ai le faai’uga tusitusia ma tuuina atu loa i loia ma itu sa auai i le suesueina o le talosaga a le susuga Kerita Reupena faasaga i le faai’uga ua aveesea ai nei ona tofi Toeaina ma le Toeaina Faatonu o le Matagaluega a Perisipeni (Brisbane).

Sa finau le loia a le susuga Kerita le afioga Leuluaialii Olinda Woodroffe, ua le silasila sui o le Komiti Faatonu o susuga i faifeau Toeaiina uma o le ekalesia EFKS, i le faia o le natura o le faimea tonu poo le natural justice ina ua faatino le latou faai’uga na faamuta ai le tofi Toeaina o le faifeau. Peitai i le faaiuga ua aumai e le faamasino sili ua faamalieina ai le faamasinoga i mau na tuuina atu e le alii loia o Cooke QC, sa tulai mo le itu a le Komiti Faatonu na ta’ua ai, o le faavae o le ekalesia EFKS o loo manino, e le faakonekarateina tiute o faifeau Toeaiina, ae e lima taitaiina i aiaiga ma tuutuuga poo conditions. E le agavaa ai le finauga a le loia a le itu tagi faasino i le afaina o le tulaga o tiute fai o le tofi faifeau Toeaina ile finauga o natura ole faimea tonu.

Ole auiliiliga o suesuega ale faamasinoga ile vaega lenei ona ole fesili pe o iai ile faavae ole ekalesia se aiaiga ose konekarate ile va male faifeau, poo se konekarate ile va o sui auai ole ekalesia. Na ioe le susuga Kerita e leai se aiaiga faapea.

O fesili ale loia ale ekalesia o Cooke QC, na tuusa‘o ai le fesili ile faifeau pe sa iai sona (Kerita) faamoemoe e faia se sootaga faakonekarate ma soo se tasi ole ekalesia. O le tali ale faifeau e leai. Ole isi fesili ale loia pe e lei faia se konekarate male ekalesia, na tali foi Kerita e leai.

Pe sa iai se taimi na faamoemoe ai e faia se konekarate male ekalesia, na tali foi Kerita e leai. Ole mausali lea ole faaiuga ale faamasinoga e leai se vaega ole faavae e faia ai se konekarate ile va ole ekalesia mase faifeau, poo se faifeau oloo umia le tofi Toeaina.

Ile faaiuga ale Komiti Faatonu na faamuta ai le tofi Toeaina ole susuga Kerita, ua taunuu le faamasinoga ise faaiuga e faapea, e lei toe iai se faamoemoe ole faifeau e savalia le Komiti Faatonu pe toe tafa lo latou finagalo.

E lei iai foi se faamoemoe e faia se faatoesega pe suia ai le faaiuga. Ole molimau ase tasi o faifeau o Rev Lupematasila oloo faaalia ile faaiuga se vaega o lana molimau na ta‘ua ai, sa taumafai e fautua ile susuga Kerita e toe mafaufau ae silasila ise isi auala e savalia ai le Komiti Faatonu mose isi galuega pe faamata e toe suia ai lo latou finagalo.

Peitai ole aso muamua o Mati ole tausaga ua mavae 2015 na feiloai ai ma Kerita ma faailoa ane ai ele faifeau, ua uma ona totogi i lana loia le $10 afe tupe Ausetalia mole faia ose tagi faasaga ile ekalesia. Ole silasila ale faamasinoga ua mautu le finagalo ole faifeau e ave le mataupu ile faamasinoga a‘o lei faia le faaiuga ale Komiti Faatonu.

Na afua mai le mataupu lenei ina ua fuafua le matagaluega a Perisipeni e faatau se fanua a‘o avea Kerita ma Toeaina Faatonu. Ole vaeluaina ole Matagaluega ole isi lea pogai ole feteenaiga ma oo mai ai le mataupu ile Komiti ale Au Toeaina.

Ole teena o vaega uma ole tagi a Kerita ua faailoa ai ele Faamasino Sili ile faaiuga tusitusia, ua faailoa atu le toe talosaga ole Itu tagi e toe iloilo le faaiuga poo se apili. Ua faaalia ele Loia le afioga Leuluaialii Olinda Woodroffe, ole tulaga lava lea ua sauni iai le susuga ile faifeau e ana le mataupu ma ua logoina ai foi lona ofisa loia ile faia ose apili.

Ua faaalia ele afioga ile Faamasino Sili i lenei faaiuga, ose taimi muamua lea ua ia tagofia ai se mataupu e lavelave ma faigata, ae ole fesoasoani o folasaga ale loia sa tulai mo i latou sa faasaga iai le tagi, poo faifeau Toeaiina ole ekalesia EFKS, ua mafai ona maua ai sona malamalamaaga ma taunuu ai ile faia o lana faaiuga.