Ua le iloga se agavaa poo se taleni e le maua ele itupa o tina, ua le gata i upufai o malo, a’o totonu o nuu ma aiga ae o lea foi ua manino ua oo lava i totonu o ekalesia ua sasao ai foi le malosi o tina e ala lea ile taleni ua tuuina iai ele Atua.
Ole polokalame ale Savali a Keriso ale ekalesia Samoan Assembly of God i New Lynn ile afiafi ole Aso Sa, o iina na iloa ai e tele foi le agavaa ma le taleni oloo ile vaega o tina latou te faatinoina ai ni polokalame i totonu ole ekalesia.
Ole polokalame ole Savali a Keriso a lea ekalesia na vaevaeina lea i vaega e tolu, ole vaega ale autalavou ua faaigoaina o Semurana, mafutaga a tina ua faaigoaina o Efeso, ma le mafutaga a tamā ua faaigoaina o Laotikaia, ae o fanau laiti ua faaigoaina lea ia Tuatira, o nei igoa uma ua faaigoa ai nei vaega o igoa mai totonu ole Tusi Paia ile tusi o Faaaliga.
E lima vaega lautogia na faatatau iai lenei polokalame, (1) Pese Savali e faautu ile uiga ole igoa Savali a Keriso, (2) Pese Faapitoa e faamatala mai ai le uiga ole igoa oloo faaigoa ai le vaega oloo faamatala mai i totonu ole Tusi Paia, (3) Mau Faitaga, (4) Pese Akapela, (5) Pese autu e faatatau ile tala ia Sakaio, o nisi vaega na faaopoopo iai, ole Togiga, Taaloga Faale-Tusi Paia faatasi ai ma le Taulaga. Ole Savali a Keriso e fai lava i tausaga uma, ae fesuisuiai lava le faagasoloina o polokalame e tatai iai lagona ma mafaufauga o vaega taitasi.
Ile tausaga nei ua fai si suiga fou ua agai iai le polokalame, ma ose suiga sili ona maualuga ile silasila ma le maimoa ole mamalu ole auvalaaulia aemaise o uo ma ē masani sa iai ile po ole Aso Sa, 3 o Setema sa faatinoina ai lenei faamoemoe. O pese sa faatinoina ai polokalame taitasi, o pese lava sa fatuina e vaega taitasi e aunoa ma le faaaogāina o pese mai totonu o CD, ae le gata i lea e pule lava le vaega ile fesuisuiaiga o latou taga e momoli mai ai le feau ole aitema.
Ole mafutaga a tamā na latou uluai tatalaina le po ile latou pese na momoli ai le latou tautinoga io latou taitoalua a feoti muamua tamā aua ne’i toe alu se latou ta’i faalua. Ole fanau laiti na sosoo ai aua o latou ele alu ile tauvaga, ona see atu loa lea ole autalavou e tatala aloaia le faagasoloina ole tauvaga, sosoo atu ai ma le mafutaga a tina poo Efeso ua faaigoaina ai, ae mulimuli ai ile mafutaga a tamā o Laotikaia.
Ua sasala faafagu sausau le manogi o feau ole po ile matagofie ole felanulanuai o tapenaga a vaega taitasi, ma ua faafaigata ai e faamasino ona latou pasia ma tusitusia se au e ono suipi ile tauvaga, ae oloo finau foi manatu ma mafaufau ole aumaimoa ile latou foi faamasinoga poo ai le au e manumalo. Peitai e moni ai upu ale atunuu e le mua uma ni vaa, e eseese foi lagona ma le silasila ale au valaaulia e ese foi le silasila a faamasino, i susuga i faafeagaiga sa fai ma faamasino filifilia.
Ole mae’a ai ole galuega a faamasino na tuusa’o atu loa le faaiuga ile komiti ole Savali a Keriso le susuga ia Reymond ma le susuga ia Aperaamo mo le fofogaina. Na saō ma lē toe lagona se leo ina ua laulauina tulaga o vaega taitasi, ma tulai mai ai faaiuga a faamasino e sola le vaega ale autalavou poo Semurana ma le ipu ole pese savali ma le ipu ole taulaga auā ole tasi lea vaega na faaopoopo iai ile tauvaga ole taulaga. Ole vaega tina (Efeso) na siamupini ile ipu ole Akapela, Togiga, ma Taaloga, ma le mafutaga a tamā (Laotikaia) na siamupini ile ipu ole matua faitaga, pese faapitoa ma le ipu ole pese faitaga.
Ole aotelega o lenei faamoemoe ole polokalame ole Savali a Keriso na siamupini ai le mafutaga a tina (Efeso) ile tuufaatasiga, (2) mafutaga tamā (3) tupulaga autalavou. Ole tumutumuga ma le matagofie ole Savali a Keriso i lenei tausaga ole upu folafola ale Atua na fofogaina ele susuga ile faafeagaiga ia Pastor Sauafea Faatuatua ua ta aofai ai lagona ma tapenapenaga a veaga taitasi.
Ole tausaga ua mavae na nofonofo ai le ipu ole siamupini ile mafutaga a tamā a’o le tausaga nei ua pepese ai le mafutaga a tina ile siamupini ae aiaiuli atu ai le autalavou ma le mafutaga a tamā.
Ole agaga ole fiafia ma le faafetai na saunoa mulimuli iai le tamā ole fale le susuga ile faafeagaiga ia Mao Lamositele Naamanu e momoli le faafetai i susuga i faafeagaiga ma o latou faletua, faapea le malau ole auvalaaulia sa molimauina le polokalame ole Savali a Keriso i totonu ole Samoan Assembly of God New Lynn.
