Ole susuga ile faafeagaiga ia Rev Foua Tuisaafia ma lona faletua ia Tagialisi Tuisaafia, o lea ua tolu nei tausaga talu ona filifilia mai ile koneferenisi ale Ekalesia Metotisi i Samoa e tausia le matagaluega poo le tovine i Manurewa, ma ose aulotu toatele foi lea aulotu i totonu ole faasinoti ale Ekalesia Metotisi i Saute o Aukilani i lalo ole taitaiina ale afioga ile Sea ole sinoti ia Masunu Utumapu male faletua ia Senerita Utumapu.
Ole lagona ole susuga ile faafeagaiga ia Rev Foua Tuisaafia ma lona faletua faapea matafale taitasi ole Ekalesia lenei i Manurewa, o latou ole tasi lea aulotu ua leva i totonu ole Sinoti ma ua iloga foi ana galuegafai mole ekalesia aoao, ma o so latou lagona ua tatau ona vaavaai mose malumalu tapuai o tagata lolotu, aua o lea ua tupu le galuega aemaise ai o tupulaga lalovaoa ole ekalesia mole lumanai, ma o lea ua tasi moemoe ai se lagona ole ekalesia atoa ua tatau loa ona tapena mole tausaga fou.
Ole Aso Toonai ua mavae 24 o Setema na faatinoina ai loa se sailiga tupe ale Ekalesia Metotisi lenei a Manurewa e ala ile latou posiva sa faia ile hall ale Fesilafai i Manukau. O susuga i faafeagaiga ma faletua mai matagaluega taitasi ale faasinoti i Saute faapea nisi o sui mai le sinoti a Matu ae lē gata i lea, o aiga uo ma ē masani sa auai e molimauina ma lagolago le faamoemoe ale susuga ile faafeagaiga male aulotu lenei i Manurewa.
Ole Susuga ile Sea ia Masunu Utumapu na ia tatalaina le polokalame ile sauniga lotu, ona saunoa lea ole fofoga ole aso le susuga ia Aumua Faafetai Samuelu e faatulima ma faafeiloai le paia male mamalu ole auvalaaulia ae faapea foi ile nofo a faafeagaiga.
O ipu alofa a matagaluega na tatalaina faafiafiaga ma faasolo ane ai i ipu a aiga ma uo a aiga ole aulotu ona taualuga lea i ipu a matafale e 21 ale aulotu. O foliga fiafia male loto ua malie ile mamalu ole auvalaaulia aemaise o susuga i faafeagaiga na tupu ai le lagona e fia foai mole galuega ale Atua, ma ose talalelei lea oloo momoli pea i loto o tagata galulue i ekalesia taitasi i faataitaiga lelei oloo taulamua ai susuga i faafeagaiga ma o latou faletua.
Na sosoo male taumafataga na tapenaina lava ele matagaluega i Manurewa ona saunoa lea ose tasi o tamā ole aulotu le susuga ia Pipi Faauma Tausaga Mona e fai ma sui ole susuga ile tausi matagaluega ia Rev Foua Tuisaafia ma lona faletua ia Tagialisi Tuisaafia male aulotu i Manurewa e momoli le agaga faafetai i matagaluega taitasi ole faasinoti i Saute faapea Matu aemaise o aiga ma uo na mafuta atu ma apogi le faamoemoe ale Ekalesia ma tatala ai loa le filialii. E $137,685.40 le aao foai na tauaaoina ele matagaluega i Manurewa i lea aso.
Ile saunoaga Rev Foua Tuisaafia ole suegatupe muamua lenei a lana aulotu ae lē manao foi e tuu umi le fausiaina ole malumalu tapuai o tagata lolotu, o sona lagona o lea ua maea tasi le finagalo o le aulotu o le tausaga fou lava lea o le a amata ai lenei galuega ae faamoemoe lava ile fesoasoani mai ole agaga ole Atua, auā tatou te mafaia mea uma ile faatasi mai ole Atua ia te i tatou.
