Ua na o le toatasi lava le sui o Samoa ua faamautu le ofi atu e tausinio i taaloga o le Olimipeka i Lonetona ia Aukuso i le taaloga lea o le siisii uamea mamafa.
O le tamaitai o Ele Opeloge lea ua sao atu i tausinioga na taumafai e toatele nisi o le au siisii a Samoa e sao atu i ai.
O le au a tamaitai o Samoa lea ua pine auro i tausinioga o Malo o le Taupulega ma malo o le Pasefika poo le Oceania i le mae‘a ai o le vaiaso o tausinioga na tuanai atu nei.
O lona uiga ua maua ai le avanoa e malaga atu ai le tamaitai e toatasi i lea tausinioga i Peretania. O Ele Opeloge la lea ua ave i ai lenei avanoa.
O le faaiuga foi o le vaiaso na manumalo ai le tamaitai o Mary Opeloge i le vaega laiti poo Juniors mo tausinioga a Malo o le Taupulega atoa ai Malo o le Oceania i lana foi paga ma o le mafuaaga lena o le maualuga o le tulaga ua tulai mai ai le au a tamaitai i le siisii, peitai o alii ua lē sao Faavae Faauliuli ina ua gau lona tau‘au i le uluai sii malele na taumafai i ai ma na ave i le falemai e toe siaki le tulaga o lona manu‘a ma lē mafai ai loa ona tausinio mo taaloga o le Olimipeka.
Na faamautu lava le lē sao o tama ina ua le mafai e Niu Sila Opeloge ona ausia sii e tolu mo le sii ma mālōlō i le mamafa o lana foi taumafaiga, ma o le faafitauli la lea na faamautu ai loa le lē sao atu o alii nei o Samoa mo taaloga o le Olimipeka ma na maualuga le faamoemoe o i laua nei e toatolu ai ni sui siisii a Samoa i ia taaloga tetele.
O alii nei o loo numera tasi i le tausinioga lenei i taaloga a Malo o le Taupulega.
Na manino lava i fofoga o le alii faiaoga ma le Peresitene o le Asosi Siisii uamea mamafa a Samoa, le Afioga Tuaopepe Jerry Wallwork le mafatia ina ua tulai mai le manu‘a o Faavae Faauliuli auā ua tele masina o tuufaatasi le asosi ma ana tagata siisii i le sauniuniga e le gata i le talimalo ai i lenei taamilosaga tele, ae o le sauni ai e saili avanoa mautinoa i taaloga o le Olimipeka.
O le sailiga foi i le taamilosaga i Samoa lava ia na vaaia ai le lelei o le faagasologa o ia tausinioga ma taumafaiga taitoatasi a alii ma tamaitai o lea asosi.
Na fesiligia le Asosi Siisii pe le o auala ua sii ai tama (techniques) ua tulai mai ai faaletonu, talu ai o le toatele na faamanu‘alia i le taamilosaga, aua o Nauru foi na le mafai ona sao le au a alii i le Olimipeka.
O Nauru ma Samoa o nisi ia o atunuu i le tulaga maualuga o taamilosaga o le siisii i le Pasefika ae o lea ua matua afaina ana au ma le mafai ai ona agai nisi o lea itupa o alii i atunuu e lua.
O le faamatalaga a le alii faiaoga, o le sasi lava o faaiuga na fai i le taimi tonu o le tausinioga lea ua le manuia ai alii o le atunuu e agai mo le tausinioga i Lonetona, ua tele masina o sauniuni ma taumafai i ai. O le taimi na sii malele ai Faavae Faauliuli, na ta‘ua e le faiaoga, ma o le molimau foi lea a le toatele, sa tatau ai lava ia te ia ua vaai atu e le o lelei le tuufaatasiga ona faamamulu le pa uamea lea, ae ua umi ona taofiofi i ai Faauliuli ma aafia ai loa lona tau‘au.
O le uluai sii lava lea a lea alii ma sa ta‘ua e le alii faiaoga, ana faamamulu lava e iai isi avanoa e lua e mafai ai ona toe sii, ae ua mafati le tau‘au o le alii ma le mafai ai loa ona faaauau. I le faaletonu o le sii a Niu Sila Opeloge, na ta‘ua e le alii faiaoga Tuaopepe Jerry Wallwork, sa tatau lava i le alii lenei ona faasolo mai ana sii mai i le mamafa o loo mautinoa le gafatia ona sii, peitai ua naunau tele le alii lenei ma ua le mafai ai ona gafatia le maualuga ua amata ai ana taumafaiga.
O alii nei na ta‘ua e le alii faiaoga o nisi ua tele tausaga o tausinio ma e leai lava se isi alofaga o le faaletonu, o le lē fuafua lelei lava i le faaiuga e tatau ona fai. Mo Ele Opeloge, na manumalo lava i le mamafa lea na pine auro ai i taaloga o Malo o le Taupulega le Commonwealth Games, ma e lei iai lava nisi taumafaiga ina ia toe agai i se isi mamafa i luga atu ma na ta‘ua e Tuaopepe, o le sii lea ua tulaga fa ai le tamaitai o Ele i le faatulagaga o tamaitai siisii i le paga o le super-heavy weight i le lalolagi atoa, ma o le isi lima vaiaso lea e totoe a o lei agai atu lenei tamaitai e sii mo Samoa i taaloga o le Olimipeka, o le a galulue ai ma le alii faiaoga ina ia mafai ona oo atu i le lima vaiaso lea ua i totonu o tausinioga o se pine le tamaitai lenei.
E ui i le faigata o le iuga o le taligamalo a Samoa i le to’atele na i Samoa mo le sailiga siamupini o le siisii a le itulagi ma malo o le Taupulega, o le aotelega o le siisii lava ia i ona tausinioga na faamauina, na iloa ai le maualuga o le taumafaiga lautele a Samoa e pei ona iai isi sui o le au siisii a Samoa.
