“E manino mai i teuteuga, ua fia Ao o le Malo Tuilaepa”…taitai o le Itu agai
Ua manatu se tasi o tamalii sa avea ma Fofoga Fetalai ma faipule o le Palemene, o teuteuga o le faavae i le filifilia o se Ao o le Malo o se gaioiga tāua ua faia e le Malo o iai nei. Peitai e eseese lagona faaalia o nisi o le atunuu sa fesiligia.
O nisi e lagolago i le teuteuga ua faatū atu e le Malo, ae o nisi e lē ‘au i ai ni o latou lagona ona o le latou mau e sili atu le tulaga o loo iai nei, ona e filifili uma e le Palemene. E faapena foi se finagalo o le Itu agai poo le vaega faaupufai o le Tautua Samoa.
O le feiloaiga a tusitala ma taitai o le Itu agai faatasi ai ma le minisita o tupe faaolioli a le Tautua Samoa le afioga Afualo Dr Woods Salele na faamautu ai le tetee a Palusalue Faapo II, le afioga Aeau Peniamina ma Afualo.
E laugatasia finagalo o nei faipule agai, o loo lelei aiaiga o loo iai nei ona a faatino le teuteuga ua manaomia e le Malo, o le a leai se leo o le Itu agai i le filifiliga o se Ao o le Malo.
Na oo ai lava se finagalo o Palusalue i lona faapea mai ua faia teuteuga nei ona ua fia oo le Palemia susuga Tuilaepa L Sailele Malielegaoi, i le Ao o le Malo. Peitai o le feiloaiga masani a le Palemia ma tusitala i lana polokalame i vaiaso taitasi i luga o le leitio o le 2AP, na faaalia ai e Tuilaepa e faigofie le teuteuga ae o manatu ua faaalia e le taitai o le Itu agai o ni manatu faavalevalea.
Na faailoa e le Palemia, o teuteuga o le a filifilia ai e se vaega faaupufai poo ni vaega faaupufai le Ao o le Malo ona ave lea mo se finagalo o le Palemene atoa i luga o le fautuaga a se pati poo ni pati faaupufai o loo iai le numera fulisia o nofoa o le palemene.
“Se‘i vaai i ai i le faigofie tele o le teuteuga ae ou te lē iloa poo le ā le mea lea e fai mai ai le Itu agai”, na saunoa ai Tuilaepa i tusitala.
E manatu Palusalue ma lana itu, a faia le tulaga lea o le a leai se mamalu ona o le a faapea nisi o le Ao o le Malo a le HRPP poo le Tautua Samoa. E talitonu le sui taitai o le Itu agai, e lē tupu le tulaga o loo finau ai le Palemia, o le a ono 49 ni sui e faatutū atu e faipule lea o loo aiaia i le faavae i le taimi nei e faia i ai se filifiliga.
Ae manatu le Palemia a tupu mai se tulaga faapea o le a matuā faigata ona faia se filifiliga ma faamamasagia ai le tofiga mamalu ma le faaaloalogia o le Malo o le atunuu. O le talitonuga o le Malo a faatino le teuteuga o loo tau faaofi i le faavae, o le a mamalu le tofiga ma leai se tele o ni feasuaiga i le faia o le filifiliga.
Na faamanatu mai e le Palemia le sailia o se Ao o le Malo e tusa o aiaiga o le faavae ina ua tuumalo le susuga Malietoa Tanumafili II. E tasi le sui na faatū e le HRPP ae o le Itu agai i lea taimi e lua.
O tulaga ia e lē tatau ona toe tupu mai i le luamanai ae ao ona faia se isi suiga fou ia fetaui ma faiga ua iai nei le Palemene o le atunuu ua aloaia faiga vaega faaupufai. O le filifiliga foi lea e faatino ai le sailia o se Fofoga Fetalai ma se Sui fofoga fetalai.
