O lea ua faailoa mai ele afioga ia Tuaopepe Jerry Wallwork, le Peresitene ole Asosi Sisii Uamea Mamafa a Samoa, le SWA, ua taunuu i Samoa le pine siliva ale tamaitai o Ele Opeloge. Peitai, e oo mai ile taimi lenei, e lē o mautu se fuafuaga ise ituaiga faaeaga ole a tauaaoina atu ai lenei pine ia Ele Opeloge.
E ui lava ua lata ile 10 tausaga talu ona mae‘a taaloga ale Olimipeka i Saina lea ua maua mai ai le pine siliva a Ele, peitai, ua ia tusia se isi itulau fou ole talafaasolopito, ile avea o ia ma uluai tamaitai mai motu ole Pasefika ua manumalo ise pine i taaloga ale Olimipeka. E lē gata i lea o ia foi ole uluai Samoa ua ia manumaloina se pine mo Samoa mai le Olimipeka.
E masani lava ona folafola ele Malo faamanuiaga tau tupe mo autaaalo a Samoa e tausinio i taaloga ale Olimipeka, o nei faamanuiaga e tuuina mai ele Malo ile tama ma le teine taaalo e faamanuiaina ise pine.
Ina ua alia‘e mai le ono maua e Ele ole pine siliva ina ua faaleaogaina pine sa tauaaoina atu i tamaitai sa mauaina le siliva ma le apamemea i taaloga ole 2008 i Saina, ina ua faamaonia sa o la faaaogāina vailaau faamalositino, na fesiligia ai le alii Palemia, ise faamanuiaga e ono tuuina atu ele Malo mo Ele Opeleoge, peitai, na saunoa le alii Palemia. “E lei logoina mai a‘u ile mataupu lea.”
E oo mai lava ile taimi nei, e lē o mautinoa lava poo le ā se faamanuiaga e maua e Ele ae faafefea foi ona faatāua lona faaeaga, e ala ile pine siliva. E oo lava ile nofoaga ma le atunuu e faataunuu ai le faapaleina o lana pine oloo faailoga fesili foi.
O Ele oloo aumau i Niu Sila nei, ma oloo taumafai se fetuunaiga e mafai ai ona malaga i Samoa ma toe foi mai e aunoa ma le afaina o lona visa malaga, afai ae lē manuia fetuunaiga mo lona malaga atu i Smaoa, e ono faataunuu ile Maota Samoa i Magele Niu Sila le faapaleina o lana pine.
E iai le talitonuga o nisi e tatau ile malo ona tuuina atu se vaega tupe tele pe tusa ma le 100 afe tala mo Ele, ona o lana pine.
Oloo faatusa e nisi lea seleni ile tupe na foai ele Malo e lagolago ai le fusuaga a Joseph Parker, ma e tatau foi la ile Malo ona tilotilo ise tupe faapea mo Ele, auā e maualuga tele matatia ua ia ausia, ile avea o ia ma uluai tamaitai Pasefika e manumalo ise pine mai taaloga ale Olimipeka.
E iai le talitonuga e lē o toe mamao se taimi ona faamautu mai le o fuafuaga ma tapena ale SWA, faapea tino tau taaloga a Samoa, e aofia ai le SASNOC faapea le malo e faama‘oti mai se tapenaga mo lea faamoemoe.
Poo fea lava e agai iai nei tapenaga, ole mea mautinoa, e tatau ile Malo ona tauia le tautiga o Ele ise faamanuiaga tau tupe, e pei ona uluai folafola a‘o sauni atu autaaalo a Samoa mo taaloga ale Olimipeka.
