E fia pei o Tim Cahill – Michael Leaututu

Tamā ia Peter Leaututu ma lona atalii ia Michael Leaututu
Tamā ia Peter Leaututu ma lona atalii ia Michael Leaututu

E lē o motu lava le sao iloga ole alo soka o Samoa ia Tim Cahill i soo se taimi e taalo ai mole aufili a Ausetalia le Socceroos, lea a lē sikoa e malo ai e sikoa e tutusa ai se taaloga.

Ole mafuaaga lenei ua atili toatele ai ana manamea (fans) ile soka ma ua fai ma faataitaiga lelei mo se tasi o alo talavou Samoa oloo taalo ile ausoka i lalo ole sefulutolu tausaga a Minto Sini, le pitonuu iloga na amata mai ai tama iloga ile liki o Israel Folau ma Jarryd Hayne.

Ae peitai ole alo lea o Samoa ia Michael Leaututu e sefulutolu ona tausaga, e ono avea ma sui o Tim Cahill e sosoo atu i le Socceroos ile tulaga ole striker poo le foueki pe taalo ‘afa (midfielder).

Ole tausaga nei na Siamupini ai lana ‘au ale Minto Stingers ma ia ausia ai le sikoa silia ale kalapu (16 sikoa) ile taamilosaga ole 2016.

E lē gata i lea e 19 ana taaloga mo lana ‘au ma e vaaia lava lona agavaa male finau na maua ai manumalo e 14 ole tausaga ae na ole fā faia‘ina. Ole taualuga o lenei tausaga lea na manumalo ai ile Ipu autu ma ua mausali ai lona loto e fia taalo mole Socceroos faapei o Tim Cahill pe a matua.

O isi tama taaalo e fiafia tele iai Michael Leaututu o Ronaldo o Portugal faapea Lionel Messi o Argentina.

O lenei alo talavou, ose alo e faasino ia Peter Leaututu o Vaimoso ma lona faletua ia Margaret Leaututu o Sini Ausetalia.