(Afioga Toleafoa & Afioga Punipuao, Fuatino-Malaefou & Rosa)
E a‘e mauga ifo vanu, ae sa taumafai pea le manaia mai Aana e fia asaina le toafa o mafaufauga. Poo le ā le tele o taumafa manogi ma le mafana o le mafutaga i totonu o aiga, ae moni ai upu o le Tusi “e tuua e le tama lona tina ma lona tamā ae faatasi ma lana avā ona avea ai lea ma tino e tasi”.
Na saunoa le faato‘āfaiavā, na oona uma mea uma ina ua tosina ona siumata i se tausala lalelei ma pologa ai pea ona lagona i le fia mafuta i ai. Na ia ta‘ua foi e tolu a ni auala na ia taumafai ai e osofai atu se fesili ina ia tau faaofi atu lana tomaaga pe talia mai e le taupou.
E ui i ia osofaiga e 3 i tuufaatasiga a autalavou a le Ekalesia, ae na tali i seuga ma fuamoa uma, sa le i manuia ana taumafaiga. Sa lei solomuli pe faafiti le alii ae toe taumafai atili pea. Sa lei fiu pe matelaina ona ua faananau pea ona lagona i le afioga ia Punipuao poo le afioga ia Fuatino ma sa lē toilalo ai pea i le fia taunuu o lana miti i le fia se‘i i le fuarosa lea na taia ai ma segaia ai lana vaai.
Se mea ina a manaia o le talia fiafia e aiga osi ana sāvali ma matala ai noanoataga o le fefe ae amata ai se faigauo mafanafana e pei ona osia ai se feagaiga faaauro i le Aso Sa 19 o Aukuso i le nofoaga o Michael’s Oriental i Eight Miles Plain.
O saafiafiga ia o le afioga ia Toleafoa ina ua tau lau o lo la aso taupoina, na ia tautino ai a o faafofoga le aofia, “E tumau lona alofa mo lana manamea o le fuarosa e lē mamae i lana vaai”.
O mātua o le tamaitai faaipoipo o Rosa, o si ona tamā o Faasavalu Mautu (Falelatai & Samatau) ma le tina ia Malae Faasavalu mai Gataivai Savaii. O tuaa o le alii faaipoipo o le Susuga ia Saisaofai Malaefou Siulai ma si ona tina ia Olevia mai Fasitootai.
Sa taitaia le sauniga e le susuga ia Pr Francis Pule, Ekalesia Aso Fitu o le Toe Afio mai ae faaiuina i se tatalo e le susuga ia Pr Samuelu Afamasaga, o le faafeagaiga lea a le tamaitai faaipoipo.
O le pule o le tausamaaga o le susuga ia Faasavalu Tanielu Faasavalu. Na tasi moemoe le paia i aiga i le fetalaiga ia Tauā Silimoli Pogisa malaga mai Samoa e faailo se agaga faamalo i le aufaigaluega a le Atua faapea le aofia e ala i palapala-a-malo.
Sa fai ma sui o le auvalaaulia le fetalaiga ia Tauā e faafetaia aiga ga lua i faaaloaloga matagofie ma le fofoga taumafa. Na foi tagata uma ma le mama ua lomi ma le vaa ua goto, sii ai pea le faamanū i le Atua ua iu manuia le faamoemoe o le aiga fou.
