O le sauniga e faatamaia ai laau malosi poo fana lea na tuuina atu i leoleo sa saunoa ai le afioga i le Palemia susuga Tuilaepa Lupesoliai Sailele Malielegaoi. O lana saunoaga na afea ai i se vaega se faamanatu mo alii ma tamaitai leoleo i le leai o so latou aafiaga i ni faiga faapolokiki. Na faaalia e le Palemia o le pitolaau lea a le Minisita o le Matagaluega o Leoleo, le Tineimu ma Falepuipui.
E lei lautele le finagalo o le alii Palemia i le mafuaaga o lea vaega o lana saunoaga pe a fua o le sauniga e faatama‘ia ai laau malosi poo fana na valaaulia ai na te faia le saunoaga autu. Ae o se saunoaga na fesiligia ai e le tusitala le sooupu o le Matagaluega o leoleo le susuga Su‘a Muliaga Tiumalu poo ā tulafono ma faiga faavae a le matagaluega e faatatau i ni faiga polokiki e aafia ai Malu o le Malo.
Na tali le sooupu i le feiloaiga ma tusitala i le vaiaso ua mavae ma ia faaalia, o loo manino le tulafono a leoleo e lē tatau ma lē mafai ona lotolotoi pe aafia i le faatinoga o tiute faaleoleo ni polokiki. O lona uiga e tutoatasi le faiga o le latou galuega.
Peitai sa tuliloa pea i se isi fesili le sooupu poo le ā sana silasila i faiga faavae a le Malo ua tofia ai le faauluuluga o le Matagaluega poo le Komesina i ni faiga faapolokiki. Na tali mai foi le susuga Su‘a ma ia ioeina lea tulaga (political appointment) ma ia faaalia ai e tusa lava pe filifilia i se tulaga faapea le faauluuluga o le Matagaluega, e lē mafai lava ona aafia le faatinoga o ona tiute i ni faiga ma taupulepulega faapolokiki.
O suiga na faia e le Malo i le filifiliga o le Komesina o le Matagaluega o leoleo ma faapolokiki ai le tofia, na matuā tetee i ai i latou sa taitaia le Matagaluega i nai tausaga ua mavae. E oo foi i se tasi o tamalii sa tauaveina le tofiga le afioga Saunoamaalii Sonny Schuster sa tulai i luma o le Komiti faapalemene sa iloiloina le fuafuaga a le Malo i lea vaitau, ma ia faailoa mafuaaga na te teena ai le faapolokiki o le filifiliga o se Komesina o Leoleo.
Peitai e ui sa toatele na tetee ae na pasia lava e le Malo le faapolokiki o le filifilia o faauluuluga o Matagaluega a le Malo ma aofia atu ai ma le filifilia o se Komesina o Leoleo. O loo tatalo le toatele o tamalii ma failauga, o faletua ma tausi ma tamaitai sa galulue faaleoleo ia iai se taimi e toe iloilo ai e le Malo ana faiga faavae, ma toe foi le filifiliga o le Komesina o leoleo i le tulaga sa iai muamua, lea sa tutoatasi ai faaiuga a le Komesina e aunoa ma le aafia o ni faiga faapolokiki.
