O le viiga ma le faaneetaga e foi i le Atua. Avea lenei avanoa ou te faafeiloai atu ai i le paia ma le mamalu o Samoa i ona tulaga faalupelupeina. E iai le talitonuga o loo maualuga pea le agalelei o lo tatou Atua ia te oe ma le aiga.
Afai na misi ia te oe le vaiaso na tea nei, o loo tatou talatalanoa ma taumafai e tali se fesili poo se lagona foi e oo mai i le taimi e filifilia ai tofi ma taitai i totonu o Ekalesia pe faapefea ona fai.
O le tulaga manino e lē tau faailoaina, e tofu lava le Ekalesia ma lana faiga ua masani ai. Peitai o se lagona e fia tatai i ai manatu, poo talafeagai le auala o loo faaaogāina e totofi ai taitai, e tusa lava pe o le mea ua fia tausaga talu ona sau ai le Ekalesia.
Auā e mafai ona tatou faapea, o le mea lava lea ua leva na sau ai, peitai ua leva lava ona sau sese ai le Ekalesia. E lē mafai ona faaaogāina le umi o le taimi, o se alofaga pe o se auala tatau e mafai ai ona tatou faapea ua sa‘o.
E pei foi o le agasala, e lē mafai ona tatou faapea, o le agasala poo le mea lena na tupu i le 20 tausaga talu ai. E lē avea le umi o le taimi talu ona tuanai ma auala e faamagaloina ai le sese.
A tatou tutū i luma o le faamasinoga a le Atua, e lē faamasinoina i tatou i agasala na fai ae e oti loa. E faamasinoina i tatou i agasala uma lava e afua mai lava ina ua faato‘ā tatou fananau mai.
Ua mafua ona faailoa atu lea tulaga ona e masani lava ona tatou faaaogāina le faaupuga “o le mea lea ua leva ona sau ai le lotu lenei” e avea ma alofaga ona o le tatou mumusu e fai ni suiga fou.
O le lagona e fia taatia atu i ou tafatafa aemaise lava i latou o avea ma taitai, se‘i o tatou toe iloilo le tofa ma le faautaga. O auala na faaaogāina e o tatou tuaa ua fai i lagi le folauga i ia ona po, o ni auala na mafai ona latou silafia ma oo i ai le iloa ma le a‘oa‘oina. Peitai, ua sui le lalolagi, ua alu i luma le malamalama, ua sui tulafono, o tu ma aga a tagata, o faiga, ma faatinoga.
E lē fesiligia le loloto o le tofa ua tuuina e le Atua i le tele o taitai auā le galuega a le Atua. Peitai afai tatou te faatautaia le galuega a le Atua ona o le mea na sau ai poo le masani, ou te talitonu o le a lē mafai ona tatou ausia ni suiga lelei ma le manuia e faalauteleina ai le galuega a le Atua.
Soo se suiga e faia i totonu o le Ekalesia, e iai lava tagata e lē fiafia pe faigata ona sui o latou lagona i suiga fou. Peitai e iai lava le taimi e malamalama ai. Ae o le mea e tatau ona mata‘ituina i taimi o suiga aemaise lava le suiga o tofi poo taitai, o le faia lea o le mea o loo apoapoai ai Paulo i le Ekalesia i Efeso, o le “taumafai lea e outou ona taofi o le loto gatasi i la le Agaga.” (Efeso 4:3).
E maitauina o taimi e sui ai pe totofi ai ni taitai fou, o le taimi lea e ese le faaaogāina e le tiapolo o tagata, e ala i le faitio, tomumu, aemaise o le manatu ua sese le tofiga, ma faaali foi lo latou iloa o le mea e tatau ona fai ma le tagata e tatau ona taitai.
O le Ekalesia ma le tofiga o ona taitai e lē tatau ona faia e pei o le tofiaina o sui o le Palemene, poo le faatutuina o sui o se faalapotopotoga tuma‘oti. O le Ekalesia e saili ona taitai e tusa ma le a‘oa‘oga a le Tusi Paia. O lo tatou Tusi Faavae lea. Peitai ua tele Ekalesia ua faaaogāina le filifiliga faapalemene poo le faatemokarasi e totofi ai ona taitai.
O faiga palota o loo faia i le tele o a tatou Ekalesia, o se auala e lē o faaaogāina e le Tusi Paia e filifili ai taitai. O le a iai se taimi ona toe foi mai lea o se manatu i lea tulaga ae o vaega nei e tatau ona mata‘ituina e le Ekalesia Kerisiano a o sauni e sui tofi pe tofia foi se faifeau poo ni taitai.
Muamua ia manatua, o le Ekalesia, o le Mafutaga ae lē o se sosaiete. I le Galuega 2:42 e faapea, “Ua tumau pea i latou i le mataupu a le au aposetolo ma le mafuta faatasi”. O se tasi o vaega tāua ma ogatotonu i le olaga faale-Ekalesia o le “mafuta faatasi”.
O le tiute o le taitai poo taitai atoa ai ma tagata uma o le Ekalesia, o le taumafai malosi lea ina ia faamautuina ma uumau i le ola “mafuta faatasi” o tagata o le Ekalesia.
O le mafuta faatasi e lē na o le iai faatasi i se nofoaga e tasi, ae e loloto atu nai lo mea o loo vaaia poo mea o loo faatinoina e atagia ai le “mafuta faatasi”. A oo ina lepetia le “mafuta faatasi” o tagata poo le mafutaga, e matuā faigata lava ona faia se galuega ma se loto fiafia, ma le feoeoeai, ma le olioli, ma le fealofani.
E masani ona tatou faalogo i faaupuga faapea, “A fiafia lava e faigofie mea uma”. E moni lava lea faaupuga. O le taimi e tofiaina ai taitai i totonu o se Ekalesia, o se taimi lea e mafai ona ono lepetia ai le “mafuta faatasi” ona o le a eseese manatu, lagona atoa ai foi ma uiga faaalia o tagata.
A o lei faia le filifiliga e ao ona silasila i itu uma ina ia aua ne‘i iai se vaega e ono lamatia ai le mafuta faatasi, ae ia faia tulaga uma ina ia “taofi le loto gatasi i la le Agaga”. (Efeso 4:3).
O le mataupu e 4 o Efeso o loo faamamafaina ai le upu lea o le “tasi”. O le alofa e tasi o le tino e tasi, o le Agaga e tasi, o le valaauina e tasi, o le papatisoga e tasi. E tāua tele i le Atua le tasi i totonu o le Ekalesia. Tatou te ioe o le ki lea e maua ai faamanuiaga e pei ona a‘oa‘o mai le Salamo 133, “Se mea ina lelei o uso ae nonofo fealofani”…
E a‘oa‘o le Tusi Paia ina ia tatou faia mea uma lava ina ia faatuputeleina ai le fealofani ae tineia le fevaevaeai ma le faaituau. Ioe, o le itu vaivai lea o le tagata e oo lava i totonu o Ekalesia e pei ona lapataia ai foi e Paulo le Ekalesia i Korinito, ina ia aua ne‘i faaituau.
O nisi fai mai o latou o sa Apolō, o nisi fai mai o sa Kerisō, ae o nisi o sa Paulō. Fai mai le atugaluga o le aposetolo, “Po ua felefele ea Keriso?” (1 Korinito 1:12).
A oo i taimi e fai ai faiga palota i totonu o le Ekalesia, ona tatou faia lea o le mea lea e atugalu ai le aposetolo. Ua tatou faafelefeleina se‘i tulou, le Ekalesia poo le Tino o Keriso. E faatu mai le sui a lea, faaluaina e lea, faatu mai lea sui, ma lea sui. O le tele lava o sui faatutu o le tele foi lea o le fevaevaeaiga e ono tulai mai.
O le tele o faaiuga faapalota e faia lea i tagata e toalua. E mautinoa lava o le a vaeluaina le Ekalesia i lagona auā o le a fai mai nisi e lelei le matou sui, ae manatu foi le isi itu o le latou sui e lelei. A mae‘a le palota, e mautinoa foi ua iai le itu malo, ua iai foi le itu faiaina. O le itu faiaina, e lagona le lē fiafia ma le lē faamalieina, o nisi foi o taimi ua lagona le ita, ma le lē toe fia auai i ni meafai.
O le faaaogāina o faiga faapalota i totonu o le Ekalesia e maua ai le malo ma le faiaina. O le palotaina o tofi e itiiti pe leai foi se filemu e na te faatupuina. A o tatou faamaoni i o tatou loto ma fesili a‘e, sa iai ea se taimi na e lē fiafia ai ona o se faaiuga o se palota? O le palota na te faatupuina le faaituau i totonu o le Ekalesia. O le palota na te faatupuina le maseiga i le va o uso. O se tasi lea o mea o loo matuā lapatai ai le Tusi Paia, o le tagata na te faatupuina le maseiga.
O le manatu mulimuli, e lē faapea o le toatele o tagata e lagolagoina se tasi poo se manatu, ona faapea ai lea o le mea sa‘o lea. E mafai ona mafuli le filifiliga i le toatele o tagata e lagolagoina, ae o le toatele o loo sese uma. Na mafuli le toatele o finagalo ina ia toe fia foi i Aikupito, vaganā ai Mose na ese ai lona finagalo, na ia faapea atu “e leai e tatau ona tatou savavali pea”.
O le filifiliga o taitai i le Tusi Paia, e tofi. O le auala lea na faaaogāina e le Atua. O le auala foi lea na faaaogāina e Keriso, o le auala foi lea na faaaogāina e le au aposetolo e filifili ai tiakono, o le auala foi lea na faaaogāina e Paulo. Na ia faatonuina Timoteo a o faifeau i Efeso ina ia totofi ni toeaiina e taitaia le Ekalesia.
Ia fesoasoani mai le Agaga o le Atua mo i tatou ina ia o tatou savavali e tusa ma lona finagalo. Tatou talanoa pea i le vaiaso fou. Ia manuia au feau ma galuega o lenei vaiaso.
Ona o Keriso,
Lui Ponifasio
