Ole ata tifaga ole Groove City na uluai tuufaatasia ile tausaga 2009, ele susuga ia Saipele Nili, o ia foi lea na tusia, faatonutonu, ma faafoeina le pueina o lenei ata tifaga. Na afua le pueina o lenei ata ile malaga ale fa‘ili ole Cydel i New York, na amata galulue faatasi ai male alii e suafa ia Alan Smithee ile pueina o lenei ata tifaga.
“Oute lei alu ise aoga e aoaoina ai tomai mole tuufaatasia ose ata tifaga, peitai, e tele manatu ma aitia sa ia te au e mafai ona tuufaatasia ai se ata tifaga,” ole saunoaga lea a Saipele.
Ole tuufaatasiga o ana aitia ma ona manatu faapea le agavaa o Alan Smithee i galuega tau pueata, na amata ai loa ona galulue e pue le Groove City, e tusa ai ma se saunoaga a Saipele Nili.
Ole Groove City ose ata tifaga na pueina i Manukau City i Aukilani, oloo faaautu lea ile auuso e toatolu oloo faatinoina e Saipele Nili, Tavai Faasavalu ma Siauala Nili. O le auuso lenei na maliliu o latou mātua ise faalavelave tau taavale, ona tausi ai lea o i latou e lo latou tina matua oloo faatinoina ele faletua ia Aufaga Faimai Tuimauga, ua fai i lagi lana folauga.
O lenei ata tifaga sa tagi lava i lima le faatupeina, o tupe na maua mai ile fesoasoani a aiga faapea uo ma ē masani sa faalagolago iai lenei taumafaiga. Ole toatele foi o tupulaga talavou oloo iai ile faatinoina o lenei ata tifaga, o alo lava o Samoa male Pasefika oloo iai le taleni.
Na saunoa Saipele, ole pueina ole ata lenei na ia iloa ai, le maoae o matatia e mafai ona ausia e tagata Samoa male Pasefika, pe a galulue ma limalima faatasi.
Ole tausaga e 2010 na tulai mai ai nai faafitauli ile va male alii o Alan Smithee ma lē toe faaauauina ai loa le pueina ole ata tifaga. Na lē mafai foi e Smithee ona faamae‘aina le pueina ole ata ona o tuatuagaia i lana galuega.
“Ole agaga faafetai ia Tautiaga Tiatia o ia na faatalanoaina le faaauauina ole pueina ole ata ma maualafia ai lo‘u avanoa e faamae‘a ai le Groove City.”
“E lima masina sa taumafai ai e toe tipi (re-edit) ma toe faaleleia le leo, o lanu ma tuufaatasi ina ia mafai ona faaalia i totonu o fale tifaga. O lenei galuega tele sa faatinoina ele Vision Films Ltd, i lalo o le taitaiga a Juanita Ta‘uo-Tu‘uholoaki.”
“I totonu ole lima tausaga e lei faigofie, ae ole faatauanau mai pea male faamalosi‘au ale tina ia Faimai Tuimauga a‘o soifua o ia, na faalototeleina ai pea lo‘u tagata e faamae‘a le ata tifaga.”
“Ole tuumalo ole tina ia Faimai ia Fepuari ole 2015, na matuai faalototeleina ai matou e finau e faamae‘a le ata tifaga ma ia faaalia i totonu o fale tifaga, e pei ona faananau iai le tina ia Faimai”, ole saunoaga lea ale Susuga ia Saipele Nili.
Ole Groove City na manumalo ile People’s Choice Award ale Pasifika Film Festival i Sini Ausetalia ia Novema 2015. Na amata faaalia i totonu o fale tifaga i Aukilani ma Ueligitone mai le aso 6 o Me ile aso 1 o Iuni 2016. Ae o le a amata faaalia i totonu o Ausetalia ile aso 16 o Iuni 2016.
