E au le Ina‘ilau a Tamaitai

O le igoa lea o se ata ua tuufaatasi i ni vaega se lua e le Susuga Galumalemana Steve Percival ma na faalauiloa i le atunuu i le vaiaso na tea nei.
O lea ata ua tuufaatasia ai ni talaaga o soifua o tamaitai o Samoa ma o le vaega muamua ua iloilo ai le talafaasolopito o Samoa ma le faigamalaga a tamaitai o le atunuu. O le aiā tutusa o tamaitai ma alii na faapea ona finauina i lea vaega muamua o lenei ata.
O le vaega lona lua o le ata ua agai ai i le manaoga e ala lava i avanoa tutusa, ina ia faafaigofie le sao o tamaitai e ofi atu ai e avea ma faipule o le Palemene o Samoa.
O se mataupu lenei ua avea ma faafitauli i taimi uma lava e folasia ai lipoti a le Matagaluega o Tina ma Tamaitai, atinae o nuu ma aga fesootai i luma o Malo Aufaatasi ona o le faigata lava ona agai Samoa i se tulaga e vaaaia ai le toatele o tamaitai i totonu o le Maota Fono Faitulafono.
O le mau a nisi o lipoti ua avatu e faafeto‘ai ai le lipoti o le Malo, e amata mai lava i pulega a nuu lea itu ma o le ata lenei ua agai ai i alii ma tamaitai e faaali lo latou finagalo ma e manino lava le vaeluaina o manatu o le atunuu ona o nisi ua manatu e tuuitiitia ai le tofi o le alii o le ulu o le aiga i nei faiga fou ua faapea ona unai mai ma le mau lava lea o tamaitai Samoa ua leva lava ona maualuga o latou tulaga i le feagai ai i totonu o lona aiga, nuu ma le ekalesia.
Ua ta‘u maualuga i le itu faaleaganuu lea e ta‘ua ai tamaitai o le feagaiga. Peitai o le mau a nisi ua na o ni teuteu lava nei folasaga, e lē o le moni lea o le tulaga o tamaitai i lenei vaitaimi ma o le mafuaaga lea o le unai pea o tamaitai ina ia maualuga lo latou sao e lē gata i aoaoga, ae faapea foi galuega ma tofiga.
Faaalia e le susuga Galumalemana Steve Percival, o le polokalame poo le ata ua ia tuufaatasia, atonu e lē sipela mai ai se tali mo Samoa ae e aumai ai manatu e tatau ona faatalatalanoaina pea ina ia mafai ai ona saili se auala e ogatotonu i ai le faigamalaga a tamaitai i le lumanai ma ia amanaia ai le taumafaiga a tamaitai ina ia saga atinae ma unai o latou tulaga i totonu o soo se potopotoga.
O le faaaliga muamua lava o lea ata na faia i luma o sui o tamaitai o le malo ma e mau nisi na faapea mai e lē iloa lava pe aisea e unai ai avanoa tutusa ae o lea e manino le maualuga o le faaeaea ua ave e le malo ma tagata o Samoa i tamaitai, ae o nisi ua manatu e tāua tele le faaali o finagalo i lenei mataupu auā e pei ona ta‘ua, ua na ona faaeaea ma ave le faatāua i polokalame eseese mo tamaitai, ae e oo loa i tofiga nei o le avea ma sui a faipule faigata loa ona maua se mafuaaga e iloa ai le laitiiti o le numera o tamaitai i nei tofiga.
O le mau a le toatele o le tele lava o tamaitai e agai lava e lagolago o latou tuagane poo uncles poo tausoga foi poo latou taitoalua pe a oo i tofiga nei faafaipule.
O le taimi lenei e toalua sui a faipule tamaitai o loo i le Palemene, o le afioga lea a Fiame Naomi Mataafa ma le Afioga Gatoloaifaana Amataga Alesana Gidlow ae e 43 nofoa o le Palemene o Samoa. O se numera laitiiti lea e faapea mai Malo Aufaatasi ua matuā lē ogatusa lava ma le faitau aofai o tamaitai o Samoa.
Faaalia e Galumalemana Steve, atonu o le a aogā le faalauiloa o nei ata ua ia tuufaatasia e alia‘e ai se suiga ae o se manatu foi e faatupu i lagona o tamaitai e tāua lo latou sao i upufai o malo ma e au le latou ina‘ilau.