Atonu oloo tuufesili nisi pe fia ni tupe oloo faaalu ele Malo e totogi ai i latou oloo taitaia le atunuu. E tusa ai o faamaumauga na maua oloo faamauina ai, ole taitai aupito i maualuga lona totogi oloo iai ile taimi nei, ole afioga ile Ao ole Malo le afioga ia Tuiatua Tupua Tamasese, sosoo ai le totogi ole afioga ile alii Palemia, Tuilaepa Sailele Malielegaoi.
Ole totogi ile tausaga oloo maua ele afioga ile Ao ole Malo e tusa lea male $183,855 faaopoopo ai ma alauni e $20,000 tala. Ole aofaiga atoa ole totogi oloo maua e lana afioga e $203,855 ile tausaga, e tusa lea male $3,920.28 ile vaiaso. O nei totogi e lē o aofia ai taavale ma isi faamanuiaga oloo maua e taitai ole atunuu.
Ole afioga ile alii Palemia e lona lua atu iai lona totogi, e tusa lea male $178,000 faaopoopo iai ma alauni e $15,000, ona maua ai lea ole aofaiga e $193,602 ile tausaga e tusa lea male $3,723.11 ile vaiaso. A faatusa ile totogi oloo maua ele Ao ole Malo e $197.17, e maualuga ai le totogi ole Ao ole Malo ile totogi ole Palemia ile vaiaso.
O isi taitai ole atunuu e sosoo atu iai le maualuluga o totogi oloo latou mauaina, o sui ole fono a Sui Tofia e toatolu, lea e aofia ai le afioga ile Tama Aiga Tuimalealiifano Sualauvi II, ole Afioga Tuiloma Pule Lameko male Afioga Lemamea Ropati Mualia.
O latou nei e toatolu e tusa male $191,000 latou te maua ile tausaga e aofia ai ma alauni, poo le $3,673 ile vaiaso.
A tuufaatasi le tupe oloo faaalu mo totogi o sui e toatolu ole fono a Sui Tofia, e tusa lea male $573,929 ile tausaga.
Ole afioga ile Faamasino Sili, Tiavasue Falefatu Sapolu e sosoo atu iai le maualuga o lona totogi e tusa ai o faamaumauga. Oloo maua ele Faamasino Sili le totogi e $164,944 faatasi ai ma alauni e $15,000 ona maua ai lea ole aofaiga e $179,994 le aofaiga o lona totogi ile tausaga poo le $3,461.42 ile vaiaso.
Ole afioga ile tamaitai Sui Palemia, le afioga ia Fiame Naomi Mataafa e sosoo atu iai. Oloo ia mauaina le totogi e $153,831 oloo aofia faatasi ai ma alauni e $12,000 ile tausaga poo le $2,958.28 ile vaiaso.
Ole Fofoga Fetalai ole Maota, le afioga ia Toleafoa Faafisi oloo sosoo atu iai lona totogi ole aofaiga atoa oloo ia mauaina e $131,325 ma alauni e $8,000 ona maua ai lea ole aofaiga e $139,325 lona totogi ile tausaga poo le $2,679.32 ile vaiaso.
Ole afioga ile Sui Fofoga Fetalai, Nafoaitoa Misa Talaimanu oloo ia mauaina le totogi e $103,407 faaopoopo iai male alauni e $3,600 ole aofaiga atoa o lona totogi ile tausaga e $131,325.00 poo le $2,525.48 ile vaiaso.
O afioga i Minisita ole Kapeneta, oloo latou mauaina se totogi e tusa male $132,000 ile tausaga, poo le $2,538.46 ile vaiaso. A tuufaatasi le tupe ale atunuu oloo faaalu ile totogi o Minisita e 12 ole Kapeneta e tusa lea male $1.57 miliona ile tausaga.
Ole Suetusi Sili ale malo, le afioga ia Fuimaono Camillo Afele o lona totogi oloo maua e tusa lea male $131,668 ile tausaga poo le $2,532.07 ile vaiaso.
Ole Komesina o Sulufaiga, le afioga ia Maiava Iulai Toma oloo ia mauaina le totogi e $128,327 ile tausaga poo le $2,567.82 ile vaiaso. Ole Peresitene ole Faamasinoga o Fanua ma Suafa oloo ia mauaina le totogi e $126,072 ile tausaga poo le $2,424.46 ile vaiaso.O afioga i alii ma tamaitai faamasino ole Faamasinoga (Supreme Court) e $664,145 oloo faaalu mo latou totogi, ae $1.59miliona le tupe oloo faaalu i totogi o faamasino, ole Faamasinoga o Fanua ma Suafa.
O isi totogi sa faatulaga i lalo ole tala faaletupe 2016-2017 ole taitai ole Itu Agai sa faatulaga nate mauaina le $108,000 ile tausaga poo le $2,076.92 ile vaiaso, ae ole sui taitai ole Itu Agai sa faatulaga iai lona totogi e $92,453 ile tausaga poo le $1,777.94 ile vaiaso.
Ona ole taimi nei e leai se Itu Agai o agaia le Malo, oloo faasao mai la tupe ia sa faatulaga mole taitai male sui taitai ole Itu Agai.
Ole aotelega o lenei lipoti oloo tuufaatasia le aofaiga o tupe oloo faaalu mo totogi o taitai ole atunuu e tusa lea male $9.14miliona tala ile tausaga mole tausaga faaletupe 2016 ile 2017. O lenei aofaiga e tusa lea male $240,000 ua maualuga ai nai lo le tupe sa faaalu i totogi o taitai ole atunuu ile tala faaletupe oloo 2015 ile 2016.
E faigata ona faatusatusa totogi oloo maua e taitai ole atunuu i totogi oloo maua e tagata faigaluega ale malo lea e amata mai ile $2.30 ile itula poo le $92.00 ile vaiaso.
