O le molimau mai a le sui Komesina o Faigapalota talu ona latalata i aso o le a tapunia ai le lesitala mo tagata palota e tele ituaiga o faamatalaga na lafo atu e nisi sa tumutumu ai le ofisa i Mulinuu.
“O nisi ua valaau mai, sole e ke lē vaai mai ea i le mea lea ua oo i ai le faiga o lesikala, e ke iloa o kagaka makukua gei e faalalā i fafo”. Na saunoa mai le sui Komesina le susuga Faimalomatumua Mathew Lemisio, e ui ina sa iai ia uiga ma amioga a nisi sa faailoa ane i le aufaigaluega, ae o le itu tāua ia te ia, o le faailoga lea o le naunau atu o le atunuu e fia auai i le faiga filifiliga a le atunuu poo le palota o le a sailia ai tofi o itumalo i le Palemene.
O le tumutumu sa molimauina i le ofisa o faigapalota i le lua vaiaso ua tuanai seia oo ina tapuni le lesitala i le Aso Lua na tea nei na faaalia e le sui komesina o faigapalota o se tulaga ua lē mafai ona taofia e ui sa tau sāvali le ofisa i nuu ma afioaga i le fā tausaga ua mavae e faatino le lesitala o tagata.
E tapunia le lesitala i le aso 3 o Novema 2015 ua oo i le 15 afe le aofaiga o tagata palota o le taimi muamua lea ua faamauina ai o latou suafa.
Peitai o le saunoaga a le sui komesina e oo lava ina maua le aofaiga e 16 afe poo le sili atu foi pe a uma ona siaki uma suafa ua faamauina i le lesitala.
O le aofaiga lata mai o tagata palota uma ua 108 afe ae o le a siitia lea numela pe a mae‘a tuufaatasia uma tagata o lola palota mo itumalo faafaipule. O le faagasologa o le galuega e lei ‘asa ma ni faafitauli.
O se tasi o tatou lipoti talu ai sa faailoa mai ai e le sui komesina o palota se pulenuu ua ave i leoleo mo ni suesuega ona o faiga faaalatua i le faasese o faamaumauga na ia tuuina atu o ni tagata palota.
Ae o le latalata ina mae‘a o le galuega ua maua le toalima o pulenuu ua ave i leoleo ona o ia lava faiga faaalatua. O le saunoaga a Faimalomatumua Mathew Lemisio, e iai nisi o moliaga ua oo nei i le faamasinoga.
“O se itu lelei lena i le matou faigapaaga ma le Matagaluega o Leoleo ona ua vave ona mae‘a a latou sailiiliga ma faia moliaga oi latou ua tuua‘ia i faiga solitulafono i le lesitalaga o tagata”.
O loo iai le talitonuga o le a tele nisi mataupu faapenei e oo i le faamasinoga pe afai e faaulu ni tagi e mafua i le faigapalota o loo loma nei a le atunuu.
