O se muagagana a le atunuu e manatua ai pea le ina‘ilau a Tina ma Tamaitai i totonu o la ta aganuu ma agaifanua a Samoa. O se muagagana ua faamanatu mai ai pea, le mafai ona ausia e Tina ma Tamaitai o Samoa, o soo se sini, ma soo se faamoemoe. E lē gata i lea, ae o se faamalosiau i tiute ma tautua eseese o loo afu sisina ai le toatele o o tatou Tina ma Tamaitai Samoa. O se muagagana e tuu gutu, e tuu taliga, na afua mai i o tatou tuaa ua fai i lagi le folauga. Tatou te manatua ai pea galuega lelei a nai o tatou tina ua lagomau mai i tiasa, e pele i le loto, e lē mafai ona faagaloina.
O le mafuaaga lea, e tausisi ai pea ia latou faataitaiga, ma tuli tuli matagau pea le ufi a le Tamaitai, ina ia tumau le Tamaitai ma le Tina Samoa, i le lototele, tauivi, ma le filiga ina ia taunuu se faamoemoe. Ua lē mafaitaulia le sao o Tina ma Tamaitai i le atinaeina o totonu o o tatou aiga, nuu, Ekalesia ma le atunuu pele o Samoa, aemaise o soo se atunuu o loo aumau ai, o loo tautua ma galulue ai i tofi maualuluga, faauluuluga o matagaluega, pisinisi, Ekalesia, aoaoga, taaloga, le Palemene, ma soo se vaega. O lenei faamoemoe, ua o se amataga i totonu o Aukilani, e patipatia ai o tatou Tina ma Tamaitai uma o Samoa, faapea le tatalaina faapitoa o se Alapama o Pesega, ua tuufaatasia ai ni pesepesega mālie mo tupulaga matutua, aemaise o se pese na tusia e Faumuina Taufau Aukuso ua faaautū i ai lenei faamoemoe ua faaigoaina, “E au le Ina‘ilau a Tina”, ma le tele o nisi pese faapitoa ua fitoi tonu lava mo Tina ma Tamaitai. Sa pueina e le susuga ia Lale Talo, fesoasoani i ai ma le Afioga ia Galumalemana Tenari Tautua, ae fofogaina pese e le Afioga ia Lealaitagomoa Ga‘ono Luafatasaga Kalapu-Ropati, Gaylene Filoa Tanielu Leitulua Akelly, ma Faumuina Taufau Aukuso. E ui e na o se alapama o pesega peitai, o loo afifi ai se faamalosiau mo Tina ma Tamaitai, ina ia faaaogā taleni, tomai, ma soo se faamanuiaga ua faamanuiaina ai i tatou uma e le Tamā o i le Lagi. E pei ona iai taleni na tuu atu i auauna e toatolu, e toalua na atinae, ae toatasi sa ia tanu ma faapelepele.
O le aano tonu lena o lenei faamoemoe i le po o le Aso Toonai nei, aso 7 o Tesema. O le a auai lana Afioga i le Konesula o Samoa i Aukilani, Afioga Faolotoi Reupena Pogi. O le a faapea foi ona saunoa ai nisi o Tina iloga o Samoa ua lauiloa ia latou tautua ma tofi, pe na faapefea ona taunuu o latou moemitiga o loo galulue ai nei, e pei o le Afioga i le Tamaitai Faipule, Le‘aufaamulia Asenati Lole Taylor, Leulua‘ialii Olinda Woodroffe, Unasa Iuni Sapolu, Mena Mata‘utia Loheni ma nisi. O se po ua faapitoa ma se faafiafiaga tatou te patipatia ai o tatou Tina ma Tamaitai Samoa. E tatala le avanoa mo soo se tasi e fia auai.
O le Aso Toonai 7 Tesema, New Lynn Community Centre 45 Totara Avenue New Lynn. Amata 6pm-12am. Ulufale $25 tala, maua le taumafataga faapea faafiafiaga eseese ua saunia. Mo le faatonuina o se laulau ma pepa ulufale, faamolemole faafesootai le 276 4417, poo le 027 600 8545, 021 027 16579, poo le 021 027 66000. E faamoemoe o le a tatou feiloai ai i le soifua manuia, ma le lagi e mamā.
