O le atinaeina o le olaga aoaoina o fanau i le atunuu e le faigofie mo komiti ma faiaoga aua o seleni lava e tua iai aua le faaleleia o le anofale o lea auaunaga taua.
O le mafuaaga foi lea e saili fesoasoani ai le tele o aoga i le atunuu i faalapotopotoga ma ekalesia e maua ai se fesoasoani, a le o se tupe ae o meafaitino e faaaoga e fanau ia latou suesuega ma aoaoga. O le ekalesia a Iesu Keriso o le au paia o aso e gata ai o loo pito numera tasi i ana foai mo aoga aemaise o isi auaunaga.
O kesi ma nofoa ua foai e tagata lolotu o le ekalesia i Niu Sila ae na tuuina atu i le auaunaga fesoasoani a le ekalesia aoao i le lalolagi ma momoli mai ai i Samoa e se faifeau o le ekalesia le susuga Elder Cameron ma lona faletua, mo le aoga tulagalua a Faleula. Na molimauina le pepese fiafia ai o fanau a le aoga i le faaiuga o lena vaiaso ua tuanai ina ua latou vaaia le loli ua ulufale i le lotoa ma le uta o laulau ma nofoa o le a latou faaaoga ma o le faafetai lea a le komiti, o le pule aoga ma faiaoga aua e le taugofie pe a faatupe e le sosaiete a matua ma faia’oga.
O le faletua o Malama Loau Keneti Sio o le taitaifono lea o le komiti a le A’oga na ia faafetaia le agalelei o le ekalesia aua pe ana ave le talosaga ae le tau ane ai se faatatau e le maua lea foai taua tele mo fanau. O le fua i nofoa ma laulau ua maua e le a’oga tulagalua oni meatotino anagata e fua i le fausaga aua e aumai mai fafo.
Na faaalia e le faifeau o Elder Cameron e taunuu le talosaga a le komiti mo ni nofoa ma laulau o loo iai le polokalame fesoasoani a le ekalesia i le lalolagi e mafai ona foai atu ai e tagata o le ekalesia ni a latou meatotino e fesoasoani ai mo isi tagata e fia maua se fesoasoani.
O le talitonuga foi lea o le a’oa’oga faakerisiano o le alofa, aua a nao upu ma folafolaga ae leai se tino o le alofa e le mafai ona talitonuina. Ua tele faalapotopotoga tumaoti ma a’oga i Samoa ua faia iai foai a le ekalesia a Iesu Keriso o le Au Paia o Aso e Gata ai. O nisi o foai o taavale ao nisi foai o taumafa ma isi lava meatotino ma oloa taugata.
